ސީޕްލޭންގެ ޚިދުމަތް ދިނުމާއި ބެހޭގޮތުން މޯލްޑިވިއަން އާއި އޭއައިއޭ އާއި ދެމެދު މަޝްވަރާތައް ކުރެވިފައިވާއިރު، އެ ޚިދުމަތް ފެށުމާއި އެކު ގއ. އަދި ގދ. އަތޮޅުގައި ހިންގާ ރިސޯޓުތަކަށް ފަތުރުވެރިން ގެންދިއުމަށް ފަސޭހަވެގެންދާނެ ކަމަށް އޭއައިއޭ އިން ވަނީ ބުނެފައެވެ.
'މޯލްޑިވިއަން' ގައި މިވަގުތު ބޭނުންކުރަމުން ގެންދަނީ އެންމެ 6 ސީޕްލޭން އެވެ. އިތުބާރު ހުރި ގޮތެއްގައި 'އައްޑޫލައިވް' އަށް އެނގިފައިވާ ގޮތުގައި
އޭގެ ތެރެއިން ބައެއް ސީޕްލޭންތަކަކީ ރާއްޖޭގައި ރިސޯޓުތަކެއް ހިންގާ ބޭރުގެ ކުންފުންޏަކުން ސްޕޮންސާރ ކޮށްފައިވާ ސީޕްލޭންތަކެކެވެ.
އެހެން ކަމުން ސްޕޮންސާރ ކުރި އެކުންފުނީގެ ދަތުރުތައް ދޫކޮށްލުމަށްފަހު 'މޯލްޑިވިއަން' އިން ރާއްޖޭގެ އެންމެ ދެކުނަށް ދަތުރުތައް ބަދަލުކޮށްލުމަކީ ކޮށްފާނެ ކަމެއްތޯ ސުވާލު އުފެދެއެވެ. މިހާރު 'މޯލްޑިވިއަން' ފްލީޓްގައި ހިމެނޭ 6 ސީޕްލޭންގެ ތެރެއިން އެންމެ ސީޕްލޭން އެއް އައްޑޫއަށް ފޮނުވައިގެން އެ ޚިދުމަތް ދެވިދާނެތޯ ސުވާލު އުފެދެއެވެ.
ގއ. އަދި ގދ. ގައި 7 ރިސޯޓެއް ހިންގަމުން އަންނައިރު އެ ރިސޯޓުތަކުގެ ބެޑް ކެޕޭސިޓީ އަކީ 1032 އެނދެވެ. އިންޓަނޭޝަނަލް ފްލައިޓުތަކެއް ގަމަށް އޮޕަރޭޓްކުރަން ފެށި ކަމުގައި ވިޔަސް އެންމެ 15 މީހުންގެ ޖާގައިގެ ސީޕްލޭން އެއް ބޭނުންކޮށްގެން އެކަށީގެންވާ ގޮތެއްގައި އެ ޚިދުމަތް ދެވިދާނެތޯ ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކުން ސުވާލު އުފައްދައެވެ.
" މޯލްޑިވިއަން ފްލީޓުގައި އޮތް 6 ބޯޓު[ސީޕްލޭން] މިހާރު ވެސް އެއުޅެނީ ސަލާމަތް ނުވެގެން. އެހާ ދަތުރުތައް މާލޭ ކޮޅުގައި ގިނަ. ދެން ޓަސްލާފައި އޭގެ ތެރެއިން އެންމެ އެއްޗެއް[ސީޕްލޭން] އައްޑޫއަށް ފޮނުވާލިއަސް ދަތުރުތަކަށް ބުރޫ އަރާނެ. ދެން އިތުރަށް ގެނައުމަކީ ވެސް ކުންފުންޏަށް އިތުރު ބުރައަކަށް ވާނެ." ރާއްޖޭގެ މަޝްހޫރު ރިސޯޓެއްގެ ރިޒަވޭޝަންސް އޮފިސަރަކު ބުންޏެވެ.
'މޯލްޑިވިއަން'ގެ އޮފިޝަލަކު ނަން ހާމަނުކުރުމަށް ޝަރުތުކޮށް 'އައްޑޫލައިވް' އާއި ވާހަކަ ދައްކަމުން ބުނި ގޮތުގައި އެކުންފުނީގެ ފަރާތުން އައްޑޫގައި ސީޕްލޭންގެ ޚިދުމަތް ދިނުމަށް މަޝްވަރާތަކެއް ކުރިއަށް ގެންދިޔަ ނަމަވެސް، އެއީ ފީޒިބަލް ކަމެއްގެ ގޮތުގައި ނުދެކޭ ކަމަށެވެ.ނަމަވެސް 'މޯލްޑިވިއަން' ގެ ވިސްނުމަކީ އަބަދުވެސް ޚިދުމަތްތައް ފުޅާކުރުން ކަމަށް ވާތީ، ރިސްކު ތަކާއި އެކު ވެސް އެކަން ފެށުމަކީ އެކަށީގެންވާ ކަމެއް ކަމަށެވެ.
" ބިޒްނަސް ވައިސް ކޮށް ބަލާއިރު އެހާ ފީޒިބަލް އެއް ނޫނޭ ބުނަން ޖެހޭނީ. އެކަމަކު ނުފަށާނެ އެކޭ ވެސް ނުބުނާނަން. އެކަމަކު ވިޔަފާރި އުސޫލުން ކުރާ ކޮންމެ ކަމެއްގައި ވެސް ބަލާނެ ދެއްތޯ ކުންފުންޏަށް އެންމެ ފައިދާ ބޮޑު ގޮތެއް."
ސުވާލަކީ ދެމެހެއްޓެނިވި ގޮތެއްގައި ސީޕްލޭންގެ ޚިދުމަތް ދިނުމަކީ، 'މޯލްޑިވިއަން' އަށް ކުރެވިދާނެ ކަމެއް ހެއްޔެވެ؟ ޖެޓް ފިއުލްގެ އަގު މައްޗަށް ދާ އިރަށް ޑޮމެސްޓިކް ފްލައިޓްތަކުގެ ޓިކެޓްގެ އަގު ބޮޑުކުރާ، އަދި ޖެޓް ފިއުލްގެ އަގު ދަށަށް ދިޔަ ކަމުގައި ވިޔަސް ޓިކެޓުގެ އަގު ހެޔޮ ނުކުރާ 'މޯލްޑިވިއަން' އަށް "ގެއްލުމެއް" ނުވެ ސީޕްލޭންގެ ޚިދުމަތް ދެމެހެއްޓެނިވި ގޮތެއްގައި ދެވިދާނެ ހެއްޔެވެ؟
އަބަދުވެސް 'ގެއްލުމުގައި' ހިންގާ ކަމަށް ބުނާ 'މޯލްޑިވިއަން' އިން ގަން އިންޓަނޭޝަނަލް އެއާޕޯޓުގައި ސީޕްލޭންގެ ޚިދުމަތް ފެށުމަކީ، ގިނަ ބައެއްގެ ހުވަފެނެއް ކަމުގައި ވިޔަސް ދެމެހެއްޓެނިވި ގޮތެއްގައި އެކަން ކުރުމަށް ބޮޑެތި ގޮންޖެހުންތަކެއް އެބަހުއްޓެވެ.
ދާދިފަހުން ޓޫރިޒަމް މިނިސްޓަރ މޫސާ ޒަމީރު ވިދާޅުވި ގޮތަށް، ގަން އިންޓަނޭޝަނަލް އެއާޕޯޓް އެކަށީގެންވާ ގޮތެއްގައި އޮޕަރޭޓް ކުރަން ފެށޭނީ ދެކުނު ސަރަހައްދުގައި ބެޑް ކެޕޭސިޓީ އިތުރުކޮށްގެންނެވެ. އެހެން ކަމުން އެކަން ފުރިހަމަ ނުކޮށް އަވަސްއަރުވާލައިގެން 'މޯލްޑިވިއަން' ވިޔަސް އަދި އެހެން އެއާލައިނަކަށް ވެސް ދެމެހެއްޓެނިވި ގޮތެއްގައި ސީޕްލޭންގެ ޚިދުމަތް ދިނުމަކީ ފަސޭހަ ކަމެއް ނޫނެވެ.