ފާއިތުވި އަޟްޙާ ޢީދާއި ގުޅުވައިގެން ސަރުކާރު ބަންދު ކަމަށް އެންމެ ފުރަތަމަ ހަމަޖައްސާފައި އީދު ބަންދަށް އެއް ހަފުތާ ލިބޭ ގޮތަށް ސެޕްޓެމްބަރ މަހުގެ 20 އިން 26 ވަނަ ދުވަހާ ހަމަޔަށް ސަރުކާރު ބަންދުކުރާ ގޮތަށެވެ. ނަމަވެސް އެގޮތަށް އަންގައި ސަރުކާރުން އިއުލާންކޮށްފައި ވަނިކޮށް، ޒުލްހިއްޖާ މަހުގެ ހަނދު ސާބިތު ނުވުމާ ގުޅިގެން،20 21 އަދި 22 ވެސް ބަންދު ނުކުރާ ގޮތަށް ސަރުކާރުން ހަމަޖެއްސިއެވެ.
އެއާއި އެކު ޗުއްޓީއަށް ދިއުމަށް ދަތުރު ރާވައިގެން ތިބި އެތައް ބަޔަކަށް ބޮޑެތި ގެއްލުން ތަކަކާއި ކުރިމަތިވުމާއި ގުޅިގެން ސަރުކާރަށް ފާޑުކިޔުންތައް އަމާޒުވެގެން ދިޔައެވެ. އެ ފާޑުކިޔުންތަކާއި އެކު ދެން ފެނިގެން ދިޔައީ ކުރިން ވެސް ހަމަޖެހިފައި އޮތް ގޮތަށް ޢީދު ބަންދަށް ސެޕްޓެމްބަރ މަހުގެ 20 ވަނަ ދުވަހުން ފެށިގެން 26 ވަނަ ދުވަހާއި ހަމައަށް ސަރުކާރު ބަންދު ކުރުމަށެވެ.
އޭރު ސަރުކާރުގެ ތަރުޖަމާނު ކުރައްވާފައިވާ ޓްވީޓެއްގައި ބުނެފައިވަނީ ސަރުކާރުގެ ނިންމުމަކީ ރައްޔިތުން އެދޭ ނިންމުން ކަމަށާއި އެ ނިންމުންތައް ހުންނާނީ ރައްޔިތުންގެ ލުއިފަސޭހަ އާއި ބޭނުންތަކާއި ގުޅޭގޮތަށް ކަމަށެވެ. ސަރުކާރުގެ ހެޔޮފުޅުކަންތާއެވެ. އެއީ މީގެ ދުވަސްކޮޅެއް ކުރިން ސަރުކާރުން ޖައްސާލި ޕަބްލިސިޓީ ސްޓަންޓެކެވެ. ދައްކަން ބޭނުންވީ ރައީސް މީހާގެ ހެޔޮފުޅުކަމެވެ.
އައްޑޫ ސިޓީގައި އަޅާނެ ކަމަށް ބުނާ "100 އެނދުގެ ހޮސްޕިޓަލް" އެޅުމުގެ ބަދަލުގައި ހިތަދޫ ރީޖަނަލް ހޮސްޕިޓަލް ތަރައްޤީ ކުރާގޮތަށް ނިންމާފައިވާ ކަމަށް ސަރުކާރުގެ ޔޫތް އެންޑް އިކޮނޯމިކް ކައުންސިލުން ހާމަކުރުމާއި ގުޅިގެން އައްޑޫގެ ގިނަ ބަޔަކު ތިބީ ރުޅިގަދަ ވެފައެވެ. އިދިކޮޅު އެމްޑީޕީ އަށް ތާޢީދު ކުރާ މެންބަރުން ގެންދަނީ އެކަމާއި ނުރުހުން ފާޅުކޮށް ސަރުކާރަށް ވަރަށް ބޮޑަށް ފާޑު ކިޔަމުންނެވެ. ހޮސްޕިޓަލްގެ މައްސަލައިގައި އައްޑޫގެ ހުރިހާ ރައްޔިތުންގެ ލޭ ކައްކުވާލައިފިއެވެ.
އައްޑޫ ރައްޔިތުންގެ ރުޅިވެރިކަން ސަރުކާރަށް އިންތިހާއަށް އަމާޒުވެފައިވާއިރު ސަރުކާރުގެ އިސްވެރިންގެ ފަރާތުން އެކަމާއި މެދު އެއްވެސް ކަހަލަ ކަންބޮޑުވުމެއް ނުފެނެއެވެ. އައްޑޫ ސިޓީ ފޭދޫ ދާއިރާގެ މަޖިލިސް މެންބަރު އިބްރާހިމް ދީދީ އާއި ހުޅުދޫ ދާއިރާގެ މެންބަރު ޝާޑުގެ އަޑެއް ވެސް ނީވެއެވެ. ރައްޔިތުންގެ މެދުގައި ހޫނު ބަހުސްތައް ކުރެވެމުން އެބަދެއެވެ. ސޯޝަލް މީޑިޔާ އަށް ބަލާއިރު ޕީޕީއެމް އަށް ނިސްބަތްވާ މެންބަރުންގެ ފާޑުކިޔުންތައް ވެސް ސަރުކާރަށް އަމާޒު ވަމުން ދާކަން ފާހަގަކޮށްލެވެއެވެ.
ސުވާލަކީ، އަންނަ އާދީއްތަ ދުވަހު ޕްރެސް ކޮންފަރެންސެއް ބޭއްވުމަށް ފަހު، ސަރުކާރުގެ ހެޔޮފުޅުކަން ދެއްކުމަށް އައްޑޫގެ ޓާޝިއަރީ ހޮސްޕިޓަލް އެޅުމުގެ މަސައްކަތް ފަށާގޮތަށް ނިންމާފައިވާ ކަމަށް ސަރުކާރުން ހާމަ ނުކޮށްފާނެ ބާއެވެ؟
ޕީޕީއެމްގެ ސަރުކާރަށް 2 އަހަރު ވެގެން ދިޔައިރު ފެންނަމުން ދަނީ، ރައްޔިތުން ލައްވާ ސަރުކާރަށް އާދޭސް ކުރުވުމުގެ ސިޔާސަތު ކަން ކަށަވަރެވެ. ރައްޔިތުން އާދޭސް ކޮށްފިއެވެ. ރައްޔިތުންގެ ލޭ ވެސް ކައްކުވާލައިފިއެވެ. އެހެން ކަމުން އާދީއްތަ ދުވަހު ހޮސްޕިޓަލުގެ މައްސަލައިގައި ސަރުކާރުން ނިންމެވި ގޮތް ބަދަލު ކުރައްވައި ރައީސް ޔާމީން އަނެއްކާވެސް އެމަނިކުފާނުގެ "ހެޔޮފުޅުކަން" ދެއްކެވުމަށް "100 އެނދުގެ ހޮސްޕިޓަލް" ގެ މަސައްކަތް ފެއްޓެވުމަކީ އެކަށީގެންވާ ކަމެކެވެ.
ނަމަވެސް ރައީސް ޔާމީން ޤަބޫލުކުރައްވަން ޖެހިވަޑައިގަންނަވާ ހަގީގަތަކީ، ސަރުކާރުން ޖައްސާ ޕަބްލިސިޓީ ސްޓަންޓުތަކުގެ ގޮތުގައި އައްޑޫ ރައްޔިތުންގެ އިޙްސާސްތަކާއި ކުޅުމަކީ، އެބަޔަކަށް އައްޑޫ ރައްޔިތުންގެ ތާޢީދު ލިބޭނެ ކަމެއް ނޫންކަމެވެ.