އިއްޔެ ހެނދުނު އަށަކުން ފެށިގެން މިއަދު ހެނދުނު އަށަކާއި ހަމައަށް އައްޑޫ ސިޓީ އަށް 228.4 މިލިމީޓަރުގެ ވާރޭ ވެހިފައިވާކަމަށް މޫސުމާއި ބެހޭ ޤައުމީ އިދާރާ (މެޓް) އިން ބުނެފިއެވެ.
މެޓްގެ އޮފިޝަލަކު 'އައްޑޫލައިވް' އަށް މައުލޫމާތު ދެއްވަމުން ވިދާޅުވީ އައްޑޫ ސިޓީއަށް ވެހުނު ވާރޭގެ މިންވަރަކީ "ރިކޯޑް" އަކަށްވުން އެކަށީގެންވާ ކަމެއް ކަމަށާއި، އެމައުލޫމާތުތައް މިހާރު ކަށަވަރު ކުރަމުންދާ ކަމަށެވެ.
މެޓްއިން އާންމު ކޮށްފައިވާ މައުލޫމާތުތަކަށް ބަލާއިރު އިއްޔެ މެންދުރުފަހު 2:00 އިން ފެށިގެން ރޭ 9:30 އާއި ހަމައަށް އައްޑޫ ސިޓީއަށް 162 މިލިމީޓަރުގެ ވާރޭ ވެހިފައިވެއެވެ. އަދި އެއް ގަޑިއިރު ތެރޭގައި 54.9 މިލިމީޓަރުގެ ވާރޭ ވެހިފައިވާކަމަށް ރެކޯޑްތަކުން ދައްކައެވެ.
އައްޑޫ ސިޓީއަށް ކުރަމުންދާ ވިއްސާރައިގައި ފޭދޫ އާއި މަރަދޫފޭދޫ ގައި ވަނީ އާދަޔާ ޚިލާފަށް ފެންބޮޑުވެފައެވެ. އެގޮތުން ފޭދޫގެ ގިނަ ގެތަކަަށް ފެންވަދެފައިވާއިރު، ބައެއް ގެތަކުން މިހާރު މީހުން ބަދަލުކޮށްފައެވެ.