ޓެކްސީގެ ހިދުމަތުން ނަގަން އައްޑޫ ސިޓީ ކައުންސިލުން ފާސްކުރި އަގުތަކާއި މެދު ހިތްހަމަ ނުޖެހިގެން ހިތަދޫގެ ގިނަ ޓެކްސީ ޑްރައިވަރުންތަކެއް ކައުންސިލް އިދާރާއަށް ހާޒިރުވެ މުޒާހަރާކުރަމުން އެބަގެންދެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ޓެކްސީ ޑްރައިވަރުން ނުރުހުން ފާޅުކުރަމުން ގެންދަނީ، ކައުންސިލުން ފާސްކުރި އަގުތަކުގެ ތެރޭގައި ހިތަދޫގެ ކޮންމެ ތަނަކަށް ވެސް ކުރާ ދަތުރު ތަކަށް -/25 ރުފިޔާގެ އަގެއް ނަގަން ޖެހޭ ކަމަށް ބުނެފައި އޮތުމުންނެވެ. އެ ގަވާއިދުގައި ހިތަދޫގެ ސަރަހައްދުކަމަށް ކަނޑައަޅާފައި ވަނީ ކޯއްޓޭ ސަރަހައްދުން ފެށިގެން ގައުކެނޑި ސަރަހައްދާއި ހަމައަށެވެ.
ގައުކެނޑި ސަރަހައްދުން ފެށިގެން ކޯއްޓޭ އާއި ހަމައަށް ދިއުމަށް 8 ކިލޯ މީޓަރަށް ދުއްވަން ޖެހެއެވެ. ކައުންސިލުން ފާސްކޮށްފައިވާ އަގުތަކަށް ތަބާ ނުވެއްޖެ ނަމަ ފުލުހުން މެދުވެރިކޮށް ނުވަތަ ކަމާ ބެހޭ އެހެން މުއައްސަތައް މެދުވެރިކޮށް ވެސް ޓެކްސީ ތަކާއި މެދު ފިޔަވަޅު އަޅާނެ ކަމަށް ކައުންސިލުން މީގެ ކުރިން ވަނީ ބުނެފައެވެ.
" މިއީ އިންސާފެއް ނޫން. 8 ކިލޯ މީޓަރުގެ ދަތުރެއް ކުރަން އެބަޖެހޭ. ހަމަ 25 ރުފިޔާ. ހުރިހާ އެންމެންގެ ވެސް ހައްގުތައް ހިމާޔަތްކުރަން ޖެހޭނެ " ޓެކްސީ ޑްރައިވަރަކު ބުންޏެވެ.
ކައުންސިލުން ފާސްކުރި އަގުތަކާއި މެދު ހިތްހަމަނުޖެހުން ފާޅުކުރަން ކައުންސިލް އިދާރާއަށް ދިޔަ ޓެކްސީ ޑްރައިވަރުންނާއި ޑެޕިއުޓީ މޭޔަރު ތޮއްޔިބު މިހާރު ގެންދަވަނީ ކައުންސިލް އިދާރާގެ މީޓިން ރޫމްގައި ބައްދަލުކުރައްވަމުންނެވެ.
