އިނގިރޭސި ޕްރިމިއާ ލީގުގެ އެންމެ ގިނަ ގޯލު ޖެހި ކުޅުންތެރިންގެ ލިސްޓުގެ ދެވަނައަށް ވޭން ރޫނީ ޖެހިލީ ލީގުގައި ސްވެންސީ އާ ދެކޮޅަށް ކުޅުނު މެޗުގައި ގޯލު ޖަހައިގެންނެވެ. މިއީ ރޫނީ ގެ 188 ވަނަ ޕްރިމިއާ ލީގު ގޯލެވެ. ރޫނީ އަކީ ޕްރިމިއާ ލީގު ތާރީޚުގައި 30 އަހަރު ވުމުގެ ކުރިން އެންމެ ގިނަ ގޯލު ކާމިޔާބުކުރި ކުޅުންތެރިޔާވެސްމެއެވެ.
ރޭގަައި މެންޗެސްޓާ ޔުނައިޓެޑް އަދި ސްވެންސީ ބައްދަލު ކުރި މެޗުގައި ރޫނީގެ އިތުރުން ޒުވާން ފޯވާޑް އެންތޮނީ މާޝިއަލް ވެސް ވަނީ ގޯލެއް ޖަހާފައެވެ. 1-2 ގެ ނަތީޖާ އަކުން ޔުނައިޓެޑް މޮޅުވި މިމެޗުގެ ފުރަތަމަ ގޯލު ކާމިޔާބުކުރީ މާޝިއަލް އެވެ. 48 ވަނަ މިނެޓުގައި މި ގޯލު ޖެހުމަށްފަހު ސްވެންސީ އިން މެޗުގެ ނަތީޖާ ހަމަހަމަ ކޮށްފައި ވަނީ 70 ވަނަ މިނެޓުގައެވެ. 77 ވަނަ މިނެޓުގައި މާޝިއަލް ހުރަސްކޮށްދިން ބޯޅައެއް ފްލިކް އަކުން ގޯލުގެ ތެރެއަށް ވައްދައި މެޗުގެ ލީޑު ނަގައިދިނީ ކެޕްޓަން ވޭން ރޫނީއެވެ.
ލީގުގައި ދެވަނައަށް އެންމެ ގިނަ ގޯލު ޖެހި ކުޅުންތެރިޔާގެ އިތުރުން ރޫނީ ވަނީ މެންޗެސްޓާ ޔުނައިޓެޑަށް ވެސް ދެވަނަ އަށް އެންމެ ގިނަ ގޯލު ޖެހި ކުޅުންތެރިޔާއަށް ވެފައެވެ. ޔުނައިޓެޑްގެ ޖާޒީ ގައި ކުޅުނު 503 މެޗުގައި ރޫނީ ވަނީ 238 ގޯލު ޖަހާފައެވެ. އެއްވަނައިގައި އޮތް ސާރ ބޮބީ ޗާލްޓަން އާ ދެމެދު ދެން އޮތީ 11 ގޯލެވެ.
އުމުރުން 30 އަހަރުގައި ރޫނީ ހޯދި ކާމިޔާބީތަކަށް ބަލާއިރު 5 ޕްރިމިއާ ލީގު މެޑަލް، 2 ފުޓްބޯލް ލީގް ކަޕް މެޑަލް، 1 ޔުއެފާ ޗެމްޕިއަންސް ލީގު މެޑަލް އަދި ފީފާ ކްލަބް ވޯލްޑް ކަޕް މެޑަލް ހިމެނެއެވެ.
އަމިއްލަ ނަމުގައި 305 ގޯލު، 147 އެސިސްޓު ގެ އިތުރުން 12 މެޑަލް ލިބިފައިވެއެވެ.
މީގެ އިތުރުން އެތައް އެވޯޑު ތަކެއްވެސް ހިމެނެއެވެ.