ޔުއޭފާ ޗެމްޕިއަންސް ލީގުގައި ރިއަލް މެޑްރިޑް އަދި މަލްމޯ ބައްދަލުކުރި މެޗެ ފަސޭހަކަމާއެކު 0-8 އިން ކާމިޔާބުކޮށްފިއެވެ.
މިމެޗުގައި މެޑްރިޑްގެ އިތުބާރު ފޯވާޑް ކްރިސްޓިއާނޯ ރޮނާލްޑޯ ވަނީ 4 ގޯލު ޖަހައިފައެވެ.
ރޮނާލްޑޯގެ މި ގޯލުތަކާއެކު އޭނާ މިސީޒަނުގެ ޗެމްޕިއަންސް ލީގު ގްރޫޕް ސްޓޭޖުގައި ޖެހި ގޯލުތަކުގެ އަދަދު 11 ވަނީ އަރާފައެވެ. އަދި ޗެމްޕިއަންސް ލީގުގެ ތާރީޚުގައި ގްރޫޕް ސްޓޭޖުގައި ދެ ނަންބަރުގެ އަދަދަށް ގޯލު ޖެހި ފުރަތަމަ ކުޅުންތެރިޔާގެ ލަގަބު ހޯދާފައެވެ.
ރޮނާލްޑޯގެ އިތުރުން މިމެޗުގައި ކަރިމް ބެންޒީމާވެސް ވަނީ ހެޓްރިކް ހަދާފައެވެ. މެޗުގެ ފުރަތަމަ ދެގޯލުވެސް ކާމިޔާބު ކޮށްދިނީ ބެންޒީމާއެވެ.
12 ވަނަ މިނެޓުގައި ބެންޒީމާގެ ފުރަތަމަ ގޯލު ޖަހައި، އޭގެ 12 މިނެޓު ފަހުން ދެވަނަ ގޯލު ކާމިޔާބުކުރިއެވެ.
ރޮނާލްޑޯގެ މެޗުގެ ފުރަތަމަ ގޯލު ފެނިގެން ދިޔައީ 39 ވަނަ މިނެޓުގައެވެ. ރިއަލް މެޑްރިޑްގެ އިތުރު ގޯލުތައް ފެނިގެން ދިޔައީ ދެވަނަ ހާފުގައެވެ.
ރޮނާލްޑޯ ވަނީ ރިއަލް އިން ދެވަނަ ހާފުގައި ޖެހި ފަސް ގޯލުގެ ތެރެއިން 3 ގޯލު ކާމިޔާބު ކޮށްދީފައެވެ. މެޗުގެ 7 ވަނަ ގޯލު ކާމިޔާބުކޮށްދިނީ ކްރޮއޭޝިއާގެ ޒުވާން މިޑްފީލްޑަރ މަޓެއޯ ކޮވެކިކް އެވެ. މެޗުގެ ފަހު ގޯލު ފެނިގެން ދިޔައީ 74 ވަނަ މިނެޓުގައި ބެންޒީމާގެ ފަރާތުންނެވެ.
ކުޅުނު 6 މެޗުގެ ތެރެއިން 5 މެޗުން މޮޅުވެ 1 މެޗުން އެއްވަރުވެ ލިބުނު 16 ޕޮއިންޓާއެކު ރިއަލް ވަނީ ގްރޫޕުގެ އެއްވަނަ ޓީމުގެ ގޮތުގައި ދެވަނަ ބުރަށް ގޮސްފައެވެ. 13 ޕޮއިންޓާއެކު ޕީއެސްޖީ ދެވަނަ ބުރަށް ދިޔައީ ގްރޫޕުގެ ދެވަނަ ޓީމުގެ ގޮތުގައެވެ.
ގްރޫޕް ބީ އިން އެތްލެޓިކޯ މެޑްރިޑް އަދި ބެންފީކާ ވެސް ވަނީ ދެވަނަ ބުރަށް ގޮސްފައެވެ.
ރޭގައި މެންޗެސްޓާ ސިޓީ އާއި މޮންޗެންގުލަބާޗް ބައްދަލު ކުރި މެޗު ކާމިޔާބުކޮށްގެން ސިޓީ ވެސް ވަނީ ގްރޫޕުގެ އެއްވަނައިގެ ގޮތުގައި ދެވަނަ ބުރަށް ގޮސްފައެވެ. ދެވަނަ ޓީމުގެ ގޮތުގައި ދިޔައީ ޔުވެންޓަސްއެވެ.