ކުރީގެ ޑިފެންސް މިނިސްޓަރު މުހައްމަދު ނާޒިމް ޖަލަށްލި މައްސަލައިގެ އިސްތިއުނާފް ޝަރީއަތް ގިނަ ދުވަސްތަކަކަށް ފަހު މިއަދު ބާއްވަން ހައި ކޯޓުން ނިންމައިފި އެވެ.
ހަނގުރާމަވެރި ހަތިޔާރު ގެންގުޅުމުގެ ކުށުގައި ނާޒިމް 11 އަހަރަށް ޖަލަށްލާން ކްރިމިނަލް ކޯޓުން ކުރި ހުކުމް އޭނާގެ ފަރާތުން އިސްތިއުނާފް ކުރުމުން އެ މައްސަލައިގެ އަޑުއެހުމެއް އެންމެ ފަހުން ހައި ކޯޓުން ބޭއްވީ މިދިޔަ ޖޫން މަހުގެ 22 ވަނަ ދުވަހުއެވެ.
މާދަމާ އެ މައްސަލާގެ އަޑުއެހުމެއް ބާއްވަން ތާވަލްކޮށްފައިވާއިރު މިދިޔަ ހަފުތާގައި ވެސް އެ މައްސަލާގެ އަޑުއެހުމެއް ބާއްވަން ހައި ކޯޓުން ހަމަޖެއްސި އެވެ. އެކަމަކު ނާޒިމްގެ ވަކީލުން އެދިގެން އެ އަޑުއެހުން ފަސްކުރީ އެވެ.
އާންމު ގޮތެއްގައި ކޯޓުތަކުން އަމަލުކުރާ އުސޫލުން، ޑިސެމްބަރު މަހު ހައި ކޯޓު ރިސެސް އަށް ދާނެ އެވެ. ނަމަވެސް ނާޒިމްގެ މައްސަލަ މި ބާއްވަނީ ސުޕްރީމް ކޯޓުގެ އެންގުމަށް، އެއްވެސް ކޯޓެއް ރިސެސް އަށް ނުދާން އެންގުމާ އެކު އާންމު އުސޫލުން މައްސަލަތައް ކުރިއަށް ގެންދާ ވަގުތެއްގަ އެވެ.
ނާޒިމްގެ މައްސަލަ ހައި ކޯޓުގައި ކުރިން ބަލަމުންދިޔަ ފަސް ފަނޑިޔާރުންގެ ބެންޗުގައި ހިމެނޭ ދެ ފަނޑިޔާރަކު އެ ބެންޗުން މިހާރު ވަނީ ވަކިވެފަ އެވެ. އެ ބެންޗުގެ ރިޔާސަތު ބެލެހެއްޓެވި ފަނޑިޔާރު އަބްދުލްޣަނީ މުހައްމަދު ދެކުނު ގޮއްޕަށް ބަދަލުކޮށްފައިވާ އެ ބެންޗުގައި ދެން ހިމެނުނު ފަނޑިޔާރު އައްބާސް ޝަރީފް ވަނީ އަމިއްލަފުޅަށް ފަނޑިޔާރުކަމުން ރިޓަޔާވެ ވަޑައިގެންފަ އެވެ.
ފަނޑިޔާރު ޣަނީ އާއި ފަނޑިޔާރު އައްބާސް ނެތުމުން އެ މައްސަލަ ބެލި ބެންޗުގައި ދެން ތިއްބަވާނީ ފަނޑިޔާރު އަބްދުއްރައޫފް އިބްރާހިމާއި ފަނޑިޔާރު އަބްދުﷲ ހަމީދުގެ އިތުރުން ފަނޑިޔާރު އަލީ ސަމީރެވެ.