ކުރީގެ ޑިފެންސް މިނިސްޓަރ ކާނަލް ނާޒިމްގެ އެޕާޓްމެންޓަށް ވަތް ސްވަޓް ޓީމުގެ ކޮމާންޑަރުގެ ރޭންކް ދަށްކޮށް އެހެން ޑިޕާޓްމެންޓަކަށް ބަދަލުކޮށްފައިވާ ކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
'އައްޑޫލައިވް' އާއި ވާހަކަ ދެއްކި ސަރުކާރުގެ އޮފިޝަލަކު ވިދާޅުވި ގޮތުގައި ކާނަލް ނާޒިމްގެ އެޕާޓްމެންޓް ބަލާ ފާސްކުރުމަށް ދިޔަ ފުލުހުންނަށް ވުރެ ކުރިން އެގެއަށް ވަތް ސްވަޓް ޓީމުގެ ކޮމާންޑަރު ބަދަލުކޮށްފައިވަނީ ފުލުހުންގެ ޕްރޮކިއުމެންޓް ޔުނިޓަށެވެ.
މީގެ އިތުރުން ވެސް ފުލުހުންގެ ޕްރޮފެޝެނަލް ސްޓޭންޑާޑްސް ކޮމާންޑް އިން ބަލަމުން ގެންދާ މައްސަލަތަކާއި ގުޅިގެން ބައެއް އެސްއޯ ފުލުހުން ވެސް ވަނީ ސަސްޕެންޑް ކޮށްފައިވާ ކަމަށް ވެސް އޮފިޝަލް ވިދާޅުވިއެވެ.
ރިޔާސީ ލޯންޗްކޮޅުގައި އެއްޗެއް ގޮއްވާލި ހާދިސާއަށް ފަހު، ރައްޔިތުންނާއި ބައްދަލުކުރައްވައި ވާހަކަ ދައްކަވަމުން ރައީސް ޔާމީން ވަނީ ބައެއް ފުލުހުންގެ މައްޗަށް، ކުރީގެ ނައިބު ރައީސް އަހްމަދު އަދީބު ނުފޫޒު ފޯރުވާކަމަށް ވިދާޅުވެފައެވެ. އަދި ފުލުހުންގެ ފަރާތުން ލިބެންޖެހޭ އިންޓެލިޖެންސް ރިޕޯޓްތައް ވެސް ނުލިބި ގިނަ ދުވަސްތަކެއް ވެފައިވާ ކަމަށް ވެސް ރައީސް ޔާމީން ވަނީ ވިދާޅުވެފައެވެ.
ހަނގުރާމަވެރި ހަތިޔާރު ގެންގުޅުނު ކަމުގެ ކުށް ސާބިތުވާކަމަށް ކަނޑައަޅައި ކާނަލް ނާޒިމްގެ މައްޗަށް ކްރިމިނަލް ކޯޓުން އިއްވާފައިވާ 11 އަހަރުގެ ޖަލު ހުކުމް އެމަނިކުފާނުގެ ފަރާތުން ހައި ކޯޓުގައި ވަނީ އިސްތިއުނާފް ކޮށްފައެވެ. ނާޒިމްގެ ފަރާތުން ހުށަހަޅާފައިވާ އިސްތިއުނާފް މައްސަލައިގެ އެންމެ ފަހުން ބޭއްވި ޝަރީޢަތުގައި ދައުލަތުގެ ފަރާތުން ވަނީ ސިއްރު ލިޔުމެއް ވެސް ހުށަހަޅާފައެވެ. ނަމަވެސް އެ ލިޔުމުގައި ހުރި ވާހަކަ ޝަރީޢަތުގެ މަޖިލީހުގައި ނާޒިމްގެ ވަކީލުންނާއި ވެސް ހިއްސާކޮށްފައެއް ނުވެއެވެ.