އައްޑޫގައި އަޅާނެ ކަމަށް ސަރުކާރުތަކުން ބުނަމުން ގެންދާތާ 14 އަހަރަށް ވުރެ ގިނަ ދުވަސްވެފައިވާ، "100 އެނދުގެ ހޮސްޕިޓަލް"ގެ ބީލަމަކީ ބިޑަށް ހުޅުވައިލުމެއް ނޫން ކަމަށް ފިނޭންސް މިނިސްޓަރ އަބްދުﷲ ޖިހާދު ވިދާޅުވެއްޖެއެވެ.
ސަރުކާރުގެ އިކޮނޮމިކް ކައުންސިލްގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން، ޖިހާދު ވިދާޅުވެފައިވަނީ، ހޮސްޕިޓަލްގެ ބީލަމަކީ ބިޑަށް ހުޅުވައިލި ހުޅުވާލުމެއް ނޫން ކަމަށާއި އެއީ ޝައުގުވެރިކަން ހުރި ފަރާތްތައް ހޯދުމަށް ހުޅުވައިލި ހުޅުވާލުމެއް ކަމަށެވެ.
" އައްޑޫގެ ޓާޝިއަރީ ހޮސްޕިޓަލްގެ ބީލަމަކީ ބިޑަށް ހުޅުވައިލި ހުޅުވާލުމެއް ނޫން. އެއީ ޝައުގުވެރިކަން ހުރި ފަރާތްތައް ހޯދުމަށް ހުޅުވައިލި ހުޅުވާލުމެއް." ޖިހާދު ވިދާޅުވިއެވެ.
އައްޑޫގައި ހޮސްޕިޓަލް އަޅައިދިނުމަށް ޝައުޤުވެރިވާ ފަރާތްތައް ހޯދުމަށް ފިނޭންސް މިނިސްޓްރީގެ ފަރާތުން އިއުލާންކޮށްފައި ވަނީ ފާއިތުވި ނޮވެމްބަރ މަހުގެ 19 ވަނަ ދުވަހުއެވެ. ނަމަވެސް އޭގެ ހަފްތާއެއް ފަހުން އެ އިއުލާން ވަނީ ބާތިލްކޮށްފައެވެ.
އިއުލާން ބާތިލްކުރި ސަބަބެއް މިހާތަނަށް ސަރުކާރުން ހާމަކޮށްފައި ނުވާއިރު، ދާދި ފަހުން މީޑިޔާގައި މިނިސްޓަރ ޖިހާދު ވިދާޅުވެފައި ވަނީ، އައްޑޫ ހޮސްޕިޓަލްގެ މަސައްކަތް މިވަގުތަށް "މަޑުޖައްސާލީ" ކަމަށެވެ. ނަމަވެސް އެކަމާއި ބެހޭ އިތުރު ތަފްސީލެއް މިހާތަނަށް ދެއްވާފައެއް ނުވެއެވެ.