އައްޑޫގައި 100 އެނދުގެ ހޮސްޕިޓަލެއް އަޅާނެ ވާހަކަ ސަރުކާރުތަކުން ދައްކަމުން ގެންދާތާ 14 އަހަރަށް ވުރެ ގިނަ ދުވަސް ވެއްޖެއެވެ. އެހެން ނަމަވެސް މިހާތަނަށް، ހޮސްޕިޓަލް އެޅުމުގެ އަމަލީ އެއްވެސް މަސައްކަތެއް ފެށިފައެއް ނުވެއެވެ. ދޭތެރެއަކުން ހޮސްޕިޓަލް އަޅަން ހަމަޖައްސާފައިވާކަމަށް ބުނާ ބިމެއް ސާފުކޮށްލަނީ އެވެ. ނުވަތަ ސަރުކާރުގެ އިސްވެރިން އައްޑޫއަށް އައިސް، އެ ބިމަށް ބަލަހައްޓައިގެން ހުރެފައި ދަނީއެވެ.
މިސަރުކާރުން ވެރިކަމަށް އައީ ފާއިތުވި 3 ސަރުކާރަށް ނޭޅުނު ހޮސްޕިޓަލް އަޅާނެ ކަމުގެ ޔަޤީންކަން ދެމުންނެވެ. ޚުދު ރައީސް ޔާމީން އަމިއްލަފުޅަށް، އައްޑޫ ހޮސްޕިޓަލުގެ މަސައްކަތް 2014 ވަނަ އަހަރު ނިމުމުގެ ކުރިން ފަށާނެ ކަމަށް ވަނީ ވިދާޅުވެފައެވެ.2014 ވަނަ އަހަރު ނިމި 2015 ވަނަ އަހަރުވެސް ނިމެނީއެވެ. އައްޑޫގައި ހޮސްޕިޓަލެއް އަޅާކަށް ނުފަށައެވެ. ހޮސްޕިޓަލް އައްޑޫގައި އެޅިދާނެ ކަމަށް އައްޑޫގެ ރައްޔިތުން ކުރަމުން އައި އުއްމީދުތައް ވިއްސިވިހާލިވާން ފަށައިފިއެވެ.
އެންމެ ފުރަތަމަ ލިބުނު ޚަބަރަކީ، އައްޑޫގައި އަޅާ 100 އެނދުގެ ހޮސްޕިޓަލުގެ ބީލަން ދެވަނަ ފަހަރަށް ބާތިލްކޮށް، އެ މަސައްކަތް މަޑުޖައްސާލަން ފިނޭންސް މިނިސްޓްރީ އިން ނިންމި ޚަބަރެވެ. އެއީ ކީއްވެގެންކަން ސަރުކާރުގެ އެއްވެސް އިދާރާއަކުން ހާމަކޮށްފައެއް ނުވެއެވެ.ފޭދޫ ދާއިރާގެ މެންބަރު އިބްރާހިމް ދީދީ(އައިބީ) އަކަށް ވެސް އަދި ހުޅުދޫ ދާއިރާގެ މެންބަރު މުހައްމަދު ޝާހިދު(ޝާޑު) އަކަށް ވެސް އެއީ ކީއްވެގެން ކަމެއް "ނޭނގެ"އެވެ. އެނގޭހާ ވެސް ކަމަކީ، އެބޭފުޅުން ވެސް ތިބީ ވަރަށް ބޮޑަށް މާޔޫސްވެފައިކަމެވެ. އެހެން ފަހަރުތަކުގައި އައްޑޫގެ އާ ހޮސްޕިޓަލާއި ބެހޭގޮތުން ވާހަކަ ދެއްކުމުގައި އެބޭފުޅުންގެ ހުންނަ ޖޯޝާއި ފޯރިއެއް މިފަހަރަކު ފެނިވަޑައެއް ނުގަންނަވައެވެ.
ރޭ މާލޭގައި ބޭއްވި ހަފްލާއެއްގައި ރައީސް ޔާމީން ވަނީ، އައިޖީއެމްއެޗްގައި 25 ބުރީގެ އިމާރާތެއް އަޅައި، ދެ އަހަރު ތެރޭ ނިންމާލެވޭނެ ކަމުގެ ޔަޤީންކަން ދެއްވާފައެވެ. އައްޑޫ ރައްޔިތުން އުފެއްދި ސުވާލަކީ، 2 އަހަރު ތެރޭގައި ރާއްޖޭގައި ދޭން ބޭނުންވާ ހުރިހާ ސިއްހީ ފަރުވާއެއް ލިބިގެންދާނެ 25 ބުރީގެ އިމާރާތެއް އަޅައި ނިންމާލެވޭ ސަރުކާރަކަށް އެންމެ 100 އެނދުގެ ހޮސްޕިޓަލެއް 2 އަހަރު ތެރޭގައި ނޭޅުމަކީ ނުވަތަ އެ މަސައްކަތް ފަށައި ނުގަނެވުނީ ކީއްވެގެން ތޯއެވެ ؟
ސިޔާސީ މީހުންނަކީ އެއް މާނައަށް ވުރެ ގިނަ މާނަ ދޭހަވާ ގޮތަށް ވާހަކަ ދައްކަވާ ބޭފުޅުންނެވެ. ރައްޔިތުންނަށް ޖެހޭނީ އަމިއްލައަށް އޭގެ މާނަ ހޯދާށެވެ.
ރައީސް ޔާމީންގެ ސަރުކާރަށް 2 އަހަރު ވެއްޖެއެވެ. އައްޑޫގައި އަޅަން ބުނި 100 އެނދުގެ ހޮސްޕިޓަލުގެ އަމަލީ އެއްވެސް މަސައްކަތެއް ނުފަށައެވެ. 25 ބުރީގެ ޢިމާރާތަކަށް ވުރެ 100 އެނދުގެ ހޮސްޕިޓަލް އެޅުމަކީ މާ ޚަރަދު ކުޑަކަމެކެވެ. އެކަމަށް ބޭނުންވާ ލޯނު ވެސް ވަނީ މީގެ 4 އަހަރު ކުރިން ހަމަޖެހިފައެވެ. ލޯނުގެ ގްރޭސް ޕީރިއަޑް ވެސް ހަމަވާން ބާކީ އޮތީ އެންމެ އަހަރެކެވެ.
އެހެން ކަމުން ރައީސް ޔާމީން އެވިދާޅުވީ ތިމަން މަނިކުފާނުގެ ސަރުކާރުގައި އައްޑޫގައި ހޮސްޕިޓަލް ނޭޅީ ކަމަށް ހެއްޔެވެ؟ ފަހަރެއްގައި އެއީ އެމަނިކުފާނު ނުސީދާ ގޮތެއްގައި އައްޑޫގެ ރައްޔިތުންނަށް ދެއްވި ޖަވާބެއް ކަމަށް ވެދާނެއެވެ. ނުވަތަ އެއީ އެމަނިކުފާނު ވިދާޅުވާ ފަދަ ފަލްސަފާއަކަށް ވެސް ވެދާނެއެވެ.