މިއަހަރުގެ އޮކްޓޫބަރު މަހުންފެށިގެން މިމަހުގެ 20 ވަނަ ދުވަހާއި ހަމައަށް 6 ލައްކައަށް ވުރެ ގިނަ ރުފިޔާ އޮޅުވާަލައިގެން އާއްމު ރައްޔިތުންގެ އަތުން ފޭރިގެންފައިވާ ކަމަށް ފުލުހުން ބުނެފިއެވެ.
މޯލްޑިވްސް ޕޮލިސް ސާވިސްގެ މީޑިއާގައި ހާމަކޮށްފައިވާ ލިއުމެއްގައި ބުނެފައިވަނީ އެ އިދާރާގެ ޖެނެރަލް އިންވެސްޓިގޭޝަނަށް ހުށަހަޅާފައިވާ ގިނަ މައްސަލަތަކަކީ ތަފާތު ޕްރޮމޯޝަންތަކުގެ ނަމުގައި މޮޅެތި ވާހަކަދައްކައިގެން މީހުން އަތުން ފޭރިގެންފައިވާ މައްސަލަތައް ކަމަށެވެ.
އެގޮތުން ފާއިތުވި 2 މަހުގެ ތެރޭގައި 65 މައްސަލައެއް ހުށަހެޅިފައިވާ އިރު މިއަހަރުގެ މިހާތަނަށް 350 އަށް ވުރެ ގިނަ މައްސަލަ އެ ޑިޕާޓްމަންޓަށް ހުށަހަޅާފައިވާ ކަމަށް އެ ލިއުމުގައިވެއެވެ.
ގިނަ އަދަދެއްގެ ރައްޔިތުން އަތުން ފޭރެމުންދާ މައްސަލަ އާއި ގުޅިގެން މި ލިއުމުގައި ފުލުހުން އެދިފައިވަނީ ކާޑް މައުލޫމާތު އެއްވެސް ފަރާތަކަށް ހިއްސާ ނުކުރުމަށާއި، ސަމާލުވެ ތިއްބެވުމަށެވެ.
ފާއިތުވި ދެ މަހުގެ ތެރޭގައި ގިނަ އަދަދެއްގެ އޮޅުވާލައިގެން ފައިސާ ފޭރެމުންދާ މައްސަލައާއި ގުޅިގެން ފުލުހުންނާއި، ދިރާގު، އުރީދޫ އަދި ބޭންކް އޮފް މޯލްޑިވްސް ހިމެނޭ ގޮތަށް ވަނީ ނޫސް ކޮންފަރެންސެއް ބާއްވާފައެވެ. އެ ބައްދަލުވުމުގައި އެސިސްޓެންޓް ކަމިޝްނަރ އޮފް ޕޮލިސް އަބްދުﷲ ނަވާޒް ވިދާޅުވީ އެފަދަ ފޯން ކުރާ ފަރާތްތައް ހޯދައި ނުގަނެވޭ ކަމަށެވެ.
ފުލުހުން މިގޮތަށް ބުނެފައިވާ އިރު ގިނަ މީހުންނަށް ފޯނު ކުރަނީ ދިރާގު އަދި އުރީދޫގެ ޕްރިޕެއިޑް ނަންބަރުތަކުންނެވެ. އަދި އެފަދަ ފޯން ނަންބަރުތައް ފުލުހުންނަށް ހުށަހެލުމުން ވެސް އެ ނަންބަރު ތަކަށް އެކްޝަނެއް ނުނެގި އުޅެނިކޮށް އެހެން މީހެއްގެ އަތުން ފޭރިފައިވެސް އެބަވެއެވެ.
މިފަހަކަށް އައިސް ބޭންކް އޮފް މޯލްޑިވްސް ކޯލް ސެންތަރުގެ ނަމުގައި ފޯން ކޯލްތަކެއް ކުރަމުން އަންނަ އިރު އެފަރާތްތަކުން ކާޑް ނަންބަރު ރިޕީޓްވެފައިވާ ކަމަށް ބުނެ ކާޑް ނަންބަރު ހޯދައިގެން އެފަރާތްތަކުގެ އެކައުންޓްގައިވާ ފައިސާ ފޭރިގެންފައި އެބަވެއެވެ.
ދެ މަސް ދުވަހުގެ ތެރޭގައި 6 ލައްކައަށް ވުރެ ގިނަ ރުފިޔާ ފޭރިގެންފައިވާ މައްސަލަ އަކީ ސީރިއަސް މައްސަލައެކެވެ. އަދި މިކަމަށް މިވަގުތުން މިވަގުތަށް ހަރުދަނާ ފިޔަވަޅު އެޅޭނެ ގޮތްވެސް ހެދިފައި އެބަވެއެވެ.
2007 ވަނަ އަހަރު ސެޕްޓެމްބަރު މަހުގެ 29 ވަނަ ދުވަހު ސަލްޓަން ޕާކްގައި ފޯނެއް މެދުވެރިކޮށް އެއްޗެއް ގޮއްވާލި ހާދިސާ އާއި ގުޅިގެން ކަމާއި ބެހޭ ފަރާތްތަކުން ހަރުދަނާ ފިޔަވަޅުތަކެއް އެޅިއެވެ. އެގޮތުން އަމިއްލަ ނަމުގައި ނެތް ނަންބަރުތައް ބްލޮކް ކުރުމާއި، އެފަދަ ކަމެއް ދިމާވެއްޖެ ނަމަ ސިމްގެ ވެރިފަރާތާއި މެދު ފިޔަވަޅު އަޅަން ނިންމުމުން އެތައް ބަޔަކު އެމީހުންގެ ނަމުގައި ތިބި ނަންބަރުތައް އަމިއްލަ ކޮންޓްރޯލްގެ ދަށައް ގެނައެވެ.
ރައްޓެހިންގެ އަތަށް ދީފައި ހުރި ނަންބަރުތައް ބްލޮކް ކުރިއެވެ. ދިރާގާއި އުރީދޫން ސިމް ދޫކުރުމުގެ ކުރިން ފުރިހަމަ މައުލޫމާތު ކަށަވަރު ކުރަންފެށިއެވެ. ނަމަވެސް މިހާރު މިކަންކަން މިވަނީ 2007ގެ ސެޕްޓެމްބަރު މަހުގެ ހާދިސާގެ ކުރިން އޮތް ގޮތަށް ބަދަލުވެފައެވެ.
އެކި މީހުންނަށް ގުޅައި އޮޅުވާލައިގެން ފައިސާ ހޯދަން ގުޅާ ނަންބަރުތަކުގެ ވެރިފަރާތުގެ މައްޗަށް ދައުވާ ކުރަން ފެށުމާއި އެކު މިކަމަށް ހައްލެއް ލިބިގެންދާނެ ކަމަށް ބެލެވެއެވެ. އަދި ޓެރަރިޒަމް ގާނޫންގެ ދަށުން ފުލުހުންނަށް ލިބިފައިވާ ބާރުގެ ބޭނުން ކޮށްގެން މިފަދަ ފޯންކޯލްތައް އަޑުއަހައިގެން އެފަރާތްތައް ހޯދޭނެ ގާބިލްކަން ދިވެހި ފުލުހުންގެ ކިބައިގައި ހުރިކަން ފުލުހުން ވަނީ ބައެއް ހާލަތްތަކުގައި ސާބިތުކޮށްދީފައެވެ.
މުޒާހަރާތައް ފެށެެން ކައިރިވަމުން އަންނަ ވަގުތުތަކުގައި ބިމު އަޑީގައި ރައްކާކޮށްފައި ހުންނަ "ތޫނު ކޮށްފައި" ހުންނަ ދަގަޑު ތަކާއި ކަނޑުގެ 40 މީޓަރު އަޑިއަށް ފައްތާފައި ހުންނަ ހަތިޔާރު މިވަނީ ހޯދާފައެވެ. އަދިވެސް މިފަދަ އެތައް މޮލެތި ހުނަރެއް ފުލުހުންގެ މުވައްސަސާއަށް ލިބިގެންވާ އިރު އާދައިގެ ފޯން ކޯލެއް ކޮށްގެން ފައިސާ ފޭރޭ މީހުން އަތުލައި ގަނެ އެމީހުން ހައްޔަރުކޮށްގެން ގެންދާ މަންޒަރު ނުދެއްކޭތީ ރައްޔިތުންގެ އިތުބާރު ފުލުހުންގެ މައްޗަށް ގެއްލެން މިވަނީ ފަށާފައެވެ.
ރައްޔިތުން ހަމައެކަނި ސަމާލުވެގެން ތިބެގެން މިކަމެއް ނުހުއްޓޭނެއެވެ.އެއަށް ވުރެ ބޮޑަށް ފުލުހުން މިކަމަށް ސަމާލުވެ މިކަން ކުރާ ބަޔަކު އަތުލައިގަންނަން މަސައްކަތް ކުރަން ވެއްޖެއެވެ.