އާސަންދަ އެކައުންޓްގައި ބާކީ ހުރި ފައިސާ ޖަމާކޮށްދޭނެ ކަމަށް ބުނެ ނުވަތަ ތަފާތު އެކި ޕްރޮމޯޝަންތަކުގެ ނަމުގައި ގުޅައިގެން އާންމު ރައްޔިތުންގެ އަތުން އޮޅުވާލައިގެން ފޭރުމުގެ ކަންތައް މިވަނީ ރާއްޖޭގައި ވަރަށް ބޮޑު މައްސަލައަކަށް ވެފައެވެ.
އެންމެ ފުރަތަމަ ޕްރޮމޯޝަންތަކުގެ ނަމުގައި ގުޅައި ރީލޯޑް އަދި ރާސްޓަސް ކުރުވަން ފެށި ކަންތައްގަނޑު ފުޅާވެގެން ގޮސް ފުލުހުންނާއި ބީއެމްއެލްގެ ނަމުގައި ގުޅައިގެން ބެންކު ކާޑުގެ މައުލޫމާތު ވެސް ހޯދަން މިވަނީ ފަށާފައެވެ.
ބެންކުގެ ކޭޝް ކާޑުގެ ބޭރުގައި ހުންނައ މައުލޫމާތު ތަކަކީ، އޭގެ ބޭނުންކޮށްގެން އިންޓަނެޓުން ވިޔަފާރިކުރެވޭނެ އަދި އެކައުންޓުގައި ހުންނަ ލާރި އެހެން އެކައުންޓަކަށް ޓްރާންސްފާރ ކުރުމަށް ވެސް ބޭނުންކުރެވިދާނެ މައުލޫމާތެވެ. އެހެންވެ އެގޮތަށް މީސް މީހުންނަށް އޮޅުވާލައިގެން ފޭރުމުގެ އެތައް އަމަލެއް މިއަހަރުގެ މިހާތަނަށް ހިންގާފައިވާއިރު، އެފަދަ އަމަލެއް ހިންގި އެއްވެސް މީހަކު މިހާތަނަށް ފުލުހުންގެ ބެލުމުގެ ދަށަށް ގެންދެވިފައެއް ނުވެއެވެ.
އާންމު ރައްޔިތުންގެ އެންމެ ބޮޑު ޝަކުވާ އަކީ ހުރިހާ އެންމެންނަށް ވެސް ގުޅަނީ އެއް ނަންބަރުތަކުން ކަން ފާހަގަކުރެވިފައިވާ އިރު، ފުލުހުންނަށް އަދި ޓެލެކޮމިއުނިކޭޝަން އޮތޯރިޓީއަށް ވެސް އެ ކަން ހުއްޓުވުމަށް ފިޔަވަޅުތަކެއް އެޅިފައި ނުވުމެވެ. އެންމެ ކުޑަމިނުން އެ ނަންބަރުތައް ބްލޮކް ވެސް ނުކޮށްލެވެނީ ކީއްވެގެންތޯ ގިނަ ބަޔަކު ސުވާލުކުރެއެވެ.
ފާއިތުވި ނޮވެމްބަރ މަހުގެ ތެރޭގައި ރައީސުލްޖުމްހޫރިއްޔާއަށް އިންޒާރުދޭ މައްސަލަ އެއްގައި ބާރަށުން 25 އަހަރުގެ ޒުވާނަކު ފުލުހުންގެ ބެލުމުގެ ދަށަށް ގެންގޮސްފައިވެއެވެ. ދެ ގެއެއް ބަލައި ފާސްކުރުމަށްފަހު، 25 އަހަރުގެ ޒުވާނާ ހައްޔަރުކޮށްފައިވަނީ، އޭނާގެ ނަމުގައި ރަޖިސްޓްރީކޮށްފައިވާ ސިމްކާޑް ތަކެއް ބޭނުންކޮށްގެން ރައީސް ޔާމީނަށް އިންޒާރުތައް ދެމުން ގެންދާކަމުގެ މައުލޫމާތު ފުލުހުންގެ އިންޓެލިޖެންސަށް ލިބުމާއި ގުޅިގެންނެވެ.
ސުވާލަކީ، ކޮންމެ ދުވަހަކު ވެސް އާންމު ރައްޔިތުންގެ ތެރެއިން އެތައް ބަޔަކަށް، ރީލޯޑާއި ރާސްޓަސް ހޯދުމަށް އޮޅުވާލައިގެން ގުޅާ ނަންބަރުތަކުގެ މައުލޫމާތު ފުލުހުންގެ އިންޓެލިޖެންސަށް ނޭނގެނީ ހެއްޔެވެ؟
'އައްޑޫލައިވް' އާއި ވާހަކަ ދެއްކި ހިތަދޫއަށް ނިސްބަތްވާ މުހައްމަދު ބުނިގޮތުގައި، ރީލޯޑްކޮށްދިނުމަށް އެދި ގުޅި މީހެއްގެ މައްސަލަ އޭނާ ފުލުހަށް ހުށަހެޅީ އެ ފޯނުކޯލުގައި ހުރެ ކަމަށާއި، ފުލުހުންނަށް އެ ފޯނު ކޯލް ޓްރޭސް ކުރެވެން ޖެހޭނެ ކަމަށް ޤަބޫލުކުރާ ކަމަށެވެ. އެހެން ނަމަވެސް އެދުވަހު އޭނާގެ ބަޔާނެއް ފުލުހުން ނެގި ފަހުން މިހާތަނަށް ދެފަހަރަކު ފުލުހުންނަށް ގުޅި ކަމަށާއި ފުލުހުން މައުލޫމާތު ދިންގޮތުގައި ހުއްޓުމެއް ނެތި އެފަރާތުން ގެންދަނީ މައްސަލަ ތަހުގީގު ކުރަމުންނެވެ.
އެހެން ނަމަވެސް މުހައްމަދު ބުނި ގޮތުގައި، އޭނާއަށް ގުޅި ނަންބަރުން މީގެ 2 ދުވަސް ކުރިން އެހެން މީހަކަށް ވެސް ގުޅާފައިވާ ކަމަށެވެ.
ދާދިފަހުން ފުލުހުން ބޭއްވި ނޫސްކޮންފަރެންސެއްގައި ވެސް އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ނަވާޒު ވަނީ އޮޅުވާލައިގެން ފައިސާ ހޯދުމުގެ ކުށްތައް ހުއްޓުވުމުގައި އެކަށީގެންވާ ކާމިޔާބީއެއް މޯލްޑިވްސް ޕޮލިސް ސާވިސް އިން ހޯދިފައި ނުވާކަމަށް އިއުތިރާފްވެވަޑައިގެންފައެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނަވާޒު ވިދާޅުވެފައިވަނީ، އޮޅުވާލައިގެން ފޯނު ކުރާ ފަރާތްތަކުން ގެންގުޅެނީ އެންމެ އާދައިގެ 'ބައްތި' ފޯނު ކަމަށާއި އެފަދަ ފޯނު ކުރި ތަނަކާއި ފަރާތެއް ހޯދުމަކީ އުނދަގޫ ކަމެއް ކަމަށެވެ. ނަމަވެސް އެފަދަ ވަރަށް ގިނަ މައްސަލަތައް ފުލުހުން ދަނީ ބަލަމުން ކަމަށާއި އެގޮތުން އޮޅުވާލައިގެން ގުޅުމަށް ބޭނުންކުރާ ވަރަށް ގިނަ ފޯނު ނަމްބަރުތައް ހޯދާ އެނަމްބަރުތައް ބްލޮކްކުރުމުގެ މަސައްކަތްވެސް ކުރަމުންދާކަމުގައި ނަވާޒް ވިދާޅުވިއެވެ.
ރައީސް ޔާމީނަށް އިންޒާރު ދިން މައްސަލައިގައި ސިމް ކާޑުގެ ވެރިފަރާތް ހައްޔަރުކުރެވުނު ގޮތަށް، ރީލޯޑް، ރާސްޓަސް އަދި އެކި ޕްރޮމޯޝަންތަކުގެ ނަމުގައި އޮޅުވާލައިގެން މީހުންނަށް ގުޅާ ނަންބަރުތަކުގެ ވެރިފަރާތް ވެސް ފުލުހުންގެ އިދާރާއަށް ހާޒިރުކުރުމުގެ ޤާބިލުކަން ދިވެހި ފުލުހުންގެ ކިބައިގައި ހުންނަން ވާނެއެވެ.