ދިވެހިރާއްޖޭގައި ފަހުގެ ތާރީޚެއްގައި ވެސް އާގު ބޯޓު ފަހަރުގައި ހަމައެކަނި ޖަނެރޭޓަރު ގެންދާ ތަނެއް ނުފެންނާނެ ކަމަށް ފޭދޫ ދާއިރާގެ މެންބަރު އިބްރާހިމް ދީދީ (އައިބީ) ވިދާޅުވެއްޖެއެވެ.
ދިވެހިރާއްޖޭގެ ތަރައްޤީއަށް ސަރުކާރުން ކުރައްވާ މަސައްކަތްތަކަކީ އެހެން އެއްވެސް ބަޔަކަށް ގޮންޖަހާލެވޭނެ ފަދަ މަސައްކަތްތަކެއް ނޫންކަން ފާހަގަކުރައްވައި ވާހަކަ ދައްކަވަމުން، އައިބީ ވިދާޅުވި ގޮތުގައި، އާގު ބޯޓު ފަހަރުގައި ހަމައެކަނި ޖަނެރޭޓަރު އުފުލާ މަންޒަރެއް ނުފެންނާނެ ކަމަށާއި ރާއްޖޭގެ ރަށްތަކަށް ކަރަންޓު ޔަޤީންކޮށް ދެމުން ދަނީ އެގޮތަށް ވެސް ޖަނެރޭޓަރު ގެންގޮސްގެން ކަމަށެވެ.
" ތިބޭފުޅުންނަށް އެނގިވަޑައިގަންނަވާނެ މިއިން ޒަމާނަކު ވެސް އަޅުގަނޑުމެންނަށް ނުފެންނާނެ އާގު ބޯޓު ފަހަރުގައި ހަމައެކަނި ޖަނެރޭޓަރު ގެންދާ ތަނެއް މިނޫނީ އަކާ."
ބެލެވޭ ގޮތުގައި އައިބީ ޖަނެރޭޓަރގެ ގޮތުގައި މާނަކޮށްފައިވަނީ ރަށްތަކަށް ފޮނުވި އިންޖީނުތަކެވެ. ރާއްޖޭގެ ބައެއް ރަށްތަކުގެ ކަރަންޓު މައްސަލަ ހައްލުކުރުމަށް އެ ރަށްތަކަށް އާ އިންޖީނުތައް ފޮނުވާފައިވާއިރު އައްޑޫގެ ކަރަންޓު ޚިދުމަތުގެ ފެންވަރު ރަގަޅު ކުރުމަށް ވެސް ފެނަކަ ކޯޕަރޭޝަނުން އައްޑޫއަށް 2 އިންޖީނެއް ގެނެސްފައި ވެއެވެ. ނަމަވެސް 'މިނިވަން50' ގެ ބޭނުމަކަށް ކަމަށް ބުނެ އެ އިންޖީނުތައް ވަނީ ފަހުން މާލެ ގެންގޮސްފައެވެ.
ފެނަކަ ކޯޕަރޭޝަނުގެ ފަރާތުން ބުނެފައިވާ ގޮތުގައި މި އަހަރުގެ ޑިސެމްބަރު މަހުގެ ތެރޭގައި، އައްޑޫއަށް އާ އިންޖީނުތަކެއް ގެނެވޭނެ ކަމަށެވެ. ނަމަވެސް އޭގެ ފަހުން އިންޖީނުތަކާއި ބެހޭ އެއްވެސް ވާހަކައެއް ފެނަކަ ކޯޕަރޭޝަނުގެ ފަރާތުން ދައްކާފައެއް ނުވެއެވެ.