ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގައި ބުނާގޮތުން ވެރިކަމުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. ރައީސުލްޖުމްހޫރިއްޔާގެ މަގާމަށް މީހަކު އިންތިޚާބުކުރަނީ ރައްޔިތުންނެވެ. ރައްޔިތުންގެ މަޖްލިސް އަށް މެމްބަރުން އިންތިޚާބުކުރަނީވެސް ރައްޔިތުންނެވެ. ޤައުމުގެ އެންމެ ބާރުގަދަ ބަޔަކީ، ހަމަ ރައްޔިތުންނެވެ. އެއީ ޤާނޫނު އަސާސީގައި ބުނެފައިވާ ގޮތެވެ.
ރައްޔިތުންނަކީ ޑިމޮކްރަސީގައި އެންމެ ބާރުގަދަ މީހުން ކަމަށް ސިޔާސީ މީހުން އަހަރުމެން ނިކަމެތި ރައްޔިތުންނަށް ވަނީ ވިސްނައިދީފައެވެ. އަހަރުމެން، ރައްޔިތުންގެ ބާރެއް މި ޤައުމުގައި އެބައޮތް ހެއްޔެވެ؟ ޤައުމުގެ ކަންކަމުގައި ބަސްބުނުމުގެ ހައްޤު އަހަރުމެން ރައްޔިތުންނަށް އޮންނަނީ ކިހާވަރަކަށް ހެއްޔެވެ؟ ތަރައްޤީގެ މަޝްރޫޢުތައް ހިންގާނެ ގޮތް ނިންމުމުގެ ބާރު އަހަރުމެން ރައްޔިތުންނަށް އޮވޭ ހެއްޔެވެ؟
ޤައުމުގެ ވެރިކަމަށް މީހަކު އައްޔަން ކުރަނީ ވެސް އަހަރުމެންގެ ވޯޓަކުންނެވެ. އަހަރުމެން ރުހިގެންނެވެ. ރައްޔިތުންގެ މަޖިލިސް މެންބަރުން ވެސް މަޤާމަށް އަންނަނީ އަހަރުމެންގެ ރުހުމާއި އެކުގައެވެ. ނަމަވެސް މަޤާމަށް އާދެވުމާއި އެކު އެމީހުން އަހަރުމެންނަށް ވުރެ ބާރުގަދަ ވަނީއެވެ. ރައީސުލްޖުމްހޫރިއްޔާ ކަމުގައި ހުންނަވާ ބޭފުޅާ އަކީ ވެސް ނަމަކަށް، އަހަރުމެންގެ ރައީސެވެ. ނަމަވެސް އެބޭފުޅާގެ ނިންމުންތައް ގިނަ ފަހަރަށް ހުންނަނީ އަހަރުމެން ރައްޔިތުން އެންމެ ނުރުހޭ ގޮތަށެވެ. ރައްޔިތުންގެ މަޖިލީހުގެ މެންބަރުން ވެސް ޤާނޫނުތައް ފާސްކުރަނީ އެމީހުން ހިތަށް އެރި ގޮތަކަށެވެ.
އަހަރުމެންނަށް ގަބޫލުކުރަން އުނދަގޫވިޔަސް ހަގީގަތަކީ ސަރުކާރުތަކުން ނިންމާ ކޮންމެ ނިންމުމެއް ވެސް ގުޅިފައިވަނީ ރައްޔިތުންގެ މަސްލަޙަތަށް ވުރެ މި ޤައުމުގައި ތިބި ހައެއްކަ މަހުޖަނުންގެ މަސްލަޙަތާއި އެވެ. އެމީހުންގެ ރުހުން ހޯދުމަށް އެމީހުން ބޭނުންވާ ގޮތަކަށެވެ. ފްލެޓެއް އެޅިޔަސް މަގެއް ހެދިޔަސް އެކަމުގައި އެމީހުންގެ ރުހުން ހޯދަން އޭރަކު އޮންނަ ސަރުކާރަކަށް މުހިއްމު ވެއެވެ. އެއީ ކީއްވެގެން ހެއްޔެވެ؟
ރައްޔިތުން އިންތިޚާބުކުރި ރައީސުލްޖުމްހޫރިއްޔާ އާއި، ރައްޔިތުންގެ މަޖުލިސް މެމްބަރުންގެ ކެމްޕެއިން ކުރުމަށް ޚަރަދުކުރި ފައިސާ ދިނީ އެ މަހުޖަނުންނެވެ. އެހެން ކަމުން، މަޤާމުތަކަށް އާދެވުމުން މިއަދު އެބޭފުޅުންނަކީ މަހުޖަނުން އަންގާ ގޮތަށް ކަންތައް ކުރުމަށް ތިބި "އަޅުން" ކަން ޔަޤީނެވެ. އާންމު ރައްޔިތުމީހާ ފުނޑިގެން ދާއިރު އެވާހަކަ ނުދައްކައި ހަނު ތިއްބަވާ މަޖިލިސް މެންބަރުން ވެސް ގޮވާލަނީ "ރައްޔިތުންނަށްޓަކައި" މިވެނި ސޭޓަކަށް "އަނިޔާކުރުން" ހުއްޓާލުމަށެވެ. ނަމަވެސް އާޚިރުގައި އެ ސޭޓު ބޭނުންވެގެން އުޅޭ ކަމެއް ވުމުން ރައްޔިތުންގެ މައްޗަށް އަނިޔާވެރިވުމަށް ޖެހިލުމެއް ނުވެއެވެ.
ދިވެހިރާއްޖޭގެ މިނިވަންކަމަށް 50 އަހަރު ފުރިފައިވާއިރު، ރާއްޖެއަށް ލިބުނު ހުރިހާ ތަރައްޤީއެއް ފެންނަން އޮތީ، ވެރިރަށް މާލޭގައެވެ. އަތޮޅު ތެރޭގައި ދިރިއުޅޭ ރައްޔިތުންގެ އަރުތެރޭގައި ތަރައްޤީގެ ރަހަ ލައްވާލާކަށް ސަރުކާރުން ބޭނުމެއް ނުވެއެވެ. ނުވަތަ ޖެހިލުން ވަނީއެވެ. އެއްކަލަ މަހުޖަނު މީހާގެ ރުހުމެއް ނެތީމައެވެ. އެމީހުން ބޭނުންވަނީ، އެމީހުންގެ "ފިހާރަތަކުގެ" ވަށައިގެން ރައްޔިތުން ބޭތިއްބުމަށެވެ. އެމީހުންގެ "ފިހާރަތައް" ޤާއިމްކޮށްފައިވަނީ ވެރިރަށް މާލެ އާއި ކައިރި ހިސާބުތަކުގައެވެ. އެހެން ކަމުން އެމީހުން ބޭނުންވަނީ މާލެ އަށް ހުރިހާ ރައްޔިތުން ޖަމާކުރުމަށެވެ. އެކަން ފާއިތުވި 50 ވަރަކަށް އަހަރުގެ ތެރޭގައި މިވަނީ ވަރަށް ރަގަޅަށަށް ކޮށްފައެވެ.
މިސާލަކަށް، ރާއްޖޭގެ ރަށްތަކަށް ތަޢާރަފްކުރެވުނު ގެސްޓް ހައުސްގެ ވިޔަފާރި އަށް ނަޒަރު ހިންގާލާށެވެ. އެ ވިޔަފާރީގައި އާންމު ރައްޔިތުންގެ ތެރެއިން ގިނަ ބަޔަކު ގެންދަނީ ނަފާ ހޯދަމުންނެވެ. ނަމަވެސް އެ ވިޔަފާރި ކުރިއެރުވުމަށް ސަރުކާރުން އިސްކަން ދޭ ހެއްޔެވެ؟ ނުދެއެވެ. ނުވަތަ ދޭކަށް ނުވެސް ކެރޭނެއެވެ. ސަބަބަކީ، އެއްކަލަ ހައެއްކަ މަހުޖަނުންގެ މަސްލަޙަތު ހިމާޔަތް ކުރަން ޖެހޭތީއެވެ.
ސަރުކާރުގެ ވެރިން ކިތަންމެ ވަރަކަށް އޮޅުވާލަން މަސައްކަތް ކުރިޔަސް ހަގީގަތް މިއޮތީ ރައްޔިތުންގެ ލޯމައްޗަށް ސާފުކޮށް ފެންނާށެވެ. ޤައުމުގެ ވެރިން މަސައްކަތް ކުރަނީ، އެމީހުންގެ "އޯނަރުން" ކަމުގައިވާ ހައެއްކަ މަހުޖަނުން އަންގާ ގޮތަކަށެވެ. "އޯނަރުން" މުއްސަނދި ކުރުމަށާއި އެމީހުންނަށް ބޭނުންވާ ކަންތައް މަގުފަހިކޮށްދިނުމަށެވެ. އެކަން ނުކޮށްފިނަމަ، މަގާމުތަކުން އެކަހެރި ކުރެވޭނެ ކަން ވެރިންނަށް އެނގެއެވެ. "އޯނަރު"ގެ ބަސްނާހާނަމަ ހުންނަންޖެހޭނީ ޖަލުގައެވެ. ނިޒާމުން ގެއްލުވާލުމުގެ ހަގީގީ ބާރުވެސް އޮތީ ހަމަ "އޯނަރު"ގެ އަތުގައެވެ. އެހެންކަމުން މަޤާމުގައި ދެމިހުންނަން ބޭނުންވާ ވެރިންނަށް އޮތީ "އޯނަރު" އަންގާ ގޮތަކަށް ކަންތައް ކުރުން މަތީ ދެމިހުރުމެވެ. އެގޮތަށް ޢަމަލު ނުކުރާ ވެރިންނަށް ވެގެންދާ ގޮތުގެ މިސާލު 2012 ވަނަ އަހަރު ދިވެހިރާއްޖޭގެ އެންމެހާ ރައްޔިތުންނަށް ވާނީ ފެނިގެން ގޮސްފައެވެ.