ހިތަދޫ ރީޖަނަލް ހޮސްޕިޓަލޭ ބުނާ އިރަށް އައްޑޫގެ ގިނަ މީހުންގެ ޚިޔާލަށް އަންނަނީ ބާލިދީއެއް ނުވަތަ ކުލަ ވެއްޓިފައިވާ ފާރެއް ނުވަތަ އެކަށީގެންވާ ޚިދުމަތްތަކެއް ލިބެން ނުހުންނަ ތަނެކެވެ. އައްޑޫގެ ގިނަ ބަޔަކު އެ ހޮސްޕިޓަލަށް ބަލަނީ ވެސް ނަފްރަތުގެ ނަޒަރަކުންނެވެ. ސަރުކާރުތަކުން އިހުމާލުވުމުގެ ސަބަބުން ހޮސްޕިޓަލުގެ ތަރައްޤީއަށް އެކަށީގެންވާ މަސައްކަތްތަކެއް ކުރެވިފައެއް ނުވެއެވެ.
ހޮސްޕިޓަލާއި މެދު އާންމުންގެ ތެރެއިން ގިނަ ބައެއްގެ ހިތުގައި ރުޅިވެރިކަން އުފެދިފައިވާ އިރު އެ ރުޅިވެރިކަން އެންމެ ބޮޑަށް އަމާޒުވާ އެއްބަޔަކީ، ހޮސްޕިޓަލުގެ މުވައްޒަފުންނެވެ. ހޮސްޕިޓަލުން ލިބޭ ޚިދުމަތްތަކުގެ ފެންވަރު ދަށްވުމުގެ ސަބަބުން ގިނަފަހަރަށް ހެއްދެވި ނުހެއްދެވި އަށް ގޮވަނީ ހޮސްޕިޓަލުގެ ކައުންޓަރުގައި ހުންނަ މުވައްޒަފަށެވެ. ނުވަތަ ޚިދުމަތް ދޭން ހުންނަ ނަރުހަކަށެވެ.
ނަމަވެސް މިއީ އެންމެ ރަގަޅު ގޮތްތޯ ސުވާލު އުފައްދަން ޖެހެއެވެ. އެކަށީގެންވާ ވަޞީލަތްތަކެއް ޤާއިމްވެފައި ނެތް ހޮސްޕިޓަލެއްގައި ޚިދުމަތް ދިނުމަކީ ވަރަށް ބޮޑު ގޮންޖެހުމެކެވެ. އެކަން އެންމެ ބޮޑަށް އިޙްސާސް ކުރެވޭނެ ބަޔަކީ ހޮސްޕިޓަލުގައި ތިބޭ ނަރުހުންނެވެ. 'އައްޑޫލައިވް' ގެ ފަރާތުން ވަނީ ހިތަދޫ ރީޖަނަލް ހޮސްޕިޓަލުގައި މަސައްކަތް ކުރާ ބައެއް ނަރުހުންނާއި އަދި އިދާރީ މަސައްކަތް ކުރައްވާ މުވައްޒަފުންނާއި ބައްދަލުކޮށް އިންޓަވިއުކޮށްފައެވެ.
މުވައްޒަފުންގެ ވާހަކަ
" އަޅުގަނޑުމެން މަސައްކަތް ކުރަނީ ވެވުނު އެންމެ ރަގަޅަކަށް މަސައްކަތް ކުރުމަށް އެހެން ނަމަވެސް މިތަނުގެ ވަސީލަތްތައް ހުންނަ ގޮތުން ޕޭޝަންޓު ހިތްއެދޭ ވަރަށް ޚިދުމަތް ނުދެވޭ. އެކަން ޤަބޫލުކުރަން." ހިތަދޫ ރީޖަނަލް ހޮސްޕިޓަލުގައި މަސައްކަތް ކުރާ ނަރުހަކު ބުންޏެވެ.
ވަސީލަތްތަކެއް ޤާއިމްވެފައި ނެތުމުން ޚިދުމަތް ދިނުން ހުއްޓާލާކަށް ނަރުހުން ބޭނުމެއް ނުވެއެވެ. އެމީހުން ބުނާ ގޮތުގައި، މުސާރައާއި ލިބޭ އިނާޔަތްތަކާއި މެދުވެސް އެމީހުންގެ ކަންބޮޑުވުންތައް އެބަހުރިއެވެ. ނަމަވެސް އެ ޝަކުވާތަކާއި އެކު ވެސް ހިނުތުންވެގެން ނަރުހުން ގެންދަނީ ވީ އެންމެ ރަގަޅަކަށް ޚިދުމަތް ދެވޭތޯ ބަލަމުންނެވެ. އެއީ އައްޑޫގެ ރައްޔިތުން ސެލިއުޓް ކުރަންޖެހޭނެ ކަމެކެވެ.
އަޅުގަނޑުމެން ކޮންމެ މީހަކީ ވެސް އާއިލާއެއް ބަލަހައްޓަމުން ގެންދާ ފަރާތެކެވެ. އެހެން ކަމުން އާމްދަނީ ހޯދުމަށް ކޮންމެވެސް ކަހަލަ މަސައްކަތްތަކެއް ކުރަން ޖެހެއެވެ. ހޮސްޕިޓަލުގައި މަސައްކަތްކުރާ ހުރިހާ މުވައްޒަފުންނަކީ ވެސް ހަމައެގޮތް ކަމުގައި ޤަބޫލުކުރަން ޖެހެއެވެ.
ހިތަދޫ ރީޖަނަލް ހޮސްޕިޓަލުގައި މަސައްކަތު މީހެއްގެ ވަޒީފާ އަދާކުރާ މަރިޔަމް (އަސްލު ނަން އުނިކުރެވިފައި) ބުނި ގޮތުގައި، ވަޒީފާ އަދާކުރާ މާޙައުލުގައި ވެރިންގެ ފަރާތުން ކުރިމަތިވާ ފިއްތުންތަކަކީ ވެސް އެކަށީގެންވާ ގޮތެއްގައި ވަޒީފާ އަދާކުރުމަށް އޮތް ގޮންޖެހުމެއް ކަމަށެވެ.
"ބައެއް ފަހަރަށް މިތަނަށް ޚިދުމަތް ހޯދަން އަންނަ މީހުންގެ ކުރިމަތީގައި އެބަ އެއްޗިހި ކިޔާ. އަހަރުމެންގެ ވެސް އަގެއް އޮންނާނެ. މިތަނުގެ އިސްމީހުންގެ ތެރެއިން ބައެއް މީހުން ދެކެނީ އަހަރުމެންނަކީ އަޅުން ކަމަށް"
ސީނިއާ މުވައްޒަފުންގެ ފަރާތުން ހަރުކަށިކަން ފެންނަ ކަމަށް، ބައެއް މުވައްޒަފުން ބުންޏަސް 'އައްޑޫލައިވް' އާއި ވާހަކަ ދެއްކި ގިނަ މުވައްޒަފުން ބުނި ގޮތުގައި، ހޮސްޕިޓަލުގައި މިވަގުތު އޮތީ، 'ހިތްތިރި' މެނޭޖްމެންޓެކެވެ.
"ކޮންމެ ތާކުވެސް އުޅޭނެ މުވައްޒަފުންނަށް އެއްޗިހި ކިޔާ މީހުން. އެކަމަކު ޖުމްލަ ގޮތެއްގައި ބަލާއިރު. ވަރަށް ރަގަޅޭ ބުނެވޭނީ މިހާރުގެ މެނޭޖްމެންޓް"
ހޮސްޕިޓަލްގެ ސީނިއާ މުވައްޒަފުން
ޒަމާންތަކެއް ވަންދެން ހިތަދޫ ރީޖަނަލް ހޮސްޕިޓަލް ހިންގެވުމާއި ހަވާލުވެ ހުންނެވި، އަބްދުﷲ ސަޢީދަށް ވެސް ގިނަ ބައެއްގެ ރުޅިވެރިކަން އަމާޒުވި ގޮތަށް މިހާރު ހޮސްޕިޓަލް ހިންގުވުމާއި ހަވާލުވެ ހުންނެވި، ޚަދީޖާ ހަފްސާއަށް ވެސް ގިނަ ބައެއްގެ ފާޑުކިޔުންތައް ވަނީ އަމާޒުވެފައެވެ. ހޮސްޕިޓަލުގައި އިސްކޮށް މަސައްކަތް ކުރާ ހުރިހާ މުވައްޒަފުން ވެސް ބުނާ ގޮތުގައި އެމީހުން މަސައްކަތަށް ނިކުންނަނީ އާންމުންގެ ރުޅިވެރިކަން އަމާޒުވެފައިވާކަން އެނގިތިބެ ކަމަށެވެ.
"އަސްލު އެނގޭ މީހުން ތިބޭނީ ރުޅިއައިސްފައި ކަން. އެކަމަކު މިތާގެ މެނޭޖްމެންޓުން މަސައްކަތް ކުރައްވާ ކެނޑިނޭޅި. ތަނުގެ ހާލަތު ރަގަޅު ކުރުމަށް. ވަކި މައްސަލައެއް ނޫން. ކޮންމެ ދުވަހަކު އެއްފަހަރު ހެން އަޅުގަނޑުމެން ގުޅަން. ހޮސްޕިޓަލުގައި ހުރި މައްސަލަތައް މިނިސްޓްރީގެ ސަމާލުކަމަށް ގެންދެވޭ." ހޮސްޕިޓަލުގެ ސީނިއާ ބޭފުޅަކު ވިދާޅުވިއެވެ.
ސުވާލަކީ، ހެލްތު މިނިސްޓްރީގެ ފަރާތުން އެހާ ބޮޑު ފިއްތުންތަކެއް ކުރިމަތިވާއިރު، އެކަން ރައްޔިތުންނާއި ހަމައަށް ހާމަކޮށްދޭން މެނޭޖްމެންޓުން ފަސް ޖެހެނީ ކީއްވެގެން ހެއްޔެވެ؟ އެ ސުވާލަށް ސީދާ ޖަވާބެއް ދެއްވަން ބޭނުން ނުވި އަސް އެނގޭ ކަމަކީ، ސަރުކާރުން ހިތްހަމަ ނުޖެހޭ ބޭފުޅަކަށް ވަޒީފާގައި ނުހުރެވޭނެ ކަމެވެ.
އާންމުން ބުނަނީ ކީކޭ ؟
ހޮސްޕިޓަލުގައި ވަސީލަތްތައް ޤާއިމްވެފައި ނެތުމަކީ، ޚިދުމަތް ދިނުމަށް ކުރިމަތިވެފައިވާ ގޮންޖެހުމެއް ކަމަށް ގިނަ ބަޔަކު ޤަބޫލު ކުރެއެވެ. އެހެން ނަމަވެސް، ވަސީލަތްތައް ފުރިހަމަ ނުވާ ކަމުގެ އުޒުރު ދެއްކުމަށް ފަހު އެކަށީގެންވާ ޚިދުމަތް ނުދިނުމަކީ ޤަބޫލުކުރެވޭނެ ކަމެއް ނޫނެވެ.
" މީގެ ދުވަސްކޮޅެއް ކުރިން އަޅުގަނޑުގެ ރައްޓެއްސަކު އެކްސިޑެންޓް ވެގެން ގެނައީ. އޭނާ އިމަޖެންސީގައި ފަރުވާދެމުން ދިޔައިރު އެތަނުގައި ޑިއުޓީއަށް ހުރި (ނަން އުނިކުރެވިފައި) ހަމަ އެގަޑީގައި ފޭސްބުކް ސްޓޭޓަސް އަޕްޓޭޑްކޮށް ފޮޓޯ މިލަނީ."
މީގެ އިތުރުން ވެސް ބައެއް މީހުން ވަނީ ތަފާތު އެކި މައްސަލަތައް ފާހަގަކޮށްފައެވެ. އެގޮތުން ބޭސް އަޅަން ދިއުމުން ބައެއް ނަރުހުން ފަކުރު ގަނެފައި ތިބޭ ކަހަލަ ގޮތަކަށް ވައްތަރު ޖައްސާ ކަމަށް ވެސް 'އައްޑޫލައިވް' އާއި ވާހަކަ ދެއްކި ބައެއް މީހުން ބުންޏެވެ. ނަމަވެސް އެމީހުން ބުނާ ގޮތުގައި އެއީ ހޮސްޕިޓަލުގައި މަސައްކަތް ކުރާ ހުރިހާ ނަރުހުންނެއް ނޫނެވެ. ބައެއް ނަރުހުންގެ އަމަލުތައް ހުންނަގޮތެވެ.
" ވަރަށް ހިތްހެޔޮ ކުދިން އުޅޭ ނަރުހުންނަށް . އެކަމަކު ބައެއް ނަރުހުން މިހަދާ ގޮތަކީ ބޭސް އަޅަން ދިޔައީމަ 'ޗީޗީ' ވެފަ ހުރެ އެކަން ކުރަނީ"
ހިތަދޫ ރީޖަނަލް ހޮސްޕިޓަލަކީ، އައްޑޫގެ އާބާދީ އަށް އެކަށީގެންވާ ސިއްޙީ ޚިދުމަތް ދެވޭ ފެންވަރުގެ ތަނެއް ނޫނެވެ. އެއީ ހުރިހާ އެންމެން ވެސް ޤަބޫލު ކުރަން ޖެހޭ ހަޤީޤަތެކެވެ. ނަމަވެސް އެއީ ހޮސްޕިޓަލުގައި ތިބި މުވައްޒަފުން ޚިދުމަތް ދިނުމުގައި ފަރުވާކުޑަކުރުމަށް އޮތް އުޒުރެއް ނޫނެވެ. ހަމަ އެހެންމެ ހޮސްޕިޓަލުގައި ތިބި މުވައްޒަފުންގެ ތެރެއިން ވަކި ބަޔަކު ގޯސްކޮށް ކުރާ ކަންކަމާ ހުރެ، އެތަނުގަައި ތިބި ހީވާގި މުވައްޒަފުންގެ މަސައްކަތުގެ އަގު ވަޒަން ނުކުރަން ޖެހޭ ސަބަބެއް ވެސް ނޫނެވެ.