އައްޑޫ ލިންކް ރޯޑާއި ތާރު އަޅައިގެން ހަދާފައިވާ ބޮޑެތި މަގުތަކުގައި ނުރައްކާތެރި އެކްސިޑެންޓް ހިނގައި އެތައް ބަޔަކު މަރުވެފައިވަނިކޮށް މަގުމަތީގެ ސަލާމަތާ ރައްކާތެރިކަމަށް ރައްޔިތުން ހޭލުންތެރި ކުރުމަށް ތަފާތު ޙަރަކާތްތަކެއް ހިމެނޭގޮތަށް އެލައިޑް އިންޝުއަރެންސާއި ފުލުހުން ގުޅިގެން ހިންގާ ޓްރެފިކް ރޯޑްޝޯ "ރައްކާ" މިއަދު ފަށައިފިއެވެ.
މިއަދުން ފެށިގެން މި މަހުގެ 26 ވަނަ ދުވަހާއި ހަމައަށް ކުރިއަށް ގެންދާ މި ހަރަކާތުގައި މީހުން ހޭލުންތެރިކުރުމަށް ތަފާތު ހަރަކާތް ހިންގާނެ ކަމަށް ފުލުހުން ބުނެއެވެ. އެގޮތުން މަރަދޫ އާއި ހިތަދޫގައި ކުޑަކުދިންގެ ހަވީރެއްގެ އިތުރުން މިހަރަކާތް ނިންމާލުމުގެ ގޮތުން ހިތަދޫގައި ހާއްސަ މިއުޒިކް ޝޯވްއެއް ބޭއްވުމަށް ނިންމާފައިވާ ކަމަށް ފުލުހުން ބުނެއެވެ.
މިއަދު ހެނދުނު ހިތަދޫ ސްކޫލްގައި މި ހަރަކާތް ރަސްމީކޮށް ފެއްޓުމަށް ބޭއްވި ރަސްމިއްޔާތުގައި އެލައިޑް އިންޝޫރެންސްގެ އިސްވެރިންނާއި، ޑެޕިއުޓީ ކޮމިޝަނަރ އޮފް ޕޮލިސް އަޙްމަދު ސަޢުދީ އާއި ޓްރެފިކް މެނޭޖްމަންޓް ޑިޕާޓްމަންޓުގެ ހެޑް ސުޕްރިންޓެންޑެންޓް އޮފް ޕޮލިސް މުޙައްމަދު ދާއޫދު އާއި ފުލުހުންގެ އިސް ބޭފުޅުންގެ އިތުރުން އައްޑޫގެ ތަފާތު މުވައްސަސާތަކުގެ އިސްވެރިން ބައިވެރިވިއެވެ.
ފުލުހުން މިއަދު ރޯޑް ޝޯވްއެއް ފެށިއިރު މިދިޔަ ބުރާސްފަތި ދުވަހު ހިތަދޫ ބޮޑު މަގުގައި ހިނގި ނުރައްކާތެރި އެކްސިޑެންޓެއްގައި 17 އަހަރުގެ ޒުވާނަކު ވަނީ ނިޔާވެފައެވެ.
މިއަހަރު އެކަނިވެސް އައްޑޫގައި ހިނގި ތަފާތު އެކްސިޑެންޓް ތަކުގައި 6 މީހަކު ވަނީ ނިޔާވެފައެވެ.