ހުޅުމީދޫގައި އިއްޔެ ފެށި "އެޗްއެމް ވިމެންސް ފުޓްސަލް" މުބާރާތުގެ ދެވަނަ މެޗް މީދޫ ދޮންދީނި ޓީމުން ކާމިޔާބްކޮށްފިއެވެ.
ހުޅުދޫ ފުޓްސަލް އެރީނާގައި ރޭ ކުޅުނު މެޗް ދޮންދީނި ޓީމް ކާމިޔާބް ކުރީ މީދޫ އެފްސީ ހިތްވަރު ޓީމް އާއި ވާދަކޮށް 5-2 ލަނޑުންނެވެ.
ރޭގެ މެޗްގައި ދޮންދީނި ޓީމްގެ ޒައިނާ ވަނީ 4 ގޯލް ޖަހައި މެޗްގެ މޮޅު ކުޅުންތެރިއާގެ މަގާމް ހޯދާފައެވެ. ދޮންދީނި ޓީމްގެ 5 ވަނަ ލަނޑު ނިހާން ޖެހި އިރު އެފްސީ ހިތްވަރުގެ ގޯލްތައް ޖަހާދީފައި ވަނީ ސުޒީ އާއި މަރިޔަމް ރަޝީދާއެވެ.
މުބާރާތުގައި މިއަދު ހަވީރު ބައްދަލު ކުރާނީ އެމްޑަބްލިއު ފުޓްސަލް ޓީމް އާއި ފަރި ޓީމްއެވެ. މި މެޗް ކުޅޭނީ މިއަދު ހަވީރު މީދޫ ފުޓްސަލް ދަނޑުގައެވެ. އަދި މިރޭގެ ދެވަނަ މެޗް ހުޅުދޫ ފުޓްސަލް ދަނޑުގައި ކުޅޭ އިރު ވާަދަ ކުރާނީ އޯކިޑް އާއި އެފްސީ ހިތަވަރު ޓީމްއެވެ.
ފަރިޓީމް އިއްޔެ ވަނީ ފުޓްސަލް ޑީވާސް އަތުން މޮޅުވެ 3 ޕޮއިންޓް ހޯދާފައެެވެ.
މި މުބާރާތަކީ ހުޅުދޫ މަޖްލިސް މެމްބަރު މުހައްމަދު ޝާހިދް، ދެ ރަށުގެ އަންހެނުންގެ ގުޅުން ގާއިމް ކުރުމަށާއި، ދުޅަހެޔޮ ސިއްހަތެެއްގައި އަންހެން ކަބަލުން ތިބުމަށް ހިއްވަރު ދިނުމުގެ ގޮތުން ބާއްވާ މުބާރާތެކެވެ. ޝާޑް އަންނަނީ މި ދެރަށުގައި އަންހެން ފުޓްސަލް ކުރިއެރުވުމަށް ގިނަ މަސައްކަތްތަކެއް ކުރައްވަމުންނެވެ.
މި މުބާރާތުގެ ޗެމްޕިއަން ޓީމަށް 15،000 ރުފިޔާ ހުށަހަޅާފައިވާ އިރު ރަނައަޕް ޓީމަށް ވަނީ 8000 ރުފިޔާ ވަނީ ހުށަހަޅާފައެވެ. އަދި ފެއާޕްލޭ ޓީމަށް 3000 ރުފިޔާ ވަނީ ހުށަހެޅިފައެވެ.