ކޮންމެ އަހަރަކު ވެސް ޖެހިގެން އޮންނަ އަހަރުގެ ބަޖެޓު ފާސް ކުރާއިރު އަތޮޅުތެރޭގައި ހިންގާނެ މަޝްރޫއުތަކެއްގެ ވާހަކަ ސަރުކާރުން ދައްކައެވެ. އެތައް މިލިއަން ރުފިޔާ ކޮންމެ އަހަރަކު ވެސް އަތޮޅުތެރޭގެ މަޝްރޫޢުތަކަށް ބަޖެޓުގައި ހިމެނެއެވެ. ނަމަވެސް އެ އަހަރު ނިމިގެންދާއިރު، އޭގެ ތެރެއިން ގިނަ މަޝްރޫޢުތަކުގެ އަމަލީ މަސައްކަތެއް ނުފެށެއެވެ.
އަތޮޅުތެރޭގެ މަޝްރޫޢުތައް ފެށުން ލަސްވެގެން ރައްޔިތުން ޝަކުވާކުރަން ފެށުމުން ސަރުކާރުން އަބަދުވެސް ދައްކާ ވާހަކައަކީ، ބައެއް މަޝްރޫއުތަކަށް ބަޖެޓު ދީފައިވަނީ އެ މަޝްރޫއުތައް ފަށައިގެން މުޅިން ނިންމާލެވޭ ވަރަށް ނޫން ކަމަށާއި، ނަމެއްގައި މަޝްރޫޢުތައް ފަށައިގަންނަން ބޭނުން ނުވަނީ ކަމަށެވެ. ރައްޔިތުންނަށް ވިސްނައިދެނީ ބަޖެޓު ތާށިކަމުން ބޭނުންވާ ސްޕީޑުގައި މަޝްރޫޢުތައް ކުރިއަށް ނުގެންދެވެނީ ކަމަށެވެ.
ދިވެހި ދަޢުލަތަކީ ފަޤީރު ދަޢުލަތަކަށް ވެގެން ދަނީ ހަމައެކަނި އަތޮޅުތެރޭގައި މަޝްރޫޢުތައް ހިންގަން ވީމައެވެ. މިއީ ދިވެހިރާއްޖެއިން ފެންނަން އޮތް ހަގީގަތެވެ. ބަޖެޓު ތާށިވެގެން ދައުލަތުގައި ފައިސާ ނެތިގެން އަތޮޅުތެރޭގައި ހިންގަން ސަރުކާރުން ވަޢުދުވެފައިވާ އެތައް މަޝްރޫޢެއް ވަނީ ހުއްޓިފައެވެ.
އަތޮޅުތެރޭގެ މަގުތަކުގައި އެތުރުމަށް ފޮނުވާފައިވާ ގާތައް ވެސް، ދައުލަތުގެ ބަޖެޓު ތާށިވެގެން "އެމަޖެންސީ" ވެގެން މާލޭގައި ހިންގާ 'ކުއްލި' މަޝްރޫޢުތަކަށް ބޭނުންވެގެން ގެންދަނީއެވެ. ރަށެއްގެ ރައްޔިތުންނަށް ދިމާވެފައިވާ ކަރަންޓުގެ މައްސަލަ ހައްލުކުރަން ފޮނުވާ އިންޖީނު ވެސް ޖެހިގެން އަންނަ ދުވަހު މާލޭގެ ކޮންމެވެސް ބޭނުމަކަށް "އެމަޖެންސީ" ވެގެން ގެންދަނީއެވެ.
ބަޖެޓު ތާށިވެގެން، ދިވެހި ދައުލަތް ދަރަނިވެރިވެދާނެ ކަމުގެ ބިރަށްޓަކައި، އަތޮޅުތެރޭގެ މަޝްރޫޢުތައް ހުއްޓާލަން ޖެހޭ ކަމަށް ބުނާ ވާހަކަ އަކީ އޮޅުވާލުމެކެވެ. ސަރުކާރުގެ ފަރާތުން މާލޭގައި "ކުއްލި" މަޝްރޫއުތައް ހިންގަން ހިތައް އެރުމާއި އެކު އެކަމަށް ޚަރަދުކުރާނެ ފައިސާ އޮހެނީ ހެއްޔެވެ؟
އާ އަހަރު ފާހަގަކުރުމަށް ބާއްވާ މިއުޒިކް ޝޯވް އަކަށް މާލޭގެ ކާނިވާ ސަރަހައްދުގައި ފާރުތައް ރާނައި އެ ސަރަހައްދުގެ ރީތިކުރުމުގެ "ކުއްލި" މަޝްރޫޢުއެއް މިހާރު ވަނީ ފަށައިފައެވެ. އެ މަސައްކަތް ރެއާއި ދުވާލު ކުރަމުން ގެންދާއިރު، ބަޖެޓުގެ އެއްވެސް ތާށިކަމެއް ނެތެވެ. ރާއްޖެއިން ބޭރުން ބޮޑު އަގު ދީގެން ގެންނަ މިއުޒިކު ފަންނާނުންނަށް އެތައް މިލިއަން ރުފިޔާއެއް ޚަރަދުކުރަން ބަޖެޓުގައި ފައިސާ ހުރެއެވެ.
ދިވެހިދައުލަތުގެ ބަޖެޓް ހުސްވަނީ، އަދި ދިވެހި ދައުލަތް ފަޤީރު ވަނީ ހަމައެކަނި އަތޮޅުތަކުގައި މަޝްރޫޢުތައް ހިންގަން ޖެހުނީމައެވެ. ނުވަތަ މިސްކިތްތަކުގެ އޭސީ ތަކުގެ ކަރަންޓު ބިލަށް ފައިސާ ދައްކަން ވީމައެވެ.