އައްޑޫ ސިޓީގެ ގުޅިފައިވާ ރަށްތަކަށް ކަރަންޓް ދިނުމަށް ބޭނުންކުރާ އިންޖީނުތަކަށް ލޯޑް ބޮޑުވާ ގަޑިތަކުގައި އަނެއްކާ ވެސް ދޭތެރެ ދޭތެރެ އިން ކަރަންޓް ކަނޑަން ފަށައިފި އެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި އިންޖީނުތަކަށް ލޯޑް ބޮޑުވާ ގަޑިތަކުގައި، ބައެއް ސަރަހައްދުތަކުން ބައި ގަޑިއެއްހާ އިރަށް އެކި ގަޑުތަކުގައި ކަރަންޓް ދަނީ ކަނޑަމުންނެވެ.
ފެނަކަ އައްޑޫ އޮފީހުގައި މަސައްކަތް ކުރާ މުވައްޒަފަކު ބުނި ގޮތުގައި އިންޖީނުތަކަށް ލޯޑް ބޮޑުވެފައި ވަނީ، މި ދުވަސްކޮޅަކީ އައްޑޫ އަށް ހޫނުގަދަ ދުވަސްވަރަކަށް ވުމުގެ ސަބަބުން ދުވާލުގެ ގަޑިތަކުގެ އިތުރަށް ރޭގަނޑު ވެސް ކަރަންޓް ބޭނުން ކުރާ މިންވަރު އިތުރުވެގެން ދިއުމާއި ގުޅިގެން ކަމަށެވެ.
ކުރިން އެންގުމަކާއި ނުލައި ބައެއް ސަރަހައްދުތަކުން ކަރަންޓު ކަނޑަމުންދާ މައްސަލައިގައި ފެނަކަ ކޯޕަރޭޝަނުގެ އައްޑޫ އޮފީހުގައި ތިއްބަވާ ބޭފުޅުންނާއި ގުޅަން 'އައްޑޫލައިވް' އިން ކުރި މަސައްކަތް އެބޭފުޅުން ފޯނަށް ޖަވާބު ނުދެއްވާތީ ވަނީ ކާމިޔާބު ވާގޮތް ނުވެފައެވެ.
އައްޑޫގެ ގުޅިފައިވާ ރަށްތަކަށް ކަރަންޓުގެ ޚިދުމަތް ދިނުމުގައި ދިމާވެފައިވާ މައްސަލަތައް ހައްލުކުރުމަށް ފެނަކަ ކޯޕަރޭޝަނުގެ ފަރާތުން މިދިޔަ އަހަރު 2 ޖަނެރޭޓަރެއް އައްޑޫ އަށް ގެނައެވެ. އެހެން ނަމަވެސް މިނިވަން50 ގެ ހަރަކާތްތަކުގައި ބޭނުން ކުރުމަށް އެ އިންޖީނުތައް ވަނީ މާލެ ގެންގޮސްފައެވެ.
މާލެ ގެންދިޔަ އިންޖީނުތަކުގެ ބަދަލުގައި އާ އިންޖީނުތަކެއް 2015 ވަނަ އަހަރުގެ ޑިސެމްބަރ މަހުގެ ތެރޭގައި ގެނެވޭނެ ކަމަށް، ފެނަކަ ކޯޕަރޭޝަނުން ބުނި ނަމަވެސް މިހާތަނަށް އެ އިންޖީނުތަކެއް އައްޑޫއަށް ގެނެސްފައެއް ނުވެއެވެ.