ހަނގުރާމަވެރި ހަތިޔާރު އެތެރެކުރިކަމުގެ ކުށް ސާބިތުވާކަމަށް ކަނޑައަޅައި 11 އަހަރަށް ޖަލަށްލާފައިވާ ކުރީގެ ޑިފެންސް މިނިސްޓަރު މުހައްމަދު ނާޒިމްގެ އިސްތިއުނާފް ޝަރީއަތުގެ 2 އަޑުއެހުމެއް އަންނަ އާދިއްތަ ދުވަހު ބާއްވަން ހައި ކޯޓުން ހަމަޖައްސައިފި އެވެ.
ހައި ކޯޓުގެ ވެބްސައިޓްގައި ބުނެފައިވާ ގޮތުން، އާދީއްތަ ދުވަހުގެ ހެނދުނު 11:15 ގައި އަދި މެންދުރުފަހު 13:00 ގައި ނާޒިމްގެ ހުށަހަޅާފައިވާ، އިސްތިއުނާފް ޝަރީޢަތުގެ އަޑުއެހުންތައް ވަނީ ތާވަލްކުރެވިފައެވެ.
11 އަހަރަށް ނާޒިމް ޖަލަށްލާން ކްރިމިނަލް ކޯޓުން ކުރި ހުކުމް ނާޒިމްގެ ފަރާތުން އިސްތިއުނާފް ކުރުމުން މީގެކުރިން ވެސް އެ މައްސަލައިގެ އަޑުއެހުންތަކެއް ހައި ކޯޓުގައި ވަނީ ބާއްވާފައެވެ. އެގޮތުން އެންމެ ފަހުން އަޑުއެހުމެއް ބޭއްވީ މިމަހުގެ ތިން ވަނަ ދުވަހު އެވެ.
އެންމެ ފަހުން ބޭއްވި އަޑުއެހުމުގައި ދައުލަތުން ވަނީ ކުރިން ހުށަހަޅާފައެވެ. ދައުލަތުގެ ފަރާތުން ހުށަހެޅީ ކޮން ލިޔުމެއް ކަން ނުބުންޏަސް އެ ލިޔުމަކީ ކްރިމިނަލް ކޯޓުން ނާޒިމްގެ މައްސަލަ ނިންމި ފަހުން ލިބުނު ލިޔުމެއް ކަމަށް ވެއެވެ.
ނާޒިމް ޖަލަށްލާން ހުކުމްކޮށްފައި ވަނީ މިދިޔަ ޖެނުއަރީ މަހުގެ ތެރޭގައި އޭނާގެ ކޮޓަރިންގެ ފިސްތޯލައަކާއި ތިން ވަޒަން ފެނުނު މައްސަލައިގަ އެވެ. އެކަމަކު ނާޒިމްގެ ފަރާތުން ބުނަމުންދަނީ އެ ހަތިޔާރުތަކާއި އެއްވެސް ގުޅުމެއް ނޯންނާނެ ކަމަށާއި އެއީ ނާޒިމްގެ އެޕާޓްމެންޓް ބަލާ ފާސްކުރުމަށް ދިޔަ ފުލުހުންނަށް ވުރެ ކުރިން އެގެއަށް ވަން ސްވަޓް ފުލުހުން އެތަނުގައި ބެހެއްޓި އެއްޗެއް ކަމަށެވެ.