ދިވެހިރާއްޖޭގެ އާބާދީގެ 44 އިން ސައްތަ މީހުންނަކީ ހިޖުރަކޮށްފައިވާ މީހުން ކަމަށް ނޭޝަނަލް ބިއުރޯ އޮފް ސްޓެޓިކްސްއިން ބުނެފިއެވެ.
2014 ވަނަ އަހަރުގެ ބޯހިމެނުގެ ނަތީޖާގައި ހިމެނޭ ހިޖުރަކުރުމާބެހޭ ބައިގެ މައުލޫމާތު ހާމަކުރުމަށް ރޭ ބޭއްވި ރަސްމިއްޔާތެއްގައި ނޭޝަނަލް ބިއުރޯ އޮފް ސްޓެޓިސްޓިކްސްއިން ޢާންމުކުރައްވާފައިވާ މަޢުލޫމާތަށް ބަލާއިރު، ރާއްޖޭގެ އާބާދީގައި ހިމެނޭ 338،434 މީހުންގެ ތެރެއިން 44 އިންސައްތަ މީހުންނަކީ އުފަން ރަށް ނޫން އެހެން ރަށްރަށުގައި ދިރިއުޅެމުންދާ މީހުންނެވެ.
ހިޖުރަކޮށްފައިވާ މީހުންގެ އާބާދީގައި އެންމެ ގިނައީ ފިރިހެނުންނެވެ. އެއީ 54 އިންސައްތައެވެ. އަދި 46 އިންސައްތަ އެއީ އަންހެނުންނެވެ. ހިޖުރަ ކުރާ މައިގަނޑު ސަބަބުތަކުގެ ތެރޭގައި، ތައުލީމް ޙާސިލްކުރުމާއި، ވަޒީފާއަދާކުރުމާއި، އަދި އެނބުރި ރަށަށް ދިރިއުޅުން ބަދަލުކުރުން ހިމެނެއެވެ. އެގޮތުން 25 އިންސައްތަ މީހުން ގިނަ ދުވަސްތަކެއް ވަންދެން މާލޭގައި ދިރިއުޅުމަށްފަހު އެނބުރި ރަށަށް ހިޖުރަ ކުރެއެވެ.
މާލެއަށް ހިޖުރަ ކުރާ މީހުންގެ22 އިންސައްތަ މީހުން ހިޖުރަކުރަނީ ތައުލީމް ޙާސިލްކުރުމަށެވެ. 16 އިންސައްތަ މީހުން ހިޖުރަކުރަނީ ވަޒީފާ އަދާކުރުމަށެވެ.