ލިއޯ މެސީ އަދި ލުއިސް ސުއަރޭޒް ގެ ގޯލުތަކާއެކު ބާސާ ވަނީ ފީފާ ކްލަބް ވޯލްޑް ކަޕުގެ ޗެމްޕިއަންކަން ނަގައި މިއަހަރު ތެރޭގައި 5 ވަނަ ތަށި އުފުލާލާފައެވެ. ސްޕެނިޝް ލަލީގާ، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ކޮޕަ ޑެލް ރޭ ވެސް ވަނީ މިއަހަރު ލުއިސް އެންރީކޭގެ ޓީމު ކާމިޔާބު ކޮށްފައެވެ.
ޔޫރަޕުގެ ޗެމްޕިއަން ބާސާ އާއި ސައުތް އެމެރިކަން ޗެމްޕިއަން ރިވާ ޕްލޭޓް ބައްދަލު ކުރި މިމެޗުގެ ފުރަތަމަ ގޯލު ކާމިޔާބު ކުރީ ބަލިވުމުގެ ސަބަބުން ސެމީގައި ބައިވެރި ނުވެވުނު މެސީ އެވެ. ފަހު ދެގޯލު ފެނިގެން ދިޔައީ ސެމީގައި ހެޓްރިކް ހެދި ލުއިސް ސުވަރެޒްގެ ފަރާތުންނެވެ. އަނިޔާގެ ސަބަބުން ސެމީގައި ބައިވެރި ނުވެވުނު ނޭމާ ވަނީ މިމެޗުގައި ގޯލު ޖަހަން އެހީތެރިވެދީފައެވެ.
ޔޫރަޕުގެ ޓީމު ތަކާ އެހެން ބައްރު ތަކުގެ ޓީމުތަކާ ދެމެދު އޮންނަ ފަރަގު ބޮޑު ވެފައި، މިމުބާރާތުގެ ފޯރި ވަނީ ސަޕޯޓަރުންގެ ތެރޭގައި ކުޑަވެފައެވެ. ނަމަވެސް އާޖެންޓީނާގެ ޓީމު ވަނީ މިމެޗުގައި އެދެވޭ ކުޅުމެއް ދައްކާފައެވެ. ގޯލެއް ކާމިޔާބު ނުކުރެވުނު ނަމަވެސް އެޓީމު ވަނީ ހިތްވަރު ދައްކައި އެއް ރޫހެއްގައި މެޗު ކުޅެފައެވެ.
މެޗުގެ ކުރިން ރިވާ ގެ ކޯޗު ވަނީ ބާސާގައި ތިބީ މޮޅު ކުޅުންތެރިން ނަމަވެސް އޭނާގެ ޓީމުގައި ތިބީ ހިތްތިރި ކުޅުންތެރިން ކަމުގައި ބުނެފައެވެ.
ބާސާގެ އަދި ދުނިޔޭގެވެސް އެންމެ މޮޅު އެއް ކުޅުންތެރިޔާ ކަމަށްވާ އާޖެންޓީނާގެ ލިއޯ މެސީ، އޭނާގެ ގައުމުގެ ޓީމަކާ ދެކޮޅަށް ކުޅެން ޖެހުނު މިމެޗުގެ ކުރިން އެމީހުންގެ ކުޅުމަށް ވަނީ ފާޑުކިޔާފައެވެ.
މިއީ ބާސާ އިން ފީފާ ކްލަބް ވޯލްޑް ކަޕް އުފުލި 3 ވަނަ ފަހަރެވެ. 3 ފަހަރު މިތަށި ކާމިޔާބު ކުރި ހަމައެކަނި ޓީމަށް ބާސާ ވަނީ މިހާރު ވެފައެވެ.