އައްޑޫ އަށް ނިސްބަތްވާ ކޮންމެ ރައްޔިތެއްގެ ވެސް ޝަކުވާއަކީ، އައްޑޫގައި ވަޒީފާގެ ފުރުސަތުތައް ނެތް ވާހަކައެވެ. ވަޒީފާގެ ފުރުސަތު އުފެއްދުމަށްޓަކައި އައްޑޫގައި ޓޫރިޒަމްގެ ސިނާއަތު ފުޅާކުރާނެ ވާހަކަ ސަރުކާރު ތަކުން އަބަދުވެސް ދައްކައެވެ. ނަމަވެސް އެއީ ހުސް ވާހަކަތަކެވެ. ނުވަތަ އިންތިޚާބުތަކާއި ދިމާކޮށް ސިޔާސީ ބޭފުޅުން ވެވަޑައިގަންނަވާ، ވަޢުދު ލިސްޓުގައި ކޮންމެހެން ވެސް ހިމަަނަން ޖެހޭ ކަމެކެވެ.
އައްޑޫގައި ހުޅުވި ފުރަތަމަ ރިސޯޓް ކަމުގައިވާ ޝަންގްރިއްލާ ރިސޯޓާއި ހެރެތެރެ ރިސޯޓް ހުޅުވުމަށް ގިނަ ދުވަސްތަކެއް ނެގިއިރު އިތުރު ރިސޯޓްތަކެއް ތަރައްޤީކުރުމަށް ވެސް ގިނަ ދުވަސްތަކެއް ނަގާނެ ކަމަށް ގިނަ ބަޔަކު ޤަބޫލްކުރެއެވެ. ސަބަބުތަކެއް ނެތިއެއް ވެސް ނޫނެވެ. ސ.ހަންކެޑެ އަދި އިސްމެހެލާ ހެރައިގައި ރިސޯޓްތަކެއް ޤާއިމްކުރާ ވާހަކަ ސަރުކާރުތަކުން ދެއްކި ނަމަވެސް އެ މަސައްކަތް ނުފެށި ގިނަ ދުވަސްތަކެއް މިވަނީ ފާއިތުވެގެން ގޮސްފައެވެ.
އައްޑޫގައި ޓޫރިޒަމްގެ ސިނާއަތު ފުޅާކޮށް ވަޒީފާގެ ފުރުސަތު އިތުރު ކުރުމަކީ، މިހާރުގެ ސަރުކާރުން ވެސް އައްޑޫގެ ރައްޔިތުންނަށް ވި ވަޢުދެކެވެ. އެގޮތުން ފާއިތުވި އެޕްރީލް މަހުގެ ތެރޭގައި ސަރުކާރުން ވަނީ ސ.އިސްމެހެލާ ހެރައިގައި ރިސޯޓެއް ތަރައްޤީ ކުރުމުގެ ޕްލޭނެއް ހާމަކޮށްފައެވެ. އިސްމެހެލާހެރައިގައި 600 ކޮޓަރީގެ ރިސޯޓެއް ތަރައްގީކުރުން އިފުތިތާހުކުރަން ބޭއްވި ޖަލްސާގައި އޭރުގެ ޓޫރިޒަމް މިނިސްޓަރު އަހުމަދު އަދީބް ވިދާޅުވެފައިވަނީ އެ މަޝްރޫއުގެ އަމަލީ މަސައްކަތްތައް ލަސްތަކެއް ނުވެ ފެށޭނެ ކަމަށެވެ.
އެފަހުން 7 މަސް ދުވަސް ފާއިތުވެގެން ދިޔައިރު ސަރުކާރުން އެމަޝަރޫޢުގެ ވާހަކައެއް ނުވެސް ދައްކައެވެ. އަނެއްކާވެސް އިސްމެހެލާ ހެރައިގެ ވާހަކަ އަދި ހަންކެޑެގައި ރިސޯޓް ތަރައްޤީ ކުރާ ވާހަކަ މިވަނީ ދެކެވެން ފަށާފައެވެ. މިފަހަރު ޓޫރިޒަމް މިނިސްޓަރ މޫސާ ޒަމީރު އައްޑޫއަށް ވަޑައިގެންނެވުމާއި ގުޅިގެންނެވެ. މިފަހަރު ވެސް އައްޑޫ ރައްޔިތުން ކުރާ ސުވާލަކީ އަނެއްކާވެސް އައްޑޫގެ ރައްޔިތުންނަށް އިތުރު ހުވަފެންތަކެއް ދައްކަވަނީ ބާއެވެ.
މިނިސްޓަރު ޒަމީރުގެ ދަތުރުފުޅާއި ގުޅިގެން ހާމަކުރެއްވި އެއް ކަމަކީ، އިސްމެހެލާ ހެރައިގެ ޕްރޮޖެކްޓަށް 2 ފަރާތަކުން ޝައުޤުވެރިކަން ފާޅުކޮށްފައިވާ ވާހަކައެވެ. އަދި މިނިސްޓަރާއި އެކު އެ މަޝްރޫޢުއަށް ޝައުގުވެރިކަން ފާޅުކުރި އެއް ފަރާތަކުން ވަނީ އިސްމެހެލާ ހެރައަށް ގޮސްފައެވެ. ޖެނުއަރީ ހިސާބުގައި އިސްމެހެލާ ހެރަ ރިސޯޓުގެ އަމަލީ މަސައްކަތް ފެށޭނެ ކަމުގެ ޔަޤީންކަން މިނިސްޓަރަށް އެބަ އޮތެވެ. އެހެން ކަމަށް ވާނަމަ އެއީ އުފާވެރި ޚަބަރެކެވެ.
"އެ ކުންފުނިން ވަރަށް ބޮޑަށް ޝައުގުވެރިވޭ. އިރާދަކުރެއްވިއްޔާ އާދިއްތަދުވަހު އަޅުގަނޑުމެންނަށް މިކަން ފައިނަލައިޒް ކުރެވޭނެ. އޭގެ ފަހުން ކޮންޓްރެކްޓްގައި ސޮއިކުރެވުނީމާ، އެމީހުން ވަރަށް ޔަގީންކަން ދޭ އަންނަ ޖެނުއަރީގައި، އިސްމެހެލާހެރަ މަޝްރޫއު މޮބިލައިޒް ކުރާނެ ކަމަށް،" ރިސޯޓެއްގެ ގޮތުގައި ތަރައްގީކުރާ ރަށާ ގުޅޭ ގޮތުން ޒަމީރު ވިދާޅުވި އެވެ.
މިނިސްޓަރ ޒަމީރުގެ ދަތުރުފުޅުގައި އައްޑޫގައި ހިންގާ އީކުއޭޓާރ ވިލެޖަށް ވެސް ޒިޔާރަތްކޮށް އެތަނުގެ ކެޕޭސިޓީ އިތުރުކުރުމާއި ބެހޭ ގޮތުން ވަނީ ވާހަކަ ދައްކަވާފައެވެ. އަދި މީގެ އިތުރުން ސ.ހަންކެޑެ ރިސޯޓެއްގެ ގޮތުގައި ތަރައްޤީކުރުމަށް ހަވާލުކޮށްފައިވާ ފަރާތަށް އެކަން ނުކުރެވޭ ކޮންޓްރެކްޓް ބާތިލް ކުރުން ނަމަވެސް، ނޫނީ އޯނަޝިޕް ބަދަލުކުރުން ފަދަ ކަމެއް ކުރެވޭތޯ ބަލާނެ ކަމަށް މިނިސްޓަރ ވަނީ ވިދާޅުވެފައެވެ. މިއީ ވެސް އައްޑޫގެ ރައްޔިތުންނަށް އުއްމީދުތަކެއް ލިބިގެން ދިޔަ ވާހަކައަކަށް ވެގެން ދާނެއެވެ.
ގަމުގައި ހުރި ދޫގަސް އޮޕަރޭޓް ކުރަން ފެށުމަށާއި އަދި އިތުރު ސިޓީ ހޮޓަލެއް ގަމުގައި އެޅުމަށް ކޮންޓްރެކްޓަރަކާއި ވާހަކަ ދައްކަމުން ދާކަމަށް ވެސް މިނިސްޓަރ ވަނީ ހާމަކުރައްވާފައެވެ.
ކޮންމެ އަކަސް ޓޫރިޒަމް މިނިސްޓަރ ކަމާއި ހަވާލުވެވަޑައިގެންނެވިތާ ކުޑަ ދުވަސްކޮޅެއްގެ ތެރޭގައި މިނިސްޓަރ ޒަމީރް އައްޑޫއަށް ކުރެއްވި ޒިޔާރަތުގައި ވަނީ، އައްޑޫގެ ރައްޔިތުންނަށް އިތުރު ހުވަފެންތަކެއް ދައްކަވާފައެވެ. ނަމަވެސް އެފަދަ ހުވަފެންތަކަކީ އައްޑޫގެ ރައްޔިތުންނަށް އާ ހުވަފެންތަކެއް ވެސް ނޫނެވެ. މިނިސްޓަރު ޒަމީރުގެ އިޚްލާސްތެރިކަމާއި ހިންގުންތެރިކަން ހުރި ވަރެއް ކުރިއަށް އޮތް މަދު ދުވަސްކޮޅެއްގެ ތެރޭގައި ފެނިގެން ދާނެއެވެ.