މިއަދު މެންދުރު ފަހުން ފެށިގެން އައްޑޫ ސިޓީ އަށް ބޯކޮށް ވާރޭވެހި ބައެއް ގޭގޭގައި ފެންބޮޑުވެ ރައްޔިތުންގެ ޢާއްމު ދިރިއުޅުމަށް ދަތިވަމުންދާތީ ފުލުހުންނާ ސިފައިން ނިކުމެ ހަރަކާތްތެރި ވާން ފަށައިފި އެވެ.
އައްޑު އަށް މިހާރު ވެހެމުންދާ ވާރޭގައި މިހާތަނަށް ފޭދޫން 31 ގެއަކަށް، މަރަދޫ ފޭދޫން 10 ގެއަކަށް އަދި މަރަދޫން އެއް ގެއަކަށް ފެންވަދެ ފެނުގެ އަސަރު ވަރަށް ބޮޑަށް ކޮށްފައިވާއިރު ހިތަދޫގެ ބައެއް ގޭގެއަށް ވެސް ފެން ވަދެފައިވެއެވެ.
ފެން ބޮޑުވެފައިވާ ގޭގެއަށް އެހީތެރިކަން ފޯރުކޮށް ދިނުމަށް ފުލުހުންނާ ސިފައިން ނިކުމެ އެހީތެރިކަން ފޯރުކޮށްދީ ވެލިބަސްތާ ޖެހުމުގައި ޙަރަކާތްތެރިވަމުން ގެންދާއިރު ފެން ބޮޑުވެފައިވާ ސަރަހައްދުތަކުން ފެން ހިއްކުމުގެ މަސައްކަތް އެމްއާރްޑީސީ އިން ވެސް ވަނީ ކޮށްފައެވެ.
މޫސުމާ ބެހޭ ގައުމީ އިދާރާ އިން ބުނި ގޮތުގައި މިއަދު މެންދުރު ފަހު 2:00 އިން ފެށިގެން މިރެއާ ހަމައަށް 162 މިލިމީ ޓަރުގެ ވާރޭ އައްޑު އަށް ވެހިފައިވެ އެވެ. އަދި ހަވީރު ކުރި ވިއްސާރައިގައި ގަޑިއެއްހާ އިރު ތެރޭ 54.9 މިލިމީޓަރުގެ ވާރޭ ވެހިފައިވެ އެވެ.