ސ.ހިތަދޫ ހޮސްޕިޓަލް ތަރައްގީ ކުރުމަށް އަނެއްކާ ވެސް 20 މިލިއަން ޑޮލަރު (308.4 މިލިއަން ރުފިޔާ)ގެ ލޯނެއް ނެގުމަށް ސަރުކާރުން ނިންމާފައިވާކަން އިކޮނޮމިކް ކައުންސިލުން ހާމަކޮށްފިއެވެ.
އިކޮނޮމިކް ކައުންސިލުން މިކަން ހާމަކޮށްފައިވަނީ، މިއަދު ރައީސް އޮފީހުގައި ބޭއްވި ނޫސް ކޮންފަރެންސެއް ގައެވެ.
މިއަދުގެ ނޫސް ކޮންފަރެންސްގައި ވާހަކަ ދައްކަވަމުން ފިޝަރީޒް މިނިސްޓަރ ޑރ.ޝައިނީ ވިދާޅުވީ ހިތަދޫގައި އަޅަން ހަމަޖައްސާފައިވާ ހޮސްޕިޓަލްގެ މަސައްކަތް ހުއްޓާނުލާ ކަމަށާއި ހޮސްޕިޓަލްގެ މަޝްރޫއަށް ބައެއް ބަދަލުތައް ގެނެސްފައިވާ ކަމަށެވެ.
"ހިތަދޫ ހޮސްޕިޓަލްގެ މަސައްކަތް ހުއްޓާ ނުލަން، ބަދަލުތަކެއް ގެންނަނީ، ވަރަށް އަވަހަށް އައްޑޫ ސިޓީ ހޮސްޕިޓަލްގެ އަމަލީ މަސައްކަތް ފެށިގެންދާނެ،" ޝައިނީ ވިދާޅުވިއެވެ.
ހޮސްޕިޓަލް ތަރައްޤީކުރުމަށް 20 މިލިއަން ޑޮލަރުގެ ލޯނެއް ނަގާނެކަން ސަރުކާރުން ހާމަކޮށްފައިވާއިރު 2011 ވަނަ އަހަރު ވެސް ސ. ހިތަދޫ ރީޖަނަލް ހޮސްޕިޓަލް ތަރައްގީކުރަން ސައުދީ ފަންޑު ފޯ ޑިވެލޮޕްމަންޓުން ވަނީ 12.5 މިލިއަން ޑޮލަރުގެ ލޯނެއް ނަގާފައެވެ. އެ ލޯނުގެ ގްރޭސް ޕީރިއަޑްގައި ހިމެނޭ 5 އަހަރުގެ ތެރެއިން 4 އަހަރު މިހާރު ފާއިތުވެގެން ގޮސްފައެވެ.