ދިވެހިރާއްޖޭގެ މިނިވަންކަމަށް 50 އަހަރު ވެގެން ދިޔައިރު ތަފާތު 4 ބޭފުޅަކު ވަނީ ރާއްޖޭގެ ވެރިކަން ކުރައްވާފައެވެ. މިހާރު ވެރިކަމުގައި ހުންނެވި ރައީސް އަބްދުﷲ ޔާމީން އަކީ ރާއްޖޭގެ 5 ވަނަ ރައީސުލްޖުމްހޫރިއްޔާއެވެ.
5 ރައީސުންގެ ވެރިކަމުގައި ވެސް ތަފާތު އެކި ސިޔާސަތުތައް ފެނިގެން ގޮސްފައިވެއެވެ. ރައީސް އިބްރާހިމް ނާސިރް ގެންގުޅުއްވި ސިޔާސަތުތަކާއި ރައީސް މައުމޫން ގެންގުޅުއްވި ސިޔާސަތުތައް ވެސް ތަފާތެވެ. ރައީސް ނަޝީދު އާއި ރައީސް ވަޙީދު ވެސް ގެންގުޅެއްވީ ތަފާތު ސިޔާސަތުތަކެކެވެ. ހަމަ އެހެންމެ މިހާރުގެ ރައީސް އަބްދުﷲ ޔާމީންގެ ސިޔާސަތަކީ ވެސް މުޅިން ތަފާތު ސިޔާސަތެކެވެ.
އެހެން ނަމަވެސް 50 އަހަރު ވެގެން ދިޔައިރު އެއްގޮތެއްގައި ބަދަލު ނުވާ ސިޔާސަތެއް ރާއްޖޭގައި ވަނީ އަށަގެންފައެވެ. އެއީ ނިކަމެތި ރައްޔިތުން ފެލާލައިގެން، ބޮޑެތި މަހުޖަނުން ހިތް ރުއްސުމުގެ ސިޔާސަތެވެ. މިކަމަކީ ޤަބޫލުކުރަން ކިތަންމެ ބޭނުން ނުވިއަސް އަޅުގަނޑުމެންގެ ރާއްޖޭގެ ކޮންމެ ދިމާއަކަށް ބަލާލި ކަމުގައި ވިޔަސް ފެންނަން އޮތް ހަގީގަތެވެ.
ދިވެހި ދައުލަތަށް ޓެކްސް ނުދައްކައިގެން ކަންމަތީ ފިހާރަތައް ހިންގާ އެތައް ބަޔަކާއި މެދު ކޮންމެ ދުވަހަކުވެސް ފިޔަވަޅު އަޅަމުންދެއެވެ. ކަންމަތީ ފިހާރައިގައި ވިއްކަން ހުންނަ ކުކުޅު ބިހުގައި އަގު ނުޖަހައިގެން އެތަކެއް ކުދި ވިޔަފާރިވެރިންނާއި މެދު ވަނީ ފިޔަވަޅު އަޅާފައެވެ.
ނަަމަވެސް ދައުލަތަށް ދައްކަންޖެހޭ ޓެކްސް އެއް ނުދައްކައިގެން، ރިސޯޓް އޯނަރަކާއި މެދު ނުވަތަ ރާއްޖޭގައި ނަން މަޝްހޫރު ވިޔަފާރިވެރިޔަކާއި މެދު ފިޔަވަޅު އެޅި ހަނދާނެއް އެބަހުރިހެއްޔެވެ؟ އެމީހުން ދައުލަތަށް ދައްކަން ޖެހޭ ފައިސާގެ ވާހަކަ ދެކެވުމަށް ފަހު ސަރުކާރާއި އެކު ކޮންމެވެސް "އެއްބަސްވުމަކަށް" އައިސްގެން އެމީހުންނާއި މެދު ފިޔަވަޅުތަކެއް ނޭޅި އެކަން ނިމިގެން ދަނީއެވެ.
ދިވެހިރާއްޖޭގެ ސަރުކާރަށް ވުރެ ރާއްޖޭގައި ނުފޫޒު ގަދައީ ބޮޑެތި ވިޔަފާރިވެރިންގެ އޭ ބުނުމުން ބައެއް މީހުންނަށް އެކަން ޤަބޫލުކުރަން ދަތިވެދާނެއެވެ.
ރިސޯޓްތަކުގައި ވަޒީފާ އަދާކުރާ ބިދޭސީންގެ އަދަދު ވަކި ވަރެއްގައި ހިފެހެއްޓުމަށް ޚާއްސަ ގަވާއިދެއް 2006 ވަނަ އަހަރު، އޭރުގެ މިނިސްޓްރީ އޮފް ހަޔާއެޑިއުކޭޝަން، އެމްޕްލޯއިމަންޓް އެންޑް ސޯޝަލް ސެކިއުރިޓީން އާއްމު ކުރިއެވެ. ނަމަވެސް އެ ގަވާއިދު އެކުލަވާލިތާ އަހަރެއް ނުވަނީސް އެގަވާއިދު އުވާލުމަށް ރިސޯޓުތަކުން ސަރުކާރަށް ޕްރެޝަރު ކުރަން ފެށިއެވެ. އޭގެ ފަހުން އެގަވާއިދަށް ވީގޮތެއް ދެނެހުރި މީހަކު ނެތެވެ. މިއީ ރާއްޖޭގައި ތިބި ހައެއްކަ ވިޔަފާރިވެރިންގެ ބާރުގަދަ ކަމުގެ ކުޑަ މިސާލެކެވެ.
ސިޔާސީ ޕާޓީތަކުގެ އިސްވެރިންވެސް ކޮންޓްރޯލު ކުރާ ބަޔަކީ ވެސް ހަަމަ ހައެއްކަ ވިޔަފާރިވެރިންނެވެ. އެހެން ކަމުން އެމީހުން ކޮންމެ ކުލައެއްގައި ތިބި ނަމަވެސް ވެރިކަމަށް އާދެވުމުން މަސައްކަތް ކުރަނީ، އެ ވިޔަފާރިވެރިންގެ ހައްޤުތައް ހިމާޔަތް ކުރުމަށެވެ.
އެމްޑީޕީގެ ސަރުކާރުގައި ރާއްޖޭގެ މަޝްހޫރު ވިޔަފާރިވެރިޔަކު 100 މިލިޔަން ރުފިޔާއިން ޖުރިމާނާ ކުރެވިގެން ދިޔައެވެ. އެކަމާއި ގުޅިގެން އެ ސަރުކާރު ވައްޓާލުމަށް އެ ވިޔަފާރިވެރިޔާ ޚަރަދު ކުރިކަމަށް ވެސް ސިޔާސީ ބައެއް ފަރާތްތަކުން ވާހަކަ ދައްކައެވެ. އަހަރުތަކެއް ފަހުން އެމްޑީޕީގެ ލީޑާޝިޕުން ވެސް ބުނެފައިވަނީ، އެ ވިޔަފާރިވެރިޔާ ޖުރިމާނާ ކުރުމަކީ ހެދުނު "ގޯހެއް" ކަމަށާއި، އެއީ އޭނާ އަށް ދެވުނު "އަނިޔާއެއް" ކަމަށެވެ. ކަންމަތީ ފިހާރަ ހިންގާ މީހާ ކިތަންމެ ބޮޑު އަދަދަކުން ޖުރިމާނާ ކުރިއަސް އެއީ މައްސަލައެއް ނޫނެވެ.
މި ދެންނެވި ހައެއްކަ ވިޔަފާރިވެރިން ހިންގާ މަޝްރޫޢު އަކަށް ދަތިވާ ގޮތަށް ރާއްޖޭގެ ހުރިހާ ރައްޔިތުން ބޭނުންވިޔަސް އެކަމެއް ކުރާކަށް ސަރުކާރުން ހުއްދައެއް ނުދޭނެއެވެ. އޭގެ މިސާލަކީ، ހުޅުމާލޭގައި ވިޔަފާރިވެރިއަކު ހަދާ ހޮސްޕިޓަލެއްގެ މަސައްކަތް ކުރިއަށް ދާތީ، އެ ވިޔަފާރިވެރިޔާގެ "ޕްލޭންތަކެއް" ހުރުމުން އެކަމަށް ދަތިވެދާނެތީ އައްޑޫގައި އަޅަން ނިންމާފައިވާ 100 އެނދުގެ ހޮސްޕިޓަލް ބިނާކުރުން މަޑުޖައްސާލުމެވެ.
މިފަދަ އެތަކެއް މިސާލުތަކެއް ރާއްޖޭގެ ކޮންމެ ހިސާބަކަށް ނަޒަރު ހިންގާލި ކަމުގައި ވިޔަސް ފެނިގެންދާނެއެވެ. ރާއްޖޭގައި ކޮންމެ ސަރުކާރަކުން ވެރިކަން ކުރަމުން ދިޔަ ނަމަވެސް ބަދަލު ނުވާ ސިޔާސަތަކީ، ހައެއްކަ ވިޔަފާރިވެރިން ހިތް ރުއްސުމުގެ ސިޔާސަތެވެ. އަޅުގަނޑުމެންނަށް ސަރުކާރުގެ މަޤާމުތަކުގައި ތަފާތު ބޭފުޅުން ފެނުނަސް އެމީހުން ކޮންޓްރޯލް ކުރަނީ، އިންތިޙާބްތަކަށް މިލިޔަނުން ޚަރަދުކުރި މި ހައެއްކަ ވިޔަފާރިވެރިންނެވެ.