އައްޑޫ އާއި ފުވައްމުލަކު ދެމެދު މިދިޔަ އާދީއްތަ ފެށި ކަނޑު ދަތުރުފަތުރުގެ ނިޒާމް ގާއިމް ކުރުމަށް 70 މިވައްޒަފުން ނަގާފައިވާ ކަމަށާއި، ރައްޔިތުންނަށް އިތުބާރު ކުރެވޭ ފަސޭހަ ހިދްމަތެއް ފޯރުކޮށްދޭނެ ކަމަށް ހިތަދޫ ޕޯޓްސް ލިމިޓެޑް (އެޗްޕީއެލް)އިން ބުނެފިއެވެ.
އެޗްޕީއެލްގެ އެސިސްޓެންޓް މެނޭޖިން ޑިރެކްޓަރ މުހައްމަދު ރަޝީދު (މެޓްރިކްސް މޯޑް) މިއަދު "އައްޑޫލައިވް"އަށް ވިދާޅުވީ ގިނަ މުވައްޒަފުން ތަކަކާއި އެކު އިތުބާރު ކުރެވޭ ރަނގަޅު ފެންވަރެއްގެ ހިދްމަތެއް ފޯރުކޮށްދޭނެ ކަމަށެވެ. އެގޮތުން އެއްގަމާއި ކަނޑު ދަތުރުފަތުރުގެ ކަންކަމަށް އައްޑޫ އާއި ފުވައްމުލަކުން 70 މުވައްޒަފުން ނަގާފައިވާ ކަމަށެވެ.
"ދަތުރު ފަތުރުގެ ނިޒާމް ގާއިމް ކުރުމަށް 70 މުވައްޒަފުން ނަގާފައިވަނީ. އޭގެ ތެރެއިން މިހާރު ވަޒީފާއަށް ނިކުންނަން ފަށާފައިވަނީ ލޯންޗް އަދި ބޯޓު ކެޕްޓަނުންނާއި ކުރޫއިން. ބަސް ދަތުރުފެށުމުން ބާކީ ތިބި މުވައްޒަފުން ވަޒީފާތަކަށް ނިކުންނަން ފަށާނެ" މޯޑް ވިދާޅުވިއެވެ.
މޯޑް ވިދާޅުވީ ދަތުރުފަތުރުގެ ކަންކަމަށް އައްޑޫން 61 މީހަކު ވަޒީފާތަކަށް ނަގާފައިވާކަމަށެވެ. އަދި 9 މީހަކު ފުވައްމުލަކުން ނަގާފައިވާ ކަމަށެވެ.
އައްޑޫ އާއި ފުވައްމުލަކު ދަތުރުފަތުރާއި ގުޅޭ މުހިއްމު މައުލޫމާތު
* ދަތުރުފަތުރުގެ ހިދްމަތާއި ގުޅޭ ހޮޓްލައިން ނަންބަރު: 7959339، 7948778
* ފޭދޫން ހުޅުމީދޫއަށް ހެނދުނު 6 ޖަހާއިރު ފުރުން/ ހުޅުމީދޫން ފޭދޫއަށް ހެނދުނު 7 އިން (ކޮންމެ ދުވަހަކު)
* ފޭދޫން ހުޅުމީދޫއަށް ހަވީރު 4 އިން/ ހުޅުމީދޫން ފޭދޫއަށް ހަވީރު 5 އިން (ކޮންމެ ދުވަހަކު)
* ފޭދޫން ފުވައްމުލަކަށް ހެނދުނު 9 ޖަހާއިރު / ފުވައްމުލަކުން ފޭދޫއަށް މެންދުރު 2 ޖަހާއިރު (ހޯމަ/ ބުރާސްފަތި/ ހޮނިހިރު)
* ފޭދޫ/ ހުޅުމީދޫ/ފޭދޫ ކޮޅަކަށް 25 ރުފިޔާ ދޯނީގައި (ލޯންޗްގައި 55 ރުފިޔާ)
* ފޭދޫ / ފުވައްމުލައް/ ފޭދޫ (ކޮޅަކަށް 290 ރުފިޔާ)
ފޭދޫން ފުވައްމުލަކަށް ހަފްތާއަކު 3 ދަތުރު ކުރުމަށް ޝެޑިއުލްކޮށްފައިވާ އިރު ކޮޅަކަށް ނަގަނީ 290 ރުފިޔާއެވެ. އަދި ހުޅުމީދޫއަށް ކޮންމެ ދުވަހަކު ފެރީ ދަތުރު ބާއްވާ އިރު ދޯނީގައި ކޮޅަކަށް ނަގަނީ 25 ރުފިޔާއެވެ. މިދެމެދުގައި ލޯންޗުން ކުރާ ދަތުރުތަކަށް ނަގަނީ 55 ރުފިޔާއެވެ.
މޯޑް ވިދާޅުވީ ދޯނީގެ ޓިކެޓް، ދޯނިން ލިބުނު ނަމަވެސް ފުވައްމުލަކަށް އަދި ހުޅުމީދޫއަށް ލޯންޗްގައި ދަތުރުކުރާ ފަރާތްތަކުން ރިޒަވޭޝަން ކުރިއާލައި ހަދަން ޖެހޭނެކަމަށެވެ. އަދި އެދަތުރު ތަކަށް ޓިކެޓް ވިއްކާނީ ދަތުރުފަތުރުގެ ކަންކަމަށް ފޭދޫގައި ގާއިމްކޮށްފައިވާ އޮފީހުން ކަމަށެވެ. ފޭދޫގައި ގާއިމް ކުރި އޮފީސް ހުންނަނީ ކުރިން ސިޓީ ފަރުނީޗަރ ފިހާރަ ހިންގި އިމާރާތުގައެވެ.