އައްޑޫ ސިޓީ އަކީ ވެރިކަންކުރާ ޕީޕީއެމް އަށް ވުރެ އިދިކޮޅު އެމްޑީޕީއަށް ތާޢީދު ބޮޑު ސަރަހައްދެކެވެ. ފާއިތުވެގެން ދިޔަ އިންތިޙާބު ތަކުގައި އެކަން ވަނީ ސާބިތުވެގެން ގޮސްފައެވެ. ރައްޔިތުންގެ މަޖިލީހުގެ އިންތިޚާބުގައި އައްޑޫގެ 7 ދާއިރާއެއްގެ ތެރެއިން 5 ދާއިރާއެއްގެ ގޮނޑި ކާމިޔާބު ކުރީ އެމްޑީޕީގެ ކެންޑިޑޭޓުންނެވެ. ޕީޕީއެމް އަށް ލިބުނީ އެންމެ 2 ގޮނޑިއެވެ. ކައުންސިލް އިންތިޚާބުގައި ވެސް އެމްޑީޕީ އިން ވަނީ 6 ގޮނޑި ވެސް ކާމިޔާބުކޮށްފައެވެ.
މިއީ އައްޑޫ އިން ފެންނަން އޮތް ހަގީގަތެވެ. އައްޑޫގައި ދިރިއުޅޭ ގިނަ ބަޔަކު ޤަބޫލުކުރާ ހަގީގަތެކެވެ. ޕީޕީއެމްގެ މެންބަރުން އައްޑޫ އިން އެމްޑީޕީއަށް %15 ނުލިބޭނެއޭ ބުންޏަސް އެއީ ހަގީގަތެއް ނޫންކަން އިންތިޚާބުތަކުގެ ނަތީޖާއަށް ބަލާލުމުން އެނގެއެވެ. ނަމަވެސް ކުރިއަށް އޮތްތަނުގައި ވާނެ އެއްޗެއް ނޭނގެއެވެ.
ސޯޝަލް މީޑިޔާގައި ވެސް އައްޑޫގެ ރައްޔިތުންގެ ތެރެއިން އެމްޑީޕީ މެންބަރުންގެ އަޑު މާ ގަދައެވެ. ފޭސްބުކްގައި 'އައްޑޫ އެކްސްފައިލް' ގެ ނަމުގައި ގްރޫޕެއް ހިންގާއިރު، ޓްވިޓާގައި ވެސް އެމްޑީޕީ އައްޑޫ މެންބަރުންގެ އަޑު ވަރަށް ގަދައެވެ. ހުރިހާ އެންމެންގެ ވެސް މައިގަނޑު ގޮވާލުމަކީ ކުރީގެ ރައީސް މުޙައްމަދު ނަޝީދު މިނިވަންކުރުމަށް ގޮވާލުމެވެ.
ދެން އޮތީ އައްޑޫގައި ތިބި ޕީޕީއެމް މެންބަރުންގެ ވާހަކައެވެ. އަދަދުން މަދު ވިޔަސް ސޯޝަލް މީޑިޔާގައި އެމީހުންގެ ވެސް އަޑު މަޑެއް ނޫނެވެ. "ޝުކުރިއްޔާ ރައީސް ޔާމީން" މި ލަފްޒާއި އެކު ރާއްޖޭގެ ކޮންމެ ސަރަހައްދެއްގައި ސަރުކާރުން ކަމެއް ކުރާއިރު އެވާހަކަ އެމީހުން ލިޔެލަނީއެވެ. ފެންނަ ފެނުމަށް އެމީހުންގެ މަސައްކަތަކީ ސަރުކާރު ޕްރޮމޯޓް ކުރުމެވެ.މީގެ ތެރެއިން ވެސް އައްޑޫގައި ތަރައްޤީގެ މަޝްރޫޢުއެއް ހިންގާ ވާހަކަ ދެއްކުމާއި އެކު އެމްޑީޕީގެ މެންބަރުންނަށް މަލާމާތްކޮށް ވާހަކަ ދެއްކުމަކީ، އައްޑޫގައި ތިބި ޕީޕީއެމްގެ އެކްޓިވިސްޓުންގެ އާދައެކެވެ.
ނަމަވެސް އިއްޔެ ސަރުކާރުން ބޭއްވި ނޫސްވެރިންގެ ބައްދަލުވުމެއްގައި އައްޑޫގައި އަޅާނެ ކަމަށް ބުނާ "100 އެނދުގެ ހޮސްޕިޓަލް" ގެ މަސައްކަތް "ފަސްކޮށްފި" ކަން ހާމަކުރުމާއި ގުޅިގެން އައްޑޫގެ ރައްޔިތުން މާޔޫސްވެގެން ދިޔައެވެ. އެމްޑީޕީ މެންބަރުންނާއި ޕީޕީއެމް މެންބަރުންނެވެ. އަދި ވަކި ސިޔާސީ ޕާޓީއަކަށް ތާޢީދު ނުކުރާ އާންމު ރައްޔިތުން ވެސް މެއެވެ.
"100 އެނދުގެ ހޮސްޕިޓަލް"ގެ މައްސަލައިގައި ބަހުސް ނުކުރާ އައްޑޫ އެއްވެސް ރައްޔިތަކު ނެތޭ ބުނުމަކީ ދޮގަކަށް ނުވާނެއެވެ. ގިނަ ބައެއްގެ ފާޑުކިޔުންތައް ސަރުކާރަށް އަމާޒުވެގެން ދިޔައިރު، އެމީހުން ބުނަމުން ދިޔައީ "މި ސަރުކާރުން އައްޑޫއަށް ކަމެއް ކޮށްދޭން ބޭނުން ނުވާ" ކަމަށެވެ. އައްޑޫގައި ތިބި އެމްޑީޕީގެ މެންބަރުންގެ ފަރާތުން ފުލުފުލުގައި ބަހުގެ ހަމަލާތައް ރައްދުކުރަމުން ދިޔަ ނަމަވެސް، އެ ބަހުގެ ހަމަލާތަކަށް އައްޑޫގައި ތިބި ޕީޕީއެމްގެ މެންބަރުން ރައްދު ދޭ ތަނެއް ނުފެނެއެވެ.
ޤަބޫލުކުރަން ޖެހޭ ހަގީގަތަކީ، އައްޑޫގައި އަޅާނެ ކަމަށް ބުނާ "100 އެނދުގެ ހޮސްޕިޓަލް" އަކީ އެތައް ރައްޔިތުންނެއް ޒަމާންތަކެއް ވަންދެން ދެކެމުން އަންނަ ހުވަފެނެކެވެ. ސަރުކާރު ހިންގާ ޕާޓީގެ މުވައްޒަފުންގެ ގޮތުގައި، ތިބި ބަޔަކު ވަޒީފާގެ ގޮތުން ސަރުކާރަށް ސަނާ ކިޔަމުން ދިޔަ ނަމަވެސް ގިނަ ޕީޕީއެމް މެންބަރުން ތިބީ ޚަބަރު ހުސްވެފައެވެ.
" އަހަރުމެން ވެސް ވަރަށް އުއްމީދުކުރިން. އެކަމަކު މިތިބީ މާޔޫސްވެފެއި. ތިކަމާ ވާހަކަ ދައްކަން ބޭނުމެއް ނޫން. އުއްމީދަކީ ކުރިއަށް އޮތް ތަނުގައި ހޮސްޕިޓަލް ކަންތައް ރަގަޅު ވާނެ ކަމަށް. " ޕީޕީއެމްގެ މެންބަރަކު ބުންޏެވެ.
"100 އެނދުގެ ހޮސްޕިޓަލް" ގެ މައްސަލައިގައި ސަރުކާރަށް ސަނާ ކިޔުމަކީ ކޮންމެ ކުލައެއްގައި ހުރި ނަމަވެސް އައްޑޫއަށް އުފަން ރައްޔިތަކަށް ފަސޭހަ ކަމަކަށް ނުވާނެއެވެ. އެއީ ޤަބޫލުކުރަން ޖެހޭ ހަޤީޤަތެކެވެ.