ފުރަގަސް ފަރާތަށް މަސްތުވާ ތަކެތި ޖަހައިގެން އައްޑޫ ސިޓީ ހުޅުދޫއަށް ދާން އުޅުނު މީހަކު ހައްޔަރުކޮށްފިއެވެ.
މިމައްސަލާގައި ހައްޔަރުކޮށްފައިވަނީ ޢުމުރުން 34 އަހަރުގެ ދިވެހި ފިރިހެނެކެވެ.
ފުލުހުންގެ ވެބްސައިޓްގައި ބުނެފައިވާގޮތުން ފުރަގަސް ފަރާތަށް މަސްތުވާ ތަކެތި ޖަހައިގެން އައްޑޫ ސިޓީ ހުޅުދޫއަށް ދާން އުޅޭކަމަށް ފުލުހުންނަށް ލިބުނު އިންޓެލިޖެންސް މައުލޫމާތާއެކު އެމީހާ ހައްޔަރުކޮށް ހޮސްޕިޓަލަށް ގެންގޮސް އެކްސްރޭ ނެގިއިރު އޭނާގެ ފުރަގަސް ފަރާތަށް އެއްޗެއް ޖަހާފައި ހުރިކަން ވަނީ ފާހަގަ ކުރެވިފައެވެ.
މިމައްސަލާގައި އޭނާގެ ފުރަގަސް ފަރާތަށް ޖަހާފައިވާ ތަކެތި ޑޮކްޓަރުންގެ އެހީތެރިކަމާއެކު ނަގައި ބެލިއިރު މަސްތުވާތަކެތި އަޅާފައިހުރި ބުލެޓް ސައިޒުގެ 4 ޕެކެޓް ލާފައިވާ 'އެއްޗެއް' ފެނިފައިވާ ކަމަށް ފުލުހުން ވަނީ ބުނެފައެވެ.
މިމައްސަލާގައި އޭނާ ހައްޔަރުކޮށް އޭނާގެ ބަންދާމެދު ގޮތެއް ނިންމުމަށް ކޯޓަށް ގެންދިއުމުން މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބަހައްޓައިގެން މައްސަލަ ތަޙުޤީޤު ކުރަން 15 ދުވަހުގެ ބަންދުގެ މުއްދަތު ސ. ފޭދޫ މެޖިސްޓްރޭޓް ކޯޓުން ވަނީ ދީފައެވެ.
މިމައްސަލަ އައްޑޫ ސިޓީ ހިތަދޫ ޕޮލިސް ސްޓޭޝަނުން ދަނީ އިތުރަށް ތަޙުޤީޤު ކުރަމުންނެވެ.