އައްޑޫއަށް ކުރި ވިއްސާރައިގައި ގެއްލުން ލިބުނު މަރަދޫފޭދޫގެ ގެތަކަށް، އެ ދާއިރާގެ މެންބަރު ރޮޒެއިނާ އާދަމް ޒިޔާރަތްކޮށްފިއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ރޮޒެއިނާ އާދަމް ވަނީ، ވިއްސާރައިގައި ގެއްލުން ލިބުނު ފަރާތްތަކަށް ސަރުކާރުން ފައިސާގެ އެހީ ފޯރުކޮށްދިން ގޮތާއި ބެހޭގޮތުން ދާއިރާގެ ރައްޔިތުންގެ ހުރި ކަންބޮޑުވުންތައް އޮޅުންފިލުވާފައެވެ. އަދި މީގެ އިތުރުން މަރަދޫފޭދޫގެ ރައްޔިތުންނަށް ދިމާވެފައިވާ އެހެނިހެން ދަތިތަކާއި ބެހޭ ގޮތުން ވެސް މައުލޫމާތު އޮޅުންފިލުވާފައިވާ ކަމަށް ވެއެވެ.
ވިއްސާރައިގައި ގެއްލުން ލިބުނު ފަރާތްތަކުގެ ހާލު ބައްލަވަން ރޮޒެއިނާ އާދަމް ވަޑައިގެންފައި ނުވާތީ ގިނަބައެއްގެ ފާޑުކިޔުންތައް ވަނީ އަމާޒުވެފައެވެ. ނަމަވެސް ފެންބޮޑުވުމުގެ ހާދިސާ ހިނގި ފަހުން 2 ހަފްތާ ވާން ކައިރިވެފައިވަނިކޮށް ދާއިރާގެ ރައްޔިތުންނާއި ބައްދަލުކުރައްވައި ލިބުނު މައުލޫމާތުތައް ރޮޒެއިނާ ވަނީ ސޯޝަލް މީޑިޔާގައި ޙިއްސާކުރައްވާފައެވެ.
އެގޮތުން ސަރުކާރުން ފައިސާ ބަހާފައިވަނީ އެއްވެސް ހަރުދަނާ މިންގަނޑަކުން ނޫން ކަމަށާއި، ކައުންސިލުން ދޮރުން ދޮރަށް ހިނގައިގެން ތައްޔާރުކުރި މަރަދޫފޭދޫގެ ލިސްޓަށް އެއްވެސް ބެލުމެއް ނެތި ފައިސާ ބަހާފައިވާތީ ރޮޒެއިނާ ވަނީ އެކަމާއި ކަންބޮޑުވުން ފާޅުކޮށްފައެވެ.
" އެހީ ދިނުމުގައި ބައެއް ގެތައް އުނިވެފައި އެބަހުރި. މިހެން ވެފައިހުރި ތަންތަނަށް އެމީހުންނަށް ހައްޤުވާ މިންވަރު ފޯރުކޮށްދިނުމަށް ގޮވާލަން. އަދި ބައެއް ގޭގެއަށް އިންސާފުން ބޭރުން ކަންކަން ކޮށްފައި ހުރީތީ އެކަން ކުށްވެރިކުރަން " ރޮޒެއިނާ ފޭސްބުކްގައި ލިޔުއްވާފައިވެއެވެ.