ކުރީގެ ޑިފެންސް މިނިސްޓަރު މުހައްމަދު ނާޒިމް ޖަލަށް ލާން ކުރި ހުކުމުގެ އިސްތިއުނާފް ޝަރީއަތް ކުރިއަށް ނުދާތާ ފަސް މަހަށް ވުރެ ގިނަ ދުވަސް ވެފައި ވަނިކޮށް އަންނަ އާދިއްތަ ދުވަހަށް ތާވަލްކޮށްފި އެވެ.
ހަނގުރާމަވެރި ހަތިޔާރު ގެންގުޅުމުގެ ކުށުގައި ނާޒިމް 11 އަހަރަށް ޖަލަށް ލާން މިދިޔަ މާޗް މަހު ދަށު ކޯޓުން ކުރި ހުކުމް އިސްތިއުނާފް ކުރަން ނާޒިމްގެ ފަރާތުން ހުށަހެޅުމުން އެ މައްސަލައިގެ އަޑުއެހުމެއް އެންމެ ފަހުން ހައި ކޯޓުން ބޭއްވީ މިދިޔަ ޖޫން 22 ގަ އެވެ.
ނާޒިމްގެ އިސްތިއުނާފް ޝަރީއަތް ބަލަން ކުރިން އެކުލަވާލި ބެންޗުގައި ހިމެނުނު ތިން ފަނޑިޔާރަކު ވަނީ މިހާރު ވަކިވެފަ އެވެ. އެ ބެންޗުގެ ރިޔާސަތު ކުރިން ބެލެހެއްޓެވި ފަނޑިޔާރު އަބްދުލްޣަނީ މުހައްމަދާއި އެ ބެންޗުގައި ހިމެނުނު ފަނޑިޔާރު ޝުއައިބު ހުސައިން ޒަކަރިއްޔާ ހައި ކޯޓުގެ ދެކުނު ގޮތްޕަށް ބަދަލުކޮށްފައިވާއިރު އެ ބެންޗުގައި ހިމެނުނު ފަނޑިޔާރު އައްބާސް ޝަރީފް ވަނީ އަމިއްލައަށް ފަނޑިޔާރުކަމުން ރިޓަޔާވެވަޑައިގެންފަ އެވެ.
ނާޒިމްގެ މައްސަލަ ދަށު ކޯޓުގައި ބެލި ފަނޑިޔާރުންގެ ތެރޭގައި ހިމެނޭ އަބްދުﷲ ދީދީ އާއި ޝުޖާއު އުޘްމާނަކީ މިހާރު ހައި ކޯޓު ފަނޑިޔާރުންގެ ގޮތުގައި ތިއްބެވި 2 ބޭފުޅުންނެވެ. ނަމަވެސް އެ ބޭފުޅުން ނާޒިމްގެ މައްސަލަ ބަލާ ބެންޗްގައި ހިމެނިވަޑައެއް ނުގަންނަވައެވެ.
ނާޒިމް އިސްތިއުނާފް ޝަރީއަތް ކުރިއަށް ނުދާތީ އެތައް ފަހަރެއްގެ މަތިން ހައި ކޯޓުގެ ސަމާލުކަމަށް އެކަން ގެނެސްފައިވާ ކަމަށް ނާޒިމްގެ ވަކީލުން ވަނީ ބުނެފަ އެވެ. އަދި ހައި ކޯޓުން ޖަވާބެއް ނުލިބުމުން އެ މައްސަލަ ސުޕްރީމް ކޯޓުގެ ސަމާލު ކަމަށް ވެސް ވަނީ ގެނެސްފައެވެ.