ސ. އިސްމެހެލާހެރަ ތަރައްގީ ކުރުމަށް ދެ ފަރާތަކުން ޝައުގުވެރިކަން ފާޅުކޮށްފައިވާ ކަމަށް ޓޫރިޒަމް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި މިނިސްޓަރ ޒަމީރު މިހާރު އައްޑު އަށް ކުރައްވަމުން ގެންދަވާ ދަތުރުގައި އޭގެ ތެރެއިން އެއް ފަރާތަކުން ބައިވެރިވެ އެވެ. އަދި އިސްމެހެލެހެރަ ތަރައްގީ ކުރާނެ ގޮތުގެ ކޮންސެޕްޓް ކަރުދާހެއް ވެސް މިއަދު އެ ކުންފުނިން ދެއްކި ކަމަށް މިނިސްޓަރު ޒަމީރު އާއި ހަވާލާދީ ބައެއް މީޑިއާތަކުން ވަނީ ރިޕޯޓްކޮށްފައެވެ.
"އެ ކުންފުނިން ވަރަށް ބޮޑަށް ޝައުގުވެރިވޭ. އިރާދަކުރެއްވިއްޔާ އާދިއްތަދުވަހު އަޅުގަނޑުމެންނަށް މިކަން ފައިނަލައިޒް ކުރެވޭނެ. އޭގެ ފަހުން ކޮންޓްރެކްޓްގައި ސޮއިކުރެވުނީމާ، އެމީހުން ވަރަށް ޔަގީންކަން ދޭ އަންނަ ޖެނުއަރީގައި، އިސްމެހެލާހެރަ މަޝްރޫއު މޮބިލައިޒް ކުރާނެ ކަމަށް،" ރިސޯޓެއްގެ ގޮތުގައި ތަރައްގީކުރާ ރަށާ ގުޅޭ ގޮތުން ޒަމީރު ވިދާޅުވި އެވެ.
މައުލޫމާތު ލިބިފައިވާ ގޮތުގައި ސ.އިސްމެހެލާހެރަ ތަރައްގީ ކުރަން ޝައުގުވެރިކަން ފާޅުކުރީ ދިވެހި ކުންފުންޏަކާއި ބޭރުގެ ކުންފުންޏަކުންނެވެ. ނަމަވެސް އަދި އެއީ ކޮން ކުންފުނިތަކެއް ކަމެއް މިނިސްޓްރީގެ ފަރާތުން ހާމަކޮށްފައެއް ނުވެއެވެ.
މީދުއާ ޖެހިގެން އޮންނަ އިސްމެހެލާހެރަ ތަރައްގީ ކުރުމުގެ މަޝްރޫއު ރައީސް އަބްދުﷲ ޔާމީން އިއުލާން ކޮށްދެއްވީ މި އަހަރުގެ އޭޕްރީލް 28ގަ އެވެ. އެ ރަށް ތަރައްގީ ކުރަނީ 600 އެނދުގެ ރިސޯޓެއްގެ ގޮތުގަ އެވެ. އެއީ 300 ކޮޓަރި އެވެ.ސަރުކާރުން ކުރިން ބުނެފައި ވަނީ އިސްމެހެލާހެރައިގެ ސަަބަބުން އައްޑޫގައި އިތުރު 1،800 ވަޒީފާ އުފެދޭނެ ކަމަށެވެ.