ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 182 ވަނަ މާއްދާގެ (ހ) ގައި ބަޔާންކޮށްފައިވާ ސިވިލް ސާވިސް ކޮމިޝަނުގެ ބާރުތަކާއި މަސްޢޫލިއްޔަތު ތަކުގެ ތެރޭގައި، " ވަޒީފާތަކަށް މީހުން ހޯދުމާއި، އައްޔަންކުރުމާއި، ބަދަލުކުރުމާއި، މަޤާމުގެ ކުރިއެރުން ދިނުމާއި،ވަޒީފާއިން ވަކިކުރުމުގައި ޢަމަލުކުރުމުގެ އުސޫލްތައް ކަނޑައެޅުން" ހިމެނެއެވެ.
ނަމަވެސް ފިނޭންސް މިނިސްޓްރީގެ ގިނަ އަދަދެއްގެ މުވައްޒަފުން ސަރުކާރުގެ އެހެން އިދާރާތަކަށް ބަދަލުކޮށް، އެ މިނިސްޓްރީގެ މުހިންމު ސެކްޝަންތައް އުވާލަން ނިންމުމާއި ގުޅިގެން ހަޅުތާލުކުރި މުވައްޒަފުންނަށް އިންޒާރު ދެއްވަމުން ރައީސް ޔާމީން ވިދާޅުވެފައިވަނީ، ސަރުކާރުގެ އެއްވެސް މުވައްޒަފަކު އަމިއްލައަށް ވަޒީފާ އަދާކުރާނެ އޮފީހެއް ނުނިންމޭނެ ކަމަށާއި މުވައްޒަފަކު ވަޒީފާ އަދާކުރާނެ އޮފީހެއް ނިންމާނީ ސަރުކާރުން ކަމަށެވެ.
ފިނޭންސް މިނިސްޓްރީގައި މަސައްކަތް ކުރާ ސިވިލް ސާވެންޓުންނަށް ރޭ ރައީސް ޔާމީން ދެއްވި އިންޒާރާއި އެކު ސިވިލް ސާވިސްގެ މުވައްޒަފުން ޢަމަލުކުރަން ޖެހެނީ ރައީސްގެ އެންގެވުމަށްތޯ ނުވަތަ ސިވިލް ސާވިސް ކޮމިޝަނުގެ އެންގުމަށްތޯ މިވަނީ ސުވާލު އުފެދިފައެވެ. އަދި ޤާނޫނު އަސާސީގައި މިނިވަން މުއައްސަސާއެއްގެ ގޮތުގައި ސިވިލް ސާވިސް ކޮމިޝަން ބަޔާންކޮށްފައިވި ނަމަވެސް އެ ކޮމިޝަނުގެ މިނިވަންކަމާއި މެދު ވެސް މިވަނީ ސުވާލު އުފެދިފައެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 115 ވަނަ މާއްދާގައި ރައީސުލްޖުމްހޫރިއްޔާގެ ބާރުތަކާއި މަސްޢޫލިއްޔަތުތައް ބަޔާންކޮށްފައިވާއިރު އޭގެ ތެރޭގައި ސިވިލް ސާވިސް މުވައްޒަފުންގެ ވަޒީފާ ބަދަލުކުރުމާއި ވަކިކުރުމުގެ ބާރުގެ ވާހަކައެއް ނުހިމެނެއެވެ. އެހެން ކަމުން، ސަރުކާރުން ބޭނުން ގޮތަކަށް ސިވިލް ސާވެންޓުންގެ ވަޒީފާ ބަދަލުކުރުމަކީ ނުވަތަ ވަޒީފާއިން ވަކި ކުރުމަކީ ރައީސް އަބްދުﷲ ޔާމީން ކިތަންމެ އިންޒާރެއް ދެއްވި ނަމަވެސް އެމަނިކުފާނަށް ޤާނޫނު އަސާސީގެ ތަރަހައިގެ ތެރެއިން ކުރެވޭނެ ކަމެއް ނޫނެވެ.
މީގެ އިތުރުން ދިވެހި މަސައްކަތްތެރިންގެ މައުޒަރު "މޯލްޑިވްސް އެކްސްޕޯ 2015" ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ޔާމީން ވަނީ، ޤާނޫނު އަސާސީގެ 31 ވަނަ މާއްދާގެ ދަށުން ލިބިފައިވާ ހަޅުތާލުކުރުމުގެ ޙައްޤުގެ ބޭނުންކުރި ފިނޭންސްގެ މުވައްޒަފުންނަށް "އެހެން ކަންތައްތައް ވެސް ވާނެ" ކަމަށް ވިދާޅުވެ އިންޒާރު ދެއްވާފައެވެ.
ރައީސް ޔާމީން "އެހެން ކަންތައްތައް" ކޮންމެ ގޮތެއްގައި މާނަކުރި ނަމަވެސް، ޤާނޫނު އަސާސީ އިން ކަށަވަރުކޮށްދީފައިވާ އަސާސީ ޙައްޤަކަށް އެމަނިކުފާނަކަށް ވެސް ހުރަހެއް ނޭޅުއްވޭނެއެވެ.
ޤާނުނު އަސާސީ އާއި އެއްގޮތަށް ޢަމަލުކުރުމާއި ޤާނޫނު އަސާސީގައި ބަޔާންވެގެންވާ ޙައްޤުތަކާއި މިނިވަންކަން ހިމާޔަތްކޮށް ކުރިއެރުުވުމަކީ ދައުލަތުގެ ޒިންމާއެއްކަން ޤާނޫނު އަސާސީގެ 18 ވަނަ މާއްދާގައި ބުނެފައިވާއިރު ރައީސް ޔާމީން ބައެއް ސިިވލް ސާވެންޓުންނަށް އިންޒާރުތަކެއް ދިނުމަކީ އެމަނިކުފާނު ޤާނޫނު އަސާސީ އާއި ޚިލާފުވުން ކަމުގައި މާނަކުރެވިދާނެއެވެ.
ސިވިލް ސާވިސް ކޮމިޝަނުގެ މުވައްޒަފުންނަށް "ސިވިލް ސާވެންޓުން"ގެ ނަމުން މުޚާތަބުކުރެވުނު ނަމަވެސް އެއީ އެއްވެސް ނޫ ހާލެއްގައި ސަރުކާރު އަޅުންނެއް ނޫނެވެ. ސަރުކާރުން ޖަހާ ބެރަކަށް ނަށަމުން ގެންދިޔަ "ސަރުކާރުގެ މުވައްޒަފުން"ގެ ދައުރު ފެހި ޤާނޫނު އަސާސީ އާއި އެކު ވަނީ މާޒީ ވެގެން ގޮސްފައެވެ. މިހާރުގެ ޤާނޫނު އަސާސީގެ ދަށުން، ސިވިލް ސާވިސް މުވައްޒަފުންގެ ވަޒީފާތަކަށް ބަދަލު ގެނައުމާއި ވަކިކުރުމުގެ ބާރު ލިބިގެންވަނީ، ހަމައެކަނި ސިވިލް ސާވިސް ކޮމިޝަނަށެވެ.