ރަށުގައި ފެންބޮޑުވެ ފެން ހިއްކާނެ ގޮތެއް ނެތީއެވެ. ހާލުބޮޑު ބަލި މީހަކު ފުރުވާލަން ޖެހުނީއެވެ. ސްކޫލެއްގެ ނުވަތަ ދައުލަތުގެ އިމާރާތެއްގެ ފާރުގެ ކުލަ ބަދަލުކުރަން ވީއެވެ. ރަށުގެ ރައްޔިތުން އެދޭ ގޮތަށް ކަމެއް ކޮށްދޭން ވީއެވެ. ގުޅަން ޖެހެނީ މާލެ އަށެވެ. ޚާއްސަ ހުއްދައެއް އެކަމަށް ބޭނުންވެއެވެ. އެ ހުއްދަ އަކާއި ނުލައި އެކަން ކޮށްފިނަމަ އެއީ ވަރަށް ބޮޑު ކުށެކެވެ. މިއީ ކޮން އުސޫލެއް ހެއްޔެވެ؟
މިއީ މިނިވަންކަމަށް 50 އަހަރު ފުރިގެން އެކަމުގެ އުފާފާޅުކުރަމުންދާ ރާއްޖޭގެ ރައްޔިތުންގެ ތެރެއިން، އަތޮޅު ތެރޭގައި ދިރިއުޅެމުންދާ ރައްޔިތުންގެ އެންމެ ބޮޑު ކަންބޮޑުވުމެވެ. އާދޭސް ކުރަން ޖެހުމެވެ. މައި ސަރުކާރުން އަންގާ ގޮތެއްގެ މަތިން ނޫނީ އެމީހުންނަށް އެއްވެސް ކަމެއް ކުރެވެން ނެތީއެވެ. ބިން ހިއްކެން އޮތީ ވެސް މައި ސަރުކާރުން އެކަން ކޮށްދިން ދުވަހަކުންނެވެ.
ސަލާންޖެހުމުގެ ސިޔާސަތު ނިމުމަކަށް ގެނައުމަށް ބޭނުންވެފައި ތިބި ރައްޔިތުންގެ ކަންބޮޑުވުންތަކަށް ހައްލެއް ހޯދައިދިނުމުގެ ގޮތުން ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމަށް ކައުންސިލްތައް އުފެއްދިއެވެ. އެއާއި އެކު ގިނަ ދުވަސްތަކެއް ވަންދެން އަތޮޅު ވެރިއެއްގެ 'ބަންޑާރަ މުދަލުގެ" ގޮތުގައި ބެލެވިފައި އޮތް އަތޮޅުވެރިކަން ރައްޔިތުންނަށް ލިބިގެންދިޔައެވެ. އެމީހުން ބޭނުންވާ ބަޔަކު އަތޮޅު ނުވަތަ ރަށުގެ އިސްވެރިންގެ ގޮތުގައި އައްޔަން ކުރުމުގެ ފުރުސަތު ލިބިގެން ދިޔައެވެ.
ނަމަވެސް ވަކި ހިސާބަކުން އިވެން ފެށި އަޑަކީ ސަރުކާރާއި ކައުންސިލުން އެއްބަޔަކު އަނެއްބަޔަކަށް އެއްބާރުލުން ނުދޭ ވާހަކައެވެ. ކައުންސިލްތަކުން ތަރައްޤީއަށް ހުރަސް އަޅާ ކަމަށް ބުނެ، މިހާރުގެ ސަރުކާރުން ބޭނުންވީ، އެމްޑީޕީގެ މެޖޯރިޓީ އޮންނަ ސިޓީ ކައުންސިލްތަކުގެ ބާރުތައް އަތުލާށެވެ. ބާރުތައް އަތުލެވުނީ އެމްޑީޕީގެ އަތުންނެއް ނޫނެވެ. ރައްޔިތުންގެ އަތުންނެވެ. ބިކަވެގެން ދިޔައީ އެމްޑީޕީއެއް ނޫނެވެ. އާންމު ރައްޔިތުންނެވެ.
މާލޭ ސިޓީ ކައުންސިލުން ދޭ ޚިދުމަތްތައް ހައުސިން މިނިސްޓްރީގެ ދަށަށް ބަދަލުކުރުމުން އޭގެ އަސަރު މާލޭގެ ރައްޔިތުންނަށް ނުކުރި ނަމަވެސް، އައްޑޫ ސިޓީ ކައުންސިލްގެ ބާރުތައް ހައުސިން މިނިސްޓްރީގެ ބެލުމުގެ ދަަށަށް ގެންދިއުމަކީ އެދެވޭ ބަދަލެއްތޯ ސުވާލު އުފެދެއެވެ. އައްޑޫގައި ހައުސިން މިނިސްޓްރީގެ ޑިޕާޓްމެންޓެއް ހުއްޓަސް އެތަނުން ނިންމާ ހުރިހާ ނިންމުމަކީ، މާލެއަށް ގުޅައިގެން ދެތިން ހަތަރު ދުވަހުން ނިންމޭ ނިންމުން ތަކެވެ.
އައްޑޫއަށް އަނެއްކާވެސް އަތޮޅުވެރިންނާއި ކަތީބުންގެ ޒަމާން މިއޮތީ އައިސްފައެވެ. ސަރުކާރުގެ ފައިބުޑަށް ވެއްޓި އާދޭސް ކުރަން މިވަނީ ޖެހިފައެވެ. މިފަހަރު އައްޑޫއަށް އައީ ޒަމާނީ އަތޮޅުވެރިންނާއި ކަތީބުންނެވެ. ތަފާތަކީ ކޯޑިނޭޓަރުން ފަދަ މޮޅެތި ނަންތައް ކިޔާ ކަމެވެ. އެމީހުންނަކީ، މާލޭ ސަރުކާރުގެ އޯޑަރު ތަންފީޒުކުރަން ތިބޭ ބަޔެކެވެ.
ރައްޔިތުންގެ ކަންބޮޑުވުންތައް ހިއްސާކުރަން އެއިން މީހެއްގެ ފައިންޕުޅު ފެންނާނެ ގޮތެއް ނޯވެއެވެ. އެއީ ބޭފުޅުންނެވެ. ގުޅަން ޖެހެނީ ވަކި ގަޑިތަކެއްގައެވެ. ސަރުކާރުގެ ރަސްމީ ދުވަހެއް ވިޔަސް އެބޭފުޅުން އޮފީހަށް ވަޑައިގަންނަވުން އޮންނަނީ އިޚްތިޔާރީ ކަމެއްގެ ގޮތުގައެވެ. ބޭފުޅުންގެ ސޮއި ނުލިބިގެން ޚިދުމަތް ހޯދަން ގޮސް ހުންނަ ރައްޔިތުމީހާ ޖެހެނީ އެމީހުންގެ އިންތިޒާރުގައި މުޅި ދުވަސް އެ އޮފީހެއްގައި ހޭދަކުރާށެވެ.
ވިއްސާރައިގައި ހާލުގައި ޖެހޭ މީހުންނަށް އެހީވާން ވިޔަސް ޖެހެނީ މާލޭގައި ހުންނަ އޮފީހަކުން އަންގާ ގޮތަށް " ކޮންމެ މީހަކަށް ދުވާލަކަށް 6 ސަމްސާ ހަކުރު" އަދި އެމީހުން ބުނާ މިންވަރަކަށް ޚަރަދު ކުރާށެވެ. ފެންބޮޑުވެ ގެއްލުން ލިބޭ ފަރާތްތަކަށް އެހީތެރިވާނެ ގޮތެއް ނިންމެނީ ވެސް މާލޭގައި ތިއްބަވާ ބޭފުޅުން ހުއްދަ ދެއްވީމައެވެ.
މިއީ ކޮން އުސޫލެއް ހެއްޔެވެ؟ ލާމަރުކަޒީ ނިޒާމުގެ ބާރު ކަނޑުވާލައިގެން ސަރުކާރުން ކުރަމުން ގެންދާ ކަމަކީ ރައްޔިތުން އަޅުވެތިކޮށް އެމީހުން ލައްވައި އާދޭސްކުރުވުން ނޫން ކޮންކަމެއްތޯއެވެ. ކައުންސިލްތަކުން ޒިންމާ އަދާނުކުރުމަކީ ރައްޔިތުން ލައްވައި އާދޭސް ކުރުވުމުގެ ސިޔާސަތު މެކުހަށް ޖެހުމަށް އޮތް ހުއްޖަތެއް ވެސް ނޫނެވެ.