ދިވެހިރާއްޖޭގައި ކުރެވޭ ހުރިހާ ވިޔަފާރިއަކީ އެއްބަޔަކަށް ކޮންޓްރޯލް ކުރެވޭ އެއްޗަކަށް ވެގެން ނުވާނެ ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
'ރާއްޖެ ޓީވީ'ގެ ޕްރޮގްރާމެއްގައި ވާހަކަފުޅު ދައްކަވަމުން ޝަރީފް ވިދާޅުވެފައިވާ ގޮތުގައި އެންމެ އާދައިގެ މީހާވެސް ކާންބޯންވާނެ ކަމަށާއި ބޯހިޔާވަހިކަން ބޭނުންވާނެ ކަން ދެނެގެން އިޤްތިސާދީ މަންފާ ހުރިހާ ރައްޔިތުންނަށް ވެސް ހަމަހަމަ ކަމާއި އެކު ބެހިގެން ދާންވާނެ ކަމަށެވެ.
ހުރިހާ ފަންތީއެއްގެ ރައްޔިތުންނަށް ވެސް އިޤްތިސާދީ މިނިވަންކަން ލިއްބައިދޭން ޖެހޭނެ ކަން ފާހަގަ ކުރައްވައި ވާހަކަ ދައްކަވަމުން ޝަރީފް ވަނީ އިޤްތިސާދު ވަކި ބަޔަކު ކޮންޓްރޯލް ކުރުމަކީ ރަގަޅު ކަމެއް ނޫންކަން ފާހަގަކުރައްވާފައެވެ.
ޝަރީފް ވިދާޅުވި ގޮތުގައި ކޮންމެ ޤައުމެއްގައިވެސް ދައުލަތައް ފައިސާ ވަންނަންޏާ އޭގެ ސަބަބުން ހުރިހާ ރައްޔިތުންނަށް ވެސް އޭގެ އަސަރު [މަންފާ] ކުރާނެ ކަމަށެވެ.