އަޅުގަނޑުމެންގެ މުޖްތަމަޢްގައި ސިޔާސީ ގޮތުން ޚިޔާލު ތަފާތު ވުމުގެ ސަބަބުން އިޖްތިމާޢީ ގުޅުންތައް ވަނީ ވަރަށް ބޮޑަށް ހީނަރުވެގެން ގޮސްފައެވެ. ކާރިސާތަކުގެ ވަގުތުގައި ވެސް ބައެއް ފަރާތްތަކުން މަސައްކަތް ކުރަމުން ގެންދަނީ، ސިޔާސީ ގޮތުން ފައިދާއެއް ޙާސިލް ކުރުމުގެ މަސައްކަތެވެ. ނުވަތަ ސިޔާސީ ގޮތުން ޚިޔާލު ތަފާތުވާ މީހަކަށް މަލާމާތެއް ނުވަތަ ފުރައްސާރައެއް ކޮށްލެވޭތޯ ބަލައެވެ.
ނަމަވެސް ވިއްސާރައިގެ ސަބަބުން ފެންބޮޑުވެފައިވާ އައްޑޫ ސިޓީ ފޭދޫއަށް ބަލާލުމުން ފެންނަނީ ވަރަށް ތަފާތު މަންޒަރުތަކެކެވެ. ސިޔާސީ ގޮތުން ތަފާތު ޕާޓީތަކަށް ނިސްބަތްވާ މީހުން އެއް ރޫޙެއްގައި މަސައްކަތް ކުރަމުން ދަނީ، ރަށުގެ އެކި ހިސާބުތަކުގައި ހެދިފައިވާ ފެންގަނޑުތައް ހިންދުމުގެ މަސައްކަތެވެ. އެގޮތުން ފޭދޫގެ ކޮންމެ ހިސާބަކަށް ބަލާލިއަސް ފެންނަނީ، އެމްއާރްޑީސީގެ މުވައްޒަފުންނާއި، އެމްއެންޑީއެފް އަދި ފުލުހުންގެ ބޭފުޅުންނާއި އެކު ފޭދޫގެ ޒުވާނުން ހަރަކާތްތެރިވަމުންދާ މަންޒަރެވެ.
'އައްޑޫލައިވް' އާއި ވާހަކަ ދެއްކި އެމްއާރްޑީސީގެ އޮފިޝަލަކު ބުނި ގޮތުގައި، ފޭދޫގެ ރައްޔިތުން ދައްކަމުން ގެންދާ އެއްބައިވަންތަކަމަކީ، އައްޑޫގެ ހުރިހާ ރައްޔިތުން ވެސް ނަމޫނާއެއްގެ ގޮތުގައި ބަލައިގަންނަން ޖެހޭ ކަމެއް ކަމަށެވެ.
" އަޅުގަނޑުމެން ގޮސް ކާނުތައް ސާފުކުރުމުގެ މަސައްކަތް ފެށުމާއި އެކު އެމީހުން އަމިއްލައަށް އައިސް އެހީވާން ފެށީ. މިއީ އައްޑޫ އިން ވަރަށް ނުފެންނަ މަންޒަރެއް. އެ ޒުވާނުންނަށް ތައުރީފް ޙައްޤޫ"
ބައެއް ގެތަކުގައި ފެން ހިއްކުމުގެ މަސައްކަތް ކުރާނެ ފިރިހެނުން ނެތުމުގެ ސަބަބުން ދަތިތަކާއި ކުރިމަތިވެފައިވާއިރު، އެ ގެތަކަށް ވެސް ޒުވާނުން ގެންދަނީ އެހީތެރިކަން ފޯރުކޮށްދެމުންނެވެ. ކާނު ތައް ސާފުކޮށް ރަށުގެ އެކި ސަރަހައްދުތަކުގައި ފެން ޕަންޕު ބަހައްޓައިގެން ފެން ހިއްކުމުގެ މަސައްކަތުގައި ވެސް ފެންނަމުން ދަނީ ޒުވާނުންނެވެ.
" މިއަދަކީ ފޭދޫ ޑޭ. މިއަދު ހުރިހާ ޕާޓީތަކެއްގެ ފިކުރުގައި ސިލު ޖަހައިފިން. މިއީ އެކަކު އަނެކަކަށް އެހީތެރިވާންވީ ވަގުތު" ފެން ހިއްކުމުގެ މަސައްކަތް ކުރަމުން ދިޔަ ޒުވާނަކު ބުންޏެވެ.
އިޖްތިމާޢީ ގޮތުން ފަރުދުންގެ މެދުގައި އޮންނަން ޖެހޭ ގުޅުން ހީނަރުވެފައިވަނިކޮށް، މިއަދު އައްޑޫ ސިޓީ ފޭދޫ ޒުވާނުންގެ ފަރާތުން ފެންނަމުންދާ އެއްބައިވަންތަކަމަކީ އޭގެ ސަބަބުން ފެންބޮޑުވުމުގެ ސަބަބުން ގެއްލުން ލިބުނު އާއިލާތަކުގެ މީހުންނަށް ވެސް ކޮންމެވެސް ވަރެއްގެ ހިނިތުންވުމެއް ގެންސްދޭނެ ކަމެއް ކަން ޔަޤީނެވެ.
