ވެރިރަށް މާލޭގައި ވެސް ޤަވާއިދާ ޚިލާފަށް ޕާކް ކުރާ ވެހިކަލްތަކުގައި ސްޓިކާ ޖަހާ އުސޫލުން އައްޑޫގައި ވެސް ޕާކިން ސްޓިކާ ޖެހުމަށް ފުލުހުން ތައްޔާރުވަމުން އެބަދެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ޕާކިން ސްޓިކާ ޖެހުމާއި ބެހޭގޮތުން މަޝްވަރާކުރުމަށް ފުލުހުންނާއި ކައުންސިލާއި ދެމެދު ވަނީ ބައްދަލުވުންތަކެއް ވެސް ބާއްވާފައެވެ.
ކައުންސިލްގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި އައްޑޫގައި ޕާކިން ސްޓިކާ ޖަހަން ފަށާނީ، މަގުތައް ކުރެހުމުގެ މަސައްކަތް ނިމި، 1 މަސް ދުވަހުގެ މުއްދަތެއް ދިނުމަށް ފަހު ކަމަށެވެ.
އައްޑޫގައި ތާރުއަޅައިގެން ހަދާ މަގުތަކުގައި ރޯޑް ސައިންތައް ކުރެހުމުގެ މަސައްކަތް އެމްއާރްޑީސީގެ ފަރާތުން މިހާރު ވަނީ ނިންމާލާފައެވެ. އަދި ތާރު އަޅައިގެން ހަދާފައިވާ މަގުތަކުގައި ޕާކިން ޒޯންތައް ކުރެހުމުގެ މަސައްކަތް ހައުސިން މިނިސްޓްރީގެ ފަރާތުން ގެންދަނީ ކުރަމުންނެވެ.
ކައުންސިލްގެ އޮފިޝަލް ބުނިގޮތުގައި، އައްޑޫ ސިޓީގައި މަސައްކަތް ކުރާ ފުލުހުންގެ އަތުގައި މިވަގުތު، 3000 ޕާކިން ސްޓިކާ ހުރި ކަމަށް ކައުންސިލާއި އެކު ބޭއްވި ބައްދަލުވުމެއް ފުލުހުން މައުލޫމާތު ދެއްވާފައިވާ ކަމަށެވެ.
އާންމު ގޮތެއްގައި ޕާކިން ސްޓިކާއެއް ސައިކަލުގައި ޖަހާ ފުރަތަމަ ފަހަރު އެ ސްޓިކާއަށް ދައްކަން ޖެހެނީ، -/250 ރުފިޔާއެވެ. ދެވަނަ ފަހަރަށް ޖަހާ ސްޓިކާއަށް -/500 ރުފިޔާ ދައްކަން ޖެހޭއިރު، އޭގެ ފަހުން ޖަހާ ކޮންމެ ސްޓިކާއަކަށް -/750 ރުފިޔާގެ ރޭޓުން ފައިސާ ދައްކަން ޖެހެއެވެ.
މިހާތަނަށް ރާއްޖޭގައި ޕާކިން ސްޓިކާ ޖަހަމުން އަންނަނީ ހަމައެކަނި ވެރިރަށް މާލޭގައެވެ.