ދިވެހިރާއްޖެ އިގްތިސާދީ އައު ކުރިއެރުންތަކަކަށް އަމާޒު ހިފާފައިވާ މިފަދަ ދަނޑިވަޅެއްގައި މިހާތަނަށް އާންމުކޮށް ހިނގަމުން އައި އުސޫލާ އެއްގޮތްވާ ގޮތުގެ މަތިން މި ވަގުތު ކޯޓުތައް ރިސެސް އަށް ދިޔުމަކީ ގައުމީ މަސްލަހަތު ތަންދޭ ކަމަކަށް ނުވާތީ ކޯޓުތައް ރިސެސް އަށް ނުދިއުމަށް ސުޕްރީމް ކޯޓުން އެންގުމުން ގިނަ ބަޔަކު އެކަން އުފަލާއި އެކު ބަލައިގަތެވެ.
ވަކިން ޚާއްސަ ގޮތެއްގައި، ކޯޓުތަކުގައި ސިޔާސީ ފަރާތްތަކުގެ މައްސަލަތައް ކުރިއަށް ދަނިކޮށް ކޯޓުތައް ރިސެސް އަކަށް ދިއުމަކީ، މަސްލަޙަތު ހުރި ގޮތެއް ކަމަށް ގިނަ ބަޔަކު ޤަބޫލެއް ނުކުރެއެވެ. ނަމަވެސް ސުޕްރީމް ކޯޓުގެ ނިންމުން ވެގެން ދިޔައީ، ކޯޓުތަކުގައި މަސައްކަތް ކުރާ މުވައްޒަފުންނާއި ފަނޑިޔާރުންނަށް އެހާ ހިތްހަމަޖެހޭ ނިންމުމަކަށް ނުވިއެވެ.
ޑިސެމްބަރ މަހު، ސްކޫލް ޗުއްޓީއާއި ދިމާކޮށް ރާއްޖެއިން ފުރައިގެން ދާން ތައްޔާރުވެގެން ތިބި، ފަނޑިޔާރުންނަށް ލިބުނީ ކުއްލި ޝޮކެކެވެ. ބައެއް ފަނޑިޔާރުން ރާއްޖެއިން ބޭރަށް ދިއުމަށް ރޭވި ދަތުރުތައް ކެންސަލް ކުރި ނަމަވެސް 'އައްޑޫލައިވް' އަށް މައުލޫމާތު ލިބިފައިވާ ގޮތުގައި، ބައެއް ފަނޑިޔާރުން މިވަގުތު ވެސް ތިއްބެވީ ރާއްޖެއިން ބޭރުގައެވެ.
ޖޭއެސްސީގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި، މައްސަލަތައް ނޯންނަ ދުވަސްތަކުގައި ފަނޑިޔާރުން ރާއްޖެއިން ބޭރުގައި ތިއްބެވުމަކީ މައްސަލައެއް ނޫން ކަމަށާއި، އެބޭފުޅުން އެ މައްސަލަ ޝެޑިއުލްކުރެވިފައިވާ ތާރީޚުގައި މާލޭގައި ތިއްބަވާނެ ކަމުގެ ޔަޤީންކަން އެބައޮތް ކަމަށެވެ.
" މައްސަލަ ޝެޑިއުލްކޮށްފައިވާ ދުވަހު އެބޭފުޅުން ތިއްބަވާނެ. އެހެން ދުވަސްތަކުގައި ރާއްޖެއިން ބޭރުގައި ތިބުމަކީ މައްސަލައެއް ނޫން." އޮފިޝަލް ބުންޏެވެ.
މިވަގުތު ކޯޓުތައް ރިސެސް އަށް ދިޔުމަކީ ގައުމީ މަސްލަހަތު ތަންދޭ ކަމަކަށް ނުވާތީ ސުޕްރީމް ކޯޓުގެ އަމުރަކުން ކޯޓުތައް ރިސެސް އަށް ދިއުން ހުއްޓުވާފައިވާއިރު، ކޯޓުގައި ތިއްބަވާ ބައެއް ފަނޑިޔާރުން، ސްކޫލް ޗުއްޓީއަށް ރަށުން ބޭރަށް ވަޑައިގަތުމަކީ، ކޯޓުތަކުގައި ހިނގާ މައްސަލަތައް ހުއްޓިގެންދާނެ ކަމެއްކަން ޔަޤީނެވެ.