މިއަދު ހަވީރު ހުޅުމީދޫގައި ފެށި "ހުޅުމީދޫ ވިމެންސް ފުޓްސަލް" މުބާރާތުގެ ހުޅުވި މެޗް 3-1 ލަނޑުން ހުޅުދޫ ފަރިޓީމް ކާމިޔާބް ކޮށްފިއެވެ.
މީދޫ ފުޓްސަލް އެރީނާގައި ކުޅުނު މި މެޗްގައި ފުރަތަމަ ހާފް ނިމުނު އިރުވެސް ފަރި ޓީމްއިން ވަނީ 2 ލަނޑު ޖަހާފައެވެ. މީދޫ ފުޓްސަލް ޑިވާސްއިން ޖެހި ހަމައެކަނި ލަނޑު ޖަހާފައިވަނީ މެޗްގެ ފުރަތަމަ ހާފްގައެވެ.
ފޯރިގަދަ ކުޅުމެއް ފެނިގެން ދިޔަ މި މެޗް ތިން ވަނަ ލަނޑު ހުޅުދޫ ފަރި ޓީމްއިން ޖެހީ ފަހު ހާފްގައެވެ.
މީދޫ އަދި ހުޅުދޫ ފުޓްސަލް އެރީނާގައި ކުޅޭ މި މުބާރާތުގައި މިރޭ 9:30 ގައި ވާދަ ކުރާނީ އެފްސީ ހިއްވަރު އާއި ދޮންދީނި ޓީމްއެވެ.
މި މުބާރާތަކީ ހުޅުދޫ މަޖްލިސް މެމްބަރު މުހައްމަދު ޝާހިދް، ދެ ރަށުގެ އަންހެނުންގެ ގުޅުން ގާއިމް ކުރުމަށާއި، ދުޅަހެޔޮ ސިއްހަތެެއްގައި އަންހެން ކަބަލުން ތިބުމަށް ހިއްވަރު ދިނުމުގެ ގޮތުން ބާއްވާ މުބާރާތެކެވެ. ޝާޑް އަންނަނީ މި ދެރަށުގައި އަންހެން ފުޓްސަލް ކުރިއެރުވުމަށް ގިނަ މަސައްކަތްތަކެއް ކުރައްވަމުންނެވެ.
މި މުބާރާތުގެ ޗެމްޕިއަން ޓީމަށް 15،000 ރުފިޔާ ހުށަހަޅާފައިވާ އިރު ރަނައަޕް ޓީމަށް ވަނީ 8000 ރުފިޔާ ހުށަހަޅާފައެވެ. އަދި ފެއާޕްލޭ ޓީމަށް 3000 ރުފިޔާ ވަނީ ހުށަހެޅިފައެވެ.