ފާއިތުވި ނޮވެމްބަރު މަހު އައްޑޫ އަށް ކުރި ވިއްސާރައިގައި ފޭދުއާއި، މަރަދޫ ފޭދުއަށް ބޯކޮށް ވާރޭވެހި ގެއްލުން ލިބުނު އާއިލާތަކަށް އެހީވުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަރާތުން ބެހެއްޓި ފަންޑު ފޮއްޓަށް ލިބުނު ފައިސާ އައްޑޫ ސިޓީ ކައުންސިލާއި ހަވާލުކޮށްފިއެވެ.
ފަންޑު ފޮއްޓަށް ލިބުނު ފައިސާ އައްޑޫ ސިޓީ ކައުންސިލާއި ހަވާލުކޮށްދެއްވީ، ހިތަދޫ ދެކުނު ދާއިރާގެ މެންބަރު އަލީ ނިޒާރު އާއި މީދޫ ދާއިރާގެ މެންބަރު ރޮޒެއިނާ އާދަމެވެ. ކައުންސިލުގެ ފަރާތުން ފައިސާ އާއި ހަވާލުވީ މޭޔަރ އަބްދުﷲ ސޯދިޤް (ސޯބެ) އެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި އެމްޑީޕީގެ ފަރާތުން 3 ދުވަހާއި 13 ގަޑިއިރަށް ކުރިއަށް ގެންދިޔަ "މިންޖުވާން" މުޒާހަރާގައި ބެހެއްޓި ފަންޑު ފޮއްޓަށް 29710.50 ރުފިޔާ އާއި 3 އެމެރިކާ ޑޮލަރު ވަނީ ލިބިފައެވެ.
ކައުންސިލްގެ އޮފިޝަލަކު ވިދާޅުވި ގޮތުގައި އެމްޑީޕީގެ ފަރާތުން ހުޅުވި ފަންޑަށް ލިބުނު ފައިސާ ޖަމާކުރާނީ، ވިއްސާރައިގައި ގެއްލުން ލިބުނު އާއިލާތަކަށް އެހީވުމަށް އައްޑޫ ސިޓީ ކައުންސިލުން ޤާއިމްކުރި ފަންޑަށެވެ.