އައިބީ މިގޮތަށް ވިދާޅުވެފައިވަނީ، ދި ޓީވީ ޚަބަރުތެރެއިން ޕްރޮގްރާމްގައި ވާހަކަ ދައްކަވަމުންނެވެ.
އެމްޑީޕީއަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުން އައިބީ ވިދާޅުވީ، ރައީސް ޔާމީންގެ ސަރުކާރުގައި ކޮރްޕްޝަނަށް މަގުފަހިވާގޮތަށް ކަމެއް ކޮށްފިނަމަ އެއީ ކޮންމެ ބޭފުޅަކަށް ވިޔަސް ހަމަހަމަ ގޮތެއްގައި އެބޭފުޅަކާއި މެދު ފިޔަވަޅު އެޅިގެންދާނެ ކަމަށާއި އެއީ ޚުދު އެބޭފުޅާ ކަމުގައި ވިޔަސް މައްސަލައެއް ނެތް ކަމަށެވެ.
" ކޮރަޕްޝަނުގެ ޢަމަލެއް ހިންގެވީ ނައިބު ރައީސް ކަމަށް ވިޔަސް. ވަޒީރެއް ކަމަށް ވިޔަސް. ރައްޔިތުންގެ މަޖިލިސް މެންބަރަކަށް ވިޔަސް. އަދި ޚުދު އަޅުގަނޑުކަމަށް ވިޔަސް އާންމު ރައްޔިތަކަށް ވިޔަސް ހުރިހާ އެންމެންނާއި މެދު ވެސް ޢަމަލު ކުރެވޭނީ ހަމަހަމައަށް ވެސް ދާނީ. " އައިބީ ވިދާޅުވިއެވެ.
އައިބީ މިގޮތަށް ވިދާޅުވެފައި މިވަނީ، އައްޑޫއަށް ކުރި ވިއްސާރައިގައި ގެއްލުން ލިބުނު ފަރާތްތަކަށް ސަރުކާރުން ދިން ފައިސާ ރައްޔިތުންނާ ޙަވާލު ކުރުމުގައި އައިބީ ބައިވެރިވުމަކީ ސަރުކާރުގެ ފައިސާ ބޭނުންކޮށްގެން އައިބީ އަށް އެކަމުން ފައިދާތަކެއް ކޮށްދިނުމުގެ ބޭނުމުގައި ސަރުކާރުން ކުރާ ކަމެއް ކަމަށް ބުނެ އެމްޑީޕީގެ ފަރާތުން އޭސީސީއަށް މައްސަލަ ހުށަހަޅާފައިވާ ދަނޑިވަޅެއްގައެވެ.
އައިބީ ވިދާޅުވި ގޮތުގައި މި ސަރުކާރުގެ ސިޔާސަތަކީ ޤާނޫނު ތަންފީޒް ކުރުން ކަމަށާއި ޤާނޫނު ތަންފީޒު ކުރަމުން ދާއިރު އެއްވެސް ބޭފުޅަކަށް އޭގެއިން ރެކިގެން ނުދެވޭނެ ކަމަށެވެ.