އިނގިރޭސި ޕްރިމިިއާ ލީގުގެ ތާވަލުގެ އެއްވަނަ އަށް ލެސްޓާ ސިޓީ އަރައިފިއެވެ. ތާވަލުގެ ކުރީގެ މަގާމުތަކަށް ބަދަލު އައީ ކުރިން އެއްވަނައިގައި އޮތް މެންޗެސްޓާ ސިޓީ ސްޓޯކް އާ ބައްދަލު ކުރި މެޗު 0-2ގެ ނަތީޖާ އަކުން ބަލިވެ، ލެސްޓާ ސިޓީ އަދި ސްވެންސީ ބައްދަލު ކުރި މެޗު 0-3 ގެ ނަތީޖާ އަކުން ލެސްޓާ ކާމިޔާބު ކުރުމުންނެވެ.
މިމެޗުގައި ފެނިގެންދިޔަ 3 ގޯލުވެސް ކާމިޔާބު ކުރީ ލެސްޓާގެ 21 އަހަރުގެ ފޯވާޑް ރިޔާދް މަހްރޭޒް އެވެ.
މިރޭ އާސެނަލް އަދި ސަންޑަލެންޑް ބައްދަލު ކުރި މެޗުން މޮޅުވެ ލިބުނު ތިން ޕޮއިންޓާއެކު އާސެނަލް ވަނީ ތާވަލުގެ ދެވަނައަށް އަރާފައެވެ. މެންޗެސްޓާ ޔުނައިޓެޑް ކުޅުނު މެޗުން އެއްވަރުވެ ސިޓީއާ ޕޮއިންޓުގެ ގޮތުން ހަމަހަމަވިނަމަވެސް ޔުނައިޓެޑް ހަތަރުވަނައަށް ވެއްޓުނީ ގޯލުގެ ތަފާތުންނެވެ.
ތާވަލުގެ އެއްވަނައިގައި ލެސްޓާ އޮތީ 32 ޕޮއިންޓާއެކުއެވެ. 30 ޕޮއިންޓާއެކު އާސެނަލް ދެވަނައިގައި އޮތް އިރު މެންޗެސްޓާ ދެ ޓީމަށް ވެސް ލިބިފައިވަނީ ކުޅުނު 15 މެޗުން 29 ޕޮއިންޓެވެ. ފަސް ވަނައިގައި ޓޮޓެންހަމް އޮތީ 26 ޕޮއިންޓާއެކުއެވެ.
މިރޭ ޓޮޓެންހަމް އަދި ވެސްޓް ބްރޮމް ކުޅުނު މެޗު ނިމުނީ 1-1 ގެ ނަތީޖާ އަކުން އެއްވަރުވެގެންނެވެ. ސައުތްހެމްޕްޓަން އަދި އެސްޓަން ވިލާ ކުޅުނު މެޗުވެސް ނިމުނީ ހަމަ މި ނަތީޖާ އިންނެވެ.