އާބާދީގައި 30،000 އެއްހާ މީހުން ހިމެނޭ އައްޑޫ ސިޓީގެ ރައްޔިތުންނަށް ސިއްޙީ ޚިދުމަތް ހޯދަންދާ ހިތަދޫ ރީޖަނަލް ހޮސްޕިޓަލުން ހުންބަލާ ކަށިގަނޑެއް ނުފެނިގެން ބައިގަޑި އިރު ވަންދެން އެތަނުގެ މުވައްޒަފުން ދެކޮޅަށް ދުވަން ޖެހިދާނެ ކަމަށް ޤަބޫލުކުރެވޭ ހެއްޔެވެ؟
ޤަބޫލު ނުކުރެވުނަސް، އެކަން ވަނީ ހިނގާފައެވެ. މީދެ ދެ ދުވަސް ކުރިން ހިތަދޫ ރީޖަނަލް ހޮސްޕިޓަލަށް، ތުއްތު ދަރިފުޅު ޑޮކްޓަރަށް ދައްކަން ދިޔަ އަންހެނަކު ވަނީ އޭނާގެ ތަޖުރިބާ 'އައްޑޫލައިވް' އާއި ހިއްސާކޮށްފައެވެ.
'އައްޑޫލައިވް' އާއި ވާހަކަ ދައްކަމުން އާމިނަތު ދީދީ ބުނި ގޮތުގައި އޭނާ ހޮސްޕިޓަލަށް ދިޔައީ ދަރިފުޅު ވަރަށް ގަދައަށް ހުން އައިސްގެން ކަމަށާއި، އަވަސް ފަރުވާދޭ ކޮޓަރިއަށް ގޮސްގެން ވެސް ޑޮކްޓަރެއް އަންނަންދެން އެތައް އިރެއް ވަންދެން އިންތިޒާރުކުރަން ޖެހުނު ކަމަށެވެ.
ހިތަދޫ ރީޖަނަލް ހޮސްޕިޓަލުގައި އާންމު ގޮތެއްގައި ޢަމަލު ކުރާ އުސޫލުން އަވަސް ފަރުވާދޭ ކޮޓަރީގައި ޑިއުޓީއަށް ވަކި ޑޮކްޓަރަކު ހުރެއެވެ. ނަމަވެސް ބައެއް ފަހަރު ޑޮކްޓަރުންގެ ޑިއުޓީ ހުންނަ ގޮތުން އަވަސް ފަރުވާދޭ ކޮޓަރީގައި ވެސް ހުންނަނީ އޯޕީޑީ ޑިއުޓީގައި ހުންނަވާ ޑޮކްޓަރެވެ.
" އިމަޖެންސީ ރޫމްގައި 15 މިނިޓް ވީއިރުވެސް ޑޮކްޓަރު ނާދޭ، ދެން އަހަރެން ކައުންޓަރަށް ގޮސް މައްސަލަ ޖައްސަން ފެށީމަ ގޮސް ވައްދައިފި ކޮންސަލްޓޭޝަން ރޫމަކަށް. އެތަނަށް ވެއްދުމަށް ފަހު ވެސް ނަރުހުން ދެކޮޅަށް ދުވަނީ ވެގެން އުޅޭ ގޮތެއް ނުބުނޭ"
އާމިނަތު ދީދީ ބުނި ގޮތުގައި ވެގެން އުޅޭ ގޮތެއް ނޭނގިގެން މައްސަލަ ޖެއްސުމުން، ހުންބަލާ ކަށިގަނޑު ގެންނަން ދެން މަޑުކުރަނީ ކަމަށް ނަރުހަކު އޭނާ ގާތުގައި ބުނި ކަމަށެވެ.
ކުޑަކުދިންގެ ޑޮކްޓަރަށް ދައްކަން ދަރިފުޅު ގޮވައިގެން ދިޔަ ދެމަފިރިއެއްގެ ތަޖުރިބާއެވެ. ދަރިފުޅު ފެނުމާއި އެކު ޑޮކްޓަރ ލިޔެދިނީ ބޭސް ސިޓީއެކެވެ. އޮބްޒާވް ކުރުމެއް ވެސް ނެތިއެވެ. މައްސަލަ ޖެއްސުމުން ޑޮކްޓަރުގެ ޖަވާބަކަށް ވީ، "ތީ އާންމު ހުމެއް ކަމަށާއި، ދެނީ އެއް ބޭހެއް" ކަމަށެވެ.
ބައެއް ޑޮކްޓަރުންނާއި ނަރުހުންގެ ހިދުމަތްތަކާ މެދު ހިތްހަމަނުޖެހިގެން، އެމީހުން ފަރުވާ ކުޑަކުރާ ކަމަށް ތުހުމަތުކުރެވިގެން ނުވަތަ އެ މީހުންގެ ފެންވަރާ މެދު ސުވާލު އުފެދޭތީ އާއްމުން މައްސަލަ ޖައްސަން ފެށީ އިއްޔެއަކު މިއަދު ނޫނެވެ. އެއީ ކޮންމެ ދުވަހަކުވެސް ހިނގާ ކަންތަކެވެ. ތަފާތަކީ އެވާހަކަތައް ދައްކަން ބައެއް މީހުން ޖެހިލުން ވުމެވެ. ނުވަތަ އަނެއްބަޔަކަށް އެވާހަކަތައް ހާމަކުރުމުގެ ބޭނުމެއް ނެތް ކަމަށް ފެންނަނީއެވެ.
'އައްޑޫލައިވް'ގެ ފަރާތުން ހިތަދޫ ހޮސްޕިޓަލުގައި މަސައްކަތް ކުރާ ނަރުހުންނާއި އިންޓަވިއުކޮށްގެން މައުލޫމާތު އޮޅުން ފިލުވާލުމުން އެނގުނު ގޮތުގައި، ހޮސްޕިޓަލުގައި އެކަށީގެންވާ ވަރަށް ހުންބަލާ ކަށިގަނޑު ހުރި ނަމަވެސް ބައެއް ފަހަރަށް ފަރުވާކުޑަވުމުން އެކަހަލަ ކަންތައް ދިމާވަނީއެވެ.
"އަސްލު ނެތީއެއް ނޫން. ވާގޮތަކީ ބައެއް ނަރުހުން ފަރުވާކުޑައީ. ހުންނާނެ ހޮސްޕިޓަލުގައި ތާމޯ މީޓަރު" ހިތަދޫ ހޮސްޕިޓަލުގައި މަސައްކަތް ކުރާ ސީނިއާ ނަރުހަކު ބުންޏެވެ.
އޭނާ ބުނިގޮތުގައި ހޮސްޕިޓަލުގައި އެކަށީގެންވާ ވަސީލަތްތަކެއް ނެތްކަން ޤަބޫލުކުރައްވާ ކަމަށާއި އެހެން ނަމަވެސް، ބައެއް މުވައްޒަފުންގެ ފަރުވާކުޑަ ކަމުން ވެސް ގިނަ ފަހަރަށް ހޮސްޕިޓަލް ބަދުނާމުވާގޮތަށް ކަންތައް ވަމުންދާ ކަމަށެވެ.
ސިއްހީ ޚިދުމަތް ދިނުމުގައި އިހުމާލުވުން ނުވަތަ މެޑިކަލް ނެގްލިޖެންސްގެ ސަބަބުން ހިތާމަވެރި އެތައް ހާދިސާތައް ހިތަދޫ ރީޖަނަލް ހޮސްޕިޓަލުގައި ވަނީ ހިނގާފައެވެ. ނަމަވެސް އެ މައްސަލަތައް ބަލައި އެކަށީގެންވާ ފިޔަވަޅެއް މިހާތަނަށް އެޅިފައެއް ނުވެއެވެ.މައްސަލަތައް ބެލި ނަމަވެސް، އެކަމާއި ބެހޭ މައުލޫމާތު ތަކެއް އާންމުންނާއި ހަމައަށް ހާމައަށް ނުކުރެއެވެ. އޭގެ ސަބަބުން ހޮސްޕިޓަލުގައި އެންމެ ރަގަޅަށް މަސައްކަތް ކުރާ މުވައްޒަފުގެ އަބުރު ވެސް ދަނީ ކަތިލެވެމުންނެވެ. ހަގީގަތެއް ނެތް ވާހަކަތައް ވެސް ގިނަ ފަހަރަށް ހޮސްޕިޓަލޭ ކިޔައިގެން ދެކެވިފައި އެބަހުއްޓެވެ.
ހިތަދޫ ހޮސްޕިޓަލުގައި އެކަށީގެންވާ ވަސީލަތްތަކެއް ޤާއިމްވެފައި ނެތުމުން، އާންމުންގެ ޝަކުވާތައް އަބަދުވެސް ހުންނާނެއެވެ. އެހެން ނަމަވެސް ޝަކުވާ ފެންމަތިވާ ކޮންމެ މައްސަލައެއްގައި މުވައްޒަފެއްގެ އިހުމާލު ނޯވެދާނެ އެވެ.
ދުނިޔޭގެ ކުރިއަރާފައިވާ އަދި ކުރިއަރަމުން އަންނަ ގައުމުތަކުގައި މެޑިކަލް ނެގްލިޖެންސް ވަރަށް ސީރިއަސްކޮށް ތަހުގީގުކޮށް، ކުށްވެރިވާ މީހުންނަށް ބޮޑެތި އަދަބުތައް ދެ އެވެ. މިއީ ސިއްހީ ޚިދުމަތްތެރިން ޒިންމާދާރުކުރުވުމަށާއި އެ ދާއިރާއާ މެދު އާންމުންގެ އިތުބާރު ބޮޑުކުރުމަށް ކޮންމެހެން ބޭނުންތެރި ކަމެކެވެ. އެހެން ނަމަވެސް މިއީ އަޅުގަނޑުމެންގެ ރާއްޖޭގެ ސިއްޙީ ނިޒާމުގައި މަސައްކަތް ކުރާ އިސްވެރިން އެހާ ބޭނުންތެރި ކަމެއްގެ ގޮތުގައި މިފަދަ ކަންތައް ނުދެކެއެވެ.
ސިއްހީ ޚިދުމަތުގެ ފެންވަރު ރަނގަޅުކޮށް، އެ ދާއިރާގެ މީހުންގެ މަސައްކަތުގެ ފަރުވާތެރިކަން ބޮޑުކޮށް ހަރުދަނާ ކަމާ އެކު ޒިންމާ ނަގަން ބާރު އެޅޭނީ ވެސް އެމީހުންގެ ފަރާތުން ނުކުންނަ ނުބައި ނަތީޖާތައް ޕްރޮފެޝަނަލް ގޮތުގައި އަދި މިނިވަންކަމާ އެކު ތަހުގީގުކޮށް އެކަށީގެންވާ ފިޔަވަޅު އަޅައިގެންނެވެ.
ސަރުކާރަށް މިކަން ނުކުރެވޭ ނަމަ ހިތަދޫ ހޮސްޕިޓަލުގައި ތިބި އިސްވެރިން އަމިއްލައަށް ވެސް މިކަން ކުރަން މިވަނީ ޖެހިފައެވެ. ސަބަބަކީ، މިއީ ހޮސްޕިޓަލުގައި މަސައްކަތް ކުރާ މުވައްޒަފުންނަށް އާންމުންގެ އިތުބާރު ހޯދުމަށް ކޮންމެހެން ވެސް މުހިއްމު ކަމަކަށް ވީމައެވެ.