ފާއިތުވި ނޮވެމްބަރު މަހު އައްޑޫ ސިޓީއަށް ކުރި ވިއްސާރައިގައި ގެތަކަށް ލިބުނު ގެއްލުން ފަސް މިލިޔަން ރުފިޔާއަށް އަރާކަމަށް އައްޑޫ ސިޓީ ކައުންސިލުން ހާމަކޮށްފިއެވެ.
ކައުންސިލްގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި، ވިއްސާރައިގައި ފެންބޮޑުވުމުގެ ސަބަބުން ގެއްލުން ލިބުނު ގެތަކުގެ މައުލޫމާތު އޮޅުންފިލުވުމަށް އަވަށު އޮފީސްތަކުން ވަނީ ވަރަށް ފުރިހަމަ ސާވޭއެއް ކޮށްފައިވާ ކަމަށެވެ.
ކައުންސިލްގެ ފަރާތުން ވާހަކަ ދެއްކި އޮފިޝަލް ވިދާޅުވި ގޮތުގައި އެފަރާތުން ކުރިއަށް ގެންދިޔަ ސާވޭ އިން އެއްކުރެވުނު މައުލޫމާތަށް ބަލާއިރު ވިއްސާރައިގައި އައްޑޫ ސިޓީގެ 297 ގެއަކަށް ވަނީ ބޮޑެތި ގެއްލުންތަކެއް ލިބިފައެވެ. އެގޮތުން ފޭދޫގެ 256 ގެއަކަށް ގެއްލުން ވެފައިވާއިރު، ލިބުނު ގެއްލުމުގެ އަގު ގާތްގަނޑަކަށް 4.5 މިލިޔަން ރުފިޔާއަށް އަރާނެ ކަމަށް އަންދާޒާކުރެވޭ ކަމަށް އޮފިޝަލް ވިދާޅުވިއެވެ.
ކައުންސިލުން މައުލޫމާތު ދެއްވާ ގޮތުގައި މަރަދޫފޭދޫ އިން 35 ގެއަކަށް ގެއްލުން ލިބިފައިވާއިރު އެގެތަކަށް ލިބުނު ގެއްލުން 4 ލައްކަ އަށް ވުރެ ގިނަ ރުފިޔާއަށް އަރައެވެ. މީގެ އިތުރުން މަރަދޫގެ 6 ގެއަކަށް ވެސް ވިއްސާރައިގައި ގެއްލުން ލިބިފައިވާއިރު އެގެތަކަށް ވެސް 85،000 ރުފިޔާގެ ގެއްލުން ލިބިފައިވާއިރު ކައުންސިލްގެ ފަރާތުން މައުލޫމާތު ދެއްވައެވެ.
ވިއްސާރައިގައި ގެއްލުން ލިބުނު ފަރާތްތަކަށް ސަރުކާރުގެ ފަރާތުން ފައިސާގެ އެހީތެރިކަން ފޯރުކޮށްދީފައިވާއިރު ކައުންސިލްގެ ފަރާތުން ވެސް ވަނީ ފަންޑު ފޮއްޓެއް ޤާއިމްކޮށްފައެވެ. އެ ފަންޑު ފޮއްޓަށް ކައުންސިލްގެ ފަރާތުން 2 ލައްކަ ރުފިޔާ އަދި އެމްޑީޕީގެ ފަރާތުން 29،000 ރުފިޔާ ޖަމާކޮށްފައިވެއެވެ.