ސްޕެނިޝް ލަލީގާ ގައި ޗެމްޕިއަން ބާސެލޯނާ އަދި ޑިޕޯޓިވޯ ލަ ކޮރޫނާ ބައްދަލު ކުރި މެޗު ފަހަތުން އަރައި ދެ ގޯލު ޖަހައި ޑިޕޯޓިވޯ އެއްވަރު ކޮށްފިއެވެ. ބާސާގެ އަމިއްލަ ދަނޑުގައި ކުޅުނު މިމެޗުގެ ފުރަތަމަ ގޯލު މެޗުގެ 39 ވަނަ މިނެޓުގައި ކާމިޔާބު ކޮށްދިނީ ލިއޯ މެސީ އެވެ. މެސީ މިގޯލު ކާމިޔާބު ކުރީ ލިބުނު ހިލޭ ޖެހުމަކުންނެވެ.
ދެވަނަ ގޯލު ދެވަނަ ހާފުގައި ކާމިޔާބު ކޮށްދިނީ އިވަން ރަކިޓިކް އެވެ.
ޑިޕޯޓިވޯގެ ފުރަތަމަ ގޯލު ފެނިގެން ދިޔައީ މެޗުގެ 77 ވަނަ މިނެޓުގައި ލޫކަސް ޕެރެޒްގެ ފަރާތުންނެވެ. ދެވަނަ ގޯލު މެޗު ނިމެން ކައިރިވެފައިވަނިކޮށް، 86 ވަނަ މިނެޓުގައި ކާމިޔާބު ކޮށްދިނީ އެލެހަންޑްރޯ ބާގެންޓިނޯސް އެވެ.
ބާސާ ކޮޅަށް ގޯލު ވަނީ 77 ވަނަ މިނެޓުގައި ޖޯޑީ އަލްބާ ބޭލުމަށްފަހު މެތިއު އޭނާގެ ބަދަލުގައި ކުޅެން ނިކުތް ފަހުންނެވެ. އެޓޭކް ކުރުމަށްފަހު ކައުންޓާގައި ޑިޕޯޓިވޯ ރަނގަޅު ކުޅުމެއްވަނީ ދައްކާފައެވެ. އެމީހުންގެ ގޯލުތައް ޖަހާފައިވަނީ ބާސާގެ ޑިފެންސް ލައިން ފޫއަޅުވާލާފައެވެ.
މެޗުގައި ބާސާ ޖެހި ގޯލު ތަކުގެ އިތުރުން ވެސް ވަނީ ގިނައަދަދެއްގެ ހަމަލާތަކެއް އުފައްދާފައެވެ. ހާއްސަ ކޮށް ލުއިސް ސުއަރޭޒް އަދި މެސީ ގެ ހަމަލާތައް ފާހަގަ ކުރެވެއެވެ. އަނިޔާގެ ސަބަބުން މި މެޗުގައި ބާސާގެ އިތުބާރު ފޯވާޑް ނޭމާރ އަށް ވަނީ ކުޅުމާ ދުރުގައި މަޑުކުރަން ޖެހިފައެވެ.
ރޭގެ މެޗުން އެއްވަރުވެ ބާސާ ތާވަލުގެ އެއްވަނައިގައި އޮތީ ދެވަނައިގައި އޮތް އެތްލެޓިކޯ މެޑްރިޑަށް ވުރެ އެއް މެޗު އިތުރަށް ކުޅެގެންނެވެ. މިރޭ ބިލްބާއޯ އާ ދެކޮޅަށް ކުޅޭ މެޗުން މޮޅުވިއަސް ގޯލުގެ ތަފާތުން އަދިވެސް ބާސާ އޮންނާނީ އެއްވަނައިގައެވެ.
ތިންވަނައިގައި އޮތް ރިއަލް މެޑްރިޑް އޮތީ 5 ޕޮއިންޓު ފަހަތުގައެވެ.