ހިތަދޫ ރީޖަނަލް ހޮސްޕިޓަލުގެ އިސްވެރިޔަކަށް ސ.ހިތަދޫ، ރިއާޒް، ޢަބްދުﷲ ޖަމީލު ހަމަޖައްސައިފިއެވެ.
ހިތަދޫ ހޮސްޕިޓަލުގެ މެނޭޖަރ ކަމުގެ މަޤާމަށް އައްޔަން ކުރައްވާފައިވާކަން އަބްދުﷲ ޖަމީލް ވަނީ 'އައްޑޫލައިވް' އަށް ކަށަވަރުކޮށްދީފައެވެ.
އަބްދުﷲ ޖަމީލް ހިތަދޫ ރީޖަނަލް ހޮސްޕިޓަލުގެ މެނޭޖަރުގެ މަޤާމަށް ހަމަޖެއްސުމާއި އެކު މީގެ ކުރިން ހޮސްޕިޓަލުގެ މެނޭޖަރު ކަމުގެ މަޤާމު އަދާކުރައްވަމުން ގެންދެވި ޚަދީޖާ ހަފްސާ ވަނީ ޑެޕިއުޓީ މެނޭޖަރަކަށް ބަދަލުކޮށްފައެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި މިމަހުގެ 21 ވަނަ ދުވަހު ޢަބްދުﷲ ޖަމީލު އެ މަޤާމަށް އައްޔަން ކުރިކަން ރައީސް އޮފީހުން ވަނީ އެބޭފުޅާއަށް އަންގާފައެވެ. ނަމަވެސް ހެލްތް މިނިސްޓްރީއިން ނިންމަންޖެހޭ ބައެއް ކަންތައްތައް ހުރުމާއި ގުޅިގެން ހޮސްޕިޓަލުގެ ވަޒީފާއަށް ނިކުންނަވަން ފެއްޓެވީ އިއްޔެއެވެ.
ކުރީގެ ރައީސް މައުމޫންގެ ވެރިކަމުގައި ފ އަތޮޅާޢި އދ. އަތޮޅުގެ އަތޮޅުވެރިކަން ކުރައްވާފައިވާ އަބްދުﷲ ޖަމީލް ވަނީ 2014 ވަނަ އަހަރުގެ ލޯކަލް ކައުންސިލް އިންތިހާބުގައި އައްޑޫ ސިޓީ ކައުންސިލްގެ މެންބަރުކަމަށް ޖުމްހޫރީ ޕާޓީގެ ޓިކެޓެއްގައި ވާދަކުރައްވާފައެވެ. އެފަހަރުގެ އިންތިޙާބުގައި ޖަމީލަށް ނާކާމިޔާބީ އާއި ކުރިމަތިލައްވަން ޖެހިވަޑައިގެންނެވި އިރު ލިބުނީ، 206 ވޯޓެވެ.