ޕްރިމިއަރ ލީގުގައި މިރޭ ކުޅުނު މެޗުން، ލިވަޕޫލްގެ މައްޗަށް 0-2 ގެ ނަތީޖާއިން ނިއުކާސަލް ޔުނައިޓެޑުން ކުރި ހޯދައިފިއެވެ.
އެންމެފަހުން ކުޅުނު އަށް މެޗުގެ ތެރެއިން ހަތް މެޗު ކާމިޔާބުކޮށްފައިވާ ލިވަޕޫލް އިން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް ލަނޑު ޖަހާނެ ފުރުސަތު ތަކެއް ތަނަވަސް ކުރެވިފައެއް ނުވެއެވެ.
މެޗުގެ ފުރަތަމަ ހާފްގައި ލަނޑެއް ފެނިގެން ނުދިޔަ ނަމަވެސް ދެވަނަ ހާފް ފަށައިގެން 69 ވަނަ މިނެޓްގައި، ނިއުކާސަލްއިން ވަނީ މެޗުގެ ލީޑުނަގައިފައެވެ. މި ގޯލަކީ ލިވަޕޫލްގެ ޑިފެންޑާރު މާޓިން ސްކާޓެލް އަތުން ބައިކޮޅަށް ވަތް ގޯލެކެވެ. މި ގޯލްޖެހިތާ އިރުކޮޅެއްފަހުން، ލިވަޕޫލްގެ ޑިފެންޑަރު މޮރޭނޯ ގޯލެއް ކާމިޔާބުކުރިއެވެ. ނަމަވެސް، ރެފްރީ ނިންމީ އޭނާ އޮފްސައިޑް ކަމަށެވެ. ރިޕްލޭއިން ފެންނަ ގޮތުގައި، މޮރޭނޯއަށް ބޯޅަ ލިބުނުއިރު އޭނާ ހުރީ އޮފްސައިޑް މަގާމެއްގައެއް ނޫނެވެ.
މި މެޗުން ނިއުކާސަލްއަށް ތިން ޕޮއިންޓް ކަށަވަރުކޮށްދިން ގޯލް، މެޗުގެ 90 ވަނަ މިނެޓްގައި ކާމިޔާބުކޮށްދިނީ ވިޖްނަލްޑަމްއެވެ.
މިއީ ލިވަޕޫލްގެ ކޯޗު ޔާގަން ކްލޮޕްގެ އިރުޝާދުގެ ދަށުން ކުޅެ، ލިވަޕޫލް ބަލިވި ދެވަނަ މެޗެވެ. ކްލޮޕްގެ އިރުޝާދުގެ ދަށުން ލިވަޕޫލްއިން 12 މެޗު މިހާތަނަށް ކުޅެފައިވާއިރު، ހަތް މެޗުން އެޓީމު ވަނީ މޮޅުވެފައެވެ.