މުއިއްޒުއަށް ފަހު ޕީޖީ ކަމަށް ވަޑައިގެންނެވީ، ކްރިމިނަލް ކޯޓުގެ ފަނޑިޔާރު އަލް އުސްތާޛް މުހުތާޒް މުހުސިން އެވެ. ޕީޖީ ކަމަށް މުހުތާޒު މުހުސިން އައްޔަން ކުރުމާއި އެކު އިދިކޮޅު ފަރާތްތަކުން ބުނަމުންދިޔަ އެއް ވާހަކައަކީ، އަލަށް އައްޔަން ކުރެވުނު ޕީޖީ އަކީ ސަރުކާރުގެ ޕަޕެޓެއް ކަމަށެވެ.
އިދިކޮޅު ފަރާތްތަކުގެ ވާހަކަތައް މުހުތާޒު ދޮގުކުރެއްވި ނަމަވެސް އެމަނިކުފާނުގެ ޕީޖީ ކަމުގައި ކުރީގެ ރައީސް މުހައްމަދު ނަޝީދުގެ މައްޗަށް ޓެރަރިޒަމްގެ ދަޢުވާ އުފުލުމާއި، ފުލުފުލުގައި ސިޔާސީ ފަރާތްތަކާއި ދެކޮޅަށް އުފުލަމުން ދިޔަ ދަޢުވާ ތަކާއި އެކު ޕްރޮސިކިއުޓާ ޖެނެރަލްގެ ނަޒާހަތްތެރިކަން ރައްޔިތުންނަށް ދިޔައީ ހާމަވަމުންނެވެ.
އިދިކޮޅު ފަރާތްތަކުން ޕީޖީ މުހުތާޒަށް ފާޑުކިޔަމުން ދިޔަ ނަމަވެސް ސަރުކާރަށް ތާޢީދުކުރާ ފަރާތްތަކުން ދިޔައީ މުހުތާޒުގެ ދިފާޢުގައި ވާހަކަ ދައްކަމުންނެވެ. ޕީޕީއެމްގެ މަޖިލިސް މެންބަރުން ސިފަކުރެއްވި ގޮތުގައި މުހުތާޒަކީ، "ނަމޫނާ" ޕީޖީއެކެވެ.
"ނަމޫނާ" ޕީޖީއެއް ނަމަވެސް، ޕީޖީ މުހުތާޒް މުހުސިން އާއި ކްރިމިނަލް ކޯޓުގެ ފަނޑިޔާރުން "ސިއްރު" ބައްދަލުވުންތައް ބާއްވަމުން ދަނިކޮށް ނޫސްވެރިންވަނީ އެމަނިކުފާނު އަތުލައިގެންފައެވެ. އެދުވަސްވަރަކީ، ކްރިމިނަލް ކޯޓުގައި ރައީސް މުހައްމަދު ނަޝީދު އާއި ކުރީގެ ޑިފެންސް މިނިސްޓަރ ކާނަލް ނާޒިމްގެ މައްޗަށް ޝަރީޢާތް ކުރެވެމުން ދިޔަ ދުވަސްވަރެވެ.
މުހުތާޒު ހީފުޅުކުރެއްވީ ޕީޖީ ކަމުގެ މަޤާމަކީ ސަރުކާރުން އެބޭފުޅާއަށް އެރުއްވި 'ލައިފް ޓައިމް ޖޮބެއް" ކަމަށެވެ. ނަމަވެސް ބޭނުން ގޮތަކަށް މޮޑޭ ފުއްގަނޑެއްގެ ގޮތުގައި ޕީޖީ އޮފީސް ބާއްވާނެ ފުރުސަތެއް އެމަނިކުފާނަކަށް ލިބިވަޑައެއް ނުގެންނެވިއެވެ.
ސަރުކާރުން ބޭނުންވި ފަރާތްތައް ޖަލަށް ލެވުމުން މުހުތާޒް މުހުސިން ލަދުގަންނަވާލުމަށް ފަހު ޕީޖީގެ މަޤާމުން ވަކިކުރީއެވެ. ސަރުކާރަށް މުހުތާޒު ގޯސްވީ، ކުރީގެ ނައިބު ރައީސްގެ މައްޗަށް ދަޢުވާ ކުރަން ފޮނުވުމުން އެމައްސަލަ އަނބުރާ ޕޮލިހަށް ފޮނުވާލުމުންނެވެ. އެއީ ޤާނޫނާއި އެއްގޮތަށް ކުރި ކަމެއް ވިޔަސް އަދި ނޫންކަމުގައި ވިޔަސް އެކަމުގައި ބަސް ބުނުމުގެ ޖާގައެއް މުހުތާޒް މުހުސިން އަކަށް ނުލިބުނެވެ.
"ކެޔޮގަނޑު ކަނޑާލީމާ ގަހުގެ ބޭނުމެއް ނޯވެއޭ" ބުނާ އުސޫލުން ސަރުކާރަށް ބޭނުންވި ކަންތައް ކުރެވުމުން، މުހުތާޒު ވެސް "ކުނި ގޮނޑަށް" އުކާލީއެވެ. ސަރުކާރުގެ އިސްވެރިންގެ ކުރިމަތީގައި "އެޅިހާ ބަތަކަށް ރިހަ" ވިދާޅުވަމުން ދެކޮޅަށް ދުއްވެވުމުން ގެއްލިގެން ދިޔައީ އެބޭފުޅާގެ އަބުރެވެ. މިއަދު މުހުތާޒް މުހުސިން ވެސް މަޤާމުގެ ދަހިވެތިކަމުގައި ކުރެވުނު ކަންތަކުގެ މޮޔަ ވިސްނިވަޑައިގަންނަވާނެއެވެ. ނަމަވެސް، މާ ބޮޑަށް ވެސް މިވަނީ ލަސްވެފައެވެ.
މުހުތާޒު މުހުސިން މަޤާމުން ވަކިކުރެވި އެބޭފުޅާއަށް ވެގެން ދިޔަ ގޮތަކީ، ވިސްނާ ފިކުރުކޮށްފި ނަމަ ދިވެހިރާއްޖޭގެ ޕްރޮސިކިއުޓާ ޖެނެރަލްގެ އޮފީހުގައި މަސައްކަތް ކުރައްވަމުން ގެންދަވާ ހުރިހާ ވަކީލުން ވެސް އެކަމުން ޢިބްރަތް ލިބިގަންނަން ޖެހޭ ކަމެކެވެ. ކަންކަމުގެ ހަގީގަތް ފޮރުވުމަށް ސަރުކާރުން އަންގާ ގޮތަކަށް މުހުތާޒު މަސައްކަތް ކުރެއްވި ނަމަވެސް، ސަރުކާރުން ސިޔާސީ ގޮތުން ބޭނުންވި ކަންތައް ކުރެވުމުން މުހުތާޒު މަޤާމުން ވަކިކޮށްލުމަށް ކުޑަ ހިނދުކޮޅެއް ވެސް ނުނެގިއެވެ.
ޕީޖީ އޮފީހުގެ މަސައްކަތަކީ އެކަމުގެ ތެރެއަށް ސަރުކާރުގެ ނުފޫޒު ފޯރުވެން ޖެހޭނެ މަސައްކަތްތަކެއް ނޫން ކަން ޕީޖީ އޮފީހުގެ ހުރިހާ ވަކީލުންނަށް ވެސް އެނގިވަޑައިގަންނަވާނެއެވެ. ސަރުކާރުގެ ނުފޫޒުތަކަށް ޖާގަ ދެއްވުމުގެ ސަބަބުން ކުރީގެ ޕީޖީ މުހުތާޒް މުހުސިން އަށް މިއަދު ދިވެހި މުޖްތަމަޢްގައި އިޙްތިރާމްކުރާނެ މީހުން މަދުވާނެއެވެ. އަބުރުވެރި ދިރިއުޅުއްވުމެއް އުޅޭނެ ފުރުސަތެއް މިއަދު އެބޭފުޅާއަކަށް ނެތެވެ.
ސަރުކާރުގެ "އަޅުންނަށް" ވެވަޑައިގެން ނުތިއްބަވައި ޕީޖީ އޮފީހުގެ ހުރިހާ ވަކީލުން ވެސް ނުފޫޒުން އެއްކިބާވެ މަސައްކަތް ކުރައްވަން ވެއްޖެއެވެ.