އެޗްއައީވީ ފެތުރި ދާނެ ފަދަ އާކާދަ ތަކާ ބެހޭ ގޮތުން މީހުންނަށް މައުލޫމާތު ދީ އެކަމަށް މީހުން ހޭލުންތެރި ކުރުމަށް އައްޑޫގައި 20 ޒުވާނަކު ތަމްރީންކޮށްފި އެވެ.
ޔުނިސެފާއި ހިތަދޫ ރީޖަނަލް ހޮސްޕިޓަލް (އެޗްއާރްއެޗް) ގުޅިގެން ނޮވެމްބަރު 29 އިން މި މަހުގެ 3 އަށް ކުރިއަށް ގެންދިޔަ ތަމްރީން ޕްރޮގްރާމް ކުރިއަށް ގެންގޮސްފައިވަނީ އައްޑޫ ސިޓީ ކައުންސިލް އިދާރާގެ ހޯލުގައެވެ.މި ޕްރޮގްރާމުގައި ކިޔަވައި ދެއްވާފައި ވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ނެޝަނަލް ޑްެރަގް އެޖެންސީ (އެންޑީއޭ) ގެ ބޭފުޅުންނެވެ
'އައްޑޫލައިވް' އަށް މައުލޫމާތު ލިބިފައިވާ ގޮތުގައި މި ތަމްރީނަށް ފަހު މި ޒުވާނުން މުޖުތަމައުގައި އަދާކުރާނީ އެމްބެސެޑަރުންގެ ރޯލެވެ. އެގޮތުން މަސްތުވާތަކެތި ބޭނުންކުރާ މީހުންނަށް އޭގެ ސަބަބުން ދިމާވެ ދާނެ މައްސަލަތައް ބުނެދީ އެކަމުން އެމީހުން ދުރުކުރުމަށް މަސައްކަތް ކުރާނެ އެވެ. އަދި އެއް ސިރިންޖެއް އެތައްބަޔަކު ބޭނުން ކޮށްގެން މަސްތުވާތަކެތި އިންޖެކްޓް ކުރުމުން ދިމާވެދާނެ ސިއްހީ މައްސަލަތައް ވެސް އޮޅުން ފިލުވައިދޭނެއެވެ.
މީގެ އިތުރުން އެފަދަ ހާލަތްތަކުގައި އެފަދަ މީހުންނަށް ބޭނުންވާ އެހީތެރިކަން ކަމާބެހޭ ފަރާތްތައް މެދުވެރިކޮށް ހޯދައިދިނުމާއި އެފަރާތްތައް ހޮސްޕިޓަލް ތަކާއި ސިއްހީ މަރުކަޒުތަކަށް ގެންގޮސް ސިއްރުން، ހިލޭ ޓެސްޓް ހަދައިދިނުމާއި، ކައުންސިލިން ދިނުމަށް ވެސް ތަމްރީން ޕްރޮގްރާމް ފުރިހަމަ ކުރި ފަރާތްތަކުން ހަރަކާތްތެރިވާނެއެވެ.
މި ތަމްރީން ނިންމައި ބައިވެރިންނަށް ހަނދާނީ ލިޔުން ދިނުމުގެ ރަސްމިއްޔާތު ޝަރަފްވެރިކޮށްދެއްވީ އައްޑޫސިޓީގެ މޭޔަރު އަބްދުﷲ ސާދިގު (ސޯބެ) އެވެ.
އެ ރަސްމިއްޔާތުގައި ވާހަކަދައްކަވަމުން ސޯބެ ވިދާޅުވީ ދުނިޔޭގެ އޭޑުސް ދުވަހު ނެރެފައިވާ ރިޕޯޓުގައި ވަނީ ރާއްޖޭގައި އެޗުއައިވީ ފެތުރިދޭނެ ފަދަ އާދަކާދަތައް ބައެއް ދިވެހިންގެ ދިރިއުޅުމުގައި އެބަހުރި ކަމަށެވެ. އެއީ ކަންބޮޑުވާ ކަމެއް ކަމަށެވެ. އެ ރިޕޯޓަށްފަހު މިފަދަ ކުދިން ތަކެއް ތަމްރީން ވެގެން މުޖުތަމައަށް ނުކުމެ މީހުންނަށް މައުލޫމާތުދީ އެފަދަ އާދަކާދަ ތަކުން މީހުން ސަލާމަތް ކުރުމަށް މަސައްކަތް ފެށުމަކީ ލިބިގެންދިޔަ ހިތްހަމަ ޖެހުމެއް ކަމަށެވެ.
“ތިޔަ ކުދިންގެ މަސައްކަތުން އެންމެ މީހަކު ސަލާމަތް ކުރެވުނަސް އެއީވަރަށް ބޮޑުވަރު. ތަމްރީނަށް ފަހު ސެޓްފިކެޓް ލިބިއްޖެ. ދެން އޮތީ ތިޔަކުދިންގެ އަސްލު މަސައްކަތް. އެކަން ވީހައިވެސް ރަނގަޅަށް ކޮށްދިނުމަށް އެދެން،” ސޯބެ ވިދާޅުވިއެވެ.