5 މީހުން ހިމެނޭ ގްރޫޕަކުން ހީ ސަމާސަ ކުރައްވަމުން ގެންދެވުމުގައި ފޮޓޯ ނެންގެވުމުގައި ހަރަކާތްތެރިވަމުން ދިޔަތަން ފެނުނީ އަލަކަށް ނޫނެވެ. ނަމަވެސް، އެކަން އާދަޔާ ޚިލާފު ކަމަކަށް ވީ އެމީހުން ފޮޓޯ ނަގައި ނިމެންދެން އެ ސަރަހައްދަށް ނުދެވޭނެ ކަމަށް އެހިސާބުގައި ކުލަ ހެދުމުގައި ތިބި 2 ފުލުހަކު އިޝާރާތް ކުރުމުންނެވެ.
ސ.ހުޅުދޫ އިން ހެރެތެރެއަށް ދާން އޮންނަ ފާލަން ކައިރީގައި ހަވީރު ގަޑީގައި ފޮޓޯ ނަގަން ގޮސް ތިބީ ކޮންބައެއްތޯ ބަލަން ކޮންމެހެން ވެސް ބޭނުންވިއެވެ. އެހެންވެ ގަސްތުކުރީ އެމީހުން، ނިމިގެން އަންނަން ދެން އެތަނުގައި މަޑުކުރާށެވެ. އިރުއޮއްސި އަނދިރިވާން ފެށުމުން އެމީހުން ވެސް ގެއާއި ދިމާލަށް މިސްރާބު ޖެހުމުން އެއީ ކޮންބައެއްތޯ ބެލުމަށް ފަހަތުން ދިޔައީމެވެ.
ފުރަތަމަ ހީކުރީ އެއީ، ކޮންމެވެސް މިނިސްޓަރެއް ކަމަށެވެ. ނުވަތަ ބޭރު ޤައުމެއްގެ ސަފީރެއް ކަމަށެވެ. ނަމަވެސް ވަކި ހިސާބަކުން އެއީ ކޮން ބައެއްކަން އެނގިއްޖެއެވެ. އެއީ ޢިއްޒަތްތެރި ބޭފުޅުން ކޮޅެކެވެ. ދިވެހިރާއްޖޭގެ ހައި ކޯޓުގެ ދެކުނު ގޮފީގައި މަސައްކަތް ފެއްޓުމަށް އައިސް ތިއްބެވި 3 ފަނޑިޔާރުންނެވެ. އެބޭފުޅުންނާއި އެކު ހަރަކާތްތެރި ވަމުން ދިޔަ "ޓުއާ ގައިޑަކީ" ކުރީގެ ހުޅުދޫ ބޮޑު ކަތީބް ޖަމީލް އާއި އަދިވެސް އެހެން ބޭފުޅެކެވެ.
ފެނުނު މަންޒަރުތަކާއި ގުޅޭ ގޮތުން ހުޅުދޫ އަދި މީދޫގެ ބައެއް ރައްޔިތުންނާއި ވާހަކަ ދައްކާލުމުން އެމީހުން ބުނީ އެ "ގްރޫޕް" ކޮންމެ ދުވަހަކުވެސް އެމީހުން ހަވީރު ގަޑީގައި ދުއްވާލަން، ރަށުތެރެ ބަލާލަން ދާކަމަށެވެ. އެބޭފުޅުން ކުރާނެ މަސައްކަތެއް ނެތުމުން، އެގޮތަށް އުޅުއްވަނީ ކަމަށް ބައެއް ރައްޔިތުން ޤަބޫލުކުރެއެވެ. ނަމަވެސް އެއީ ހަގީގަތެއް ނޫނެވެ.
ހައި ކޯޓުގެ ދެކުނު ގޮފި ގާއިމްކުރިތާ ގާތްގަނޑަކަށް އަހަރެއްހާ ދުވަސް ފާއިތުވެގެން ގޮސްފައިވާއިރު، އެ ގޮފި ޤާއިމްކުރި ފަހުން ދެކުނުގެ އެއްވެސް ރައްޔިތަކަށް ދަށު ކޯޓުތަކުން ނިންމާ މައްސަލަތައް އިސްތިޢުނާފު ކުރުމުގެ ހައްޤެއް ނުލިބެއެވެ. ބައެއް މީހުންގެ މައްޗަށް އިއްވާފައިވާ ޖަލު ހުކުމް ތަންފީޒް ކޮށް ނިމިގެން މިނިވަން ވީ އިރުވެސް އިސްތިއުނާފަށް ހުށަހެޅި މައްސަލަ އާއި މެދު ގޮތެއް ނުނިންމެއެވެ.
ސ. ހުޅުދޫގައި ހައި ކޯޓުގެ ދެކުނު ގޮފި ގާއިމްކުރިތާ އެތައް ދުވަހެއް ފަހުން އެ ގޮއްޕަށް ކަނޑައެޅި ފަނޑިޔާރުން އައްޑޫ ސިޓީއަށް ވަޑައިގަތުމުން ގިނަ ބަޔަކަށް ހީވީ ވަރަށް އަވަހަށް ހައި ކޯޓުގެ ދެކުނު ގޮފީގެ މަސައްކަތް ފެށިގެން ދާނެ ކަމަށެވެ. އެ ކޯޓުގެ މަސައްކަތް ފެށޭނެ ދުވަހެއް ޖުޑީޝިއަލް ސާވިސް އެޑްމިނިސްޓްރޭޝަން އިން ހާމަކޮށްފައި ނުވާއިރު ދެކުނުގެ ރައްޔިތުން ތިބީ އިސްތިޢުނާފު ކުރުމުގެ ޙައްޤުން މަޙްރޫމްވެފައެވެ.
ނަމަވެސް ފަނޑިޔާރުން ކުރާނެ މަސައްކަތެއް ނެތިގެން ހުޅުމީދޫގައި "ސައިޓް ސީން" އަށް ދުއްވާކަމަށް ދެކެވޭ ވާހަކަ އެފަރާތްތަކުން ދޮގު ކުރެއެވެ.
ހައިކޯޓުގެ އައްޑޫ ގޮފީގެ އޮފިޝަލަކު ވިދާޅުވީ ފަނޑިޔާރުން ބުރަކޮށް މަސައްކަތް ކުރައްވަމުން އަންނަ ކަމަށާއި، ކުރާނެ ކަމެއް ނެތިގެން ނުތިއްބަވާ ކަމަށެވެ.